Read Bandi PÍTƐ GƆ́LƆI HELE KÉLEI 2 Bible Online

PÍTƐ GƆ́LƆI HELE KÉLEI 2 - Bandi bible

PÍTƐ GƆ́LƆI HELE KÉLEI 2

¹Sítii taá kúla ngáá tiyá lɔ́ ngáá Ngalá ndaa háá lé mbélaa ti ɣɛ́i na wɔ́lɔ wɔ́lɔ mái h̃u aáva ngimɔ́ɔ́ nɔ́ɔ jɔ sítii taá kula ngáa tiyá lɔ́ ngáá kalambó mbó mbélaa Ngala fái h̃u táa vá ɣɛ́ma wú lííwaa. Taá ɣɛ́ taá faa h̃úúỹaani kálamboni mbo tɛi ɣɛ́ ngáá tɔɔỹaá. Aáva tɛí lókohei a mu W̃ááliɣii wu lɛí í váángɔ ngáá ngumaawó tiyá ɣéle tɔ mbɛ. Faale, taá vá ngáá kɛ kíli ỹaaní bɔwɔ́ w̃á fúlo.

²Kɛ́ ná fíli su, nungáá bíh̃iw̃aa taá hítɛ ngangímba lála véleitii pólu, ná waa ngáá, njɔlɔ haítii. Ná hááw̃a, nungáá taá ɣɛ́ taá njɛ́pɛ ỹɔú ỹɔ́ungaa vu kɔwɔ́ato tɔɔỹaá vélei wa.

³Maa lɛɛ gálambo mbo mbelaí sítiini ŋani w̃áálii vílingɔ aa ɣɛ́ lá ngwala ti lii vólu, faale, taá ndɛɛ háá bíh̃i bih̃i sei heínga ngáá kɛinɔɔ́ ti ɣɛ́ taá ŋani w̃ááhɔlɔ su wú yáá. Aáva kaví te náá ti ndá gɔ́sɔngi sí wáálevengɔ ngáá taá vélei ɛ́ɣɛ kɛ kíli ỹaaní íwaa vá wóma ngáá ti ye, aa siɣemá ma.

⁴Ngalá ngáá suuhaalói malékai sítiini mbɛ tí faa ỹɔ́i ɣɛ́i, kɛ́ aá ɣéle, í tí vílii njahááma mbéinda tí na ngili h̃u kpindíí h̃u táá kɔsɔ́ mbááleve fóloi w̃áálɛlɛ.

⁵Sítii taa ɣɛi Ngalá fááw̃a wɔ́lɔ ngeleí sí wu Ngala ngáá suuhaalói ti yɛ, kɛ́ aá ɣéle, i kɛí ngáá háwu njɛí í wá, njɛ́hengi í ndɔ́wɔlɔi kpɛ́lɛɛ máábɔle aáva kɛ léi siỹɛndópoi sí tɔ́ɔ́ ɣɛ́ ma Nówa í ɣɛ́i áá faa lé Ngalángi lélembo peleí wa nungáitii ma, laá lɔ́ ngu ngáá lói su ɛ́ɣɛ nuu vékaa ngɔ́felangɔ.

⁶Ná vólu, taa walá wála félengɔi sítiini tɔ́ɔ ti lolí ngáá Sɔ́dɔu ɛ́ɣɛ Gɔmɔ́lɔ Ngala ngí suu yélaitii mɔní kɔwɔ́ato ti háá ỹɔu ɣɛndái wa. Aáva fái sí lɔ́ na ngáá tɔmaseí sítiini faaw̃a taa Ngalá fááw̃a.

⁷Nuí léi í maaɣawóni i ɣɛi ngáá siỹɛndópoi sí tɔ́ɔ ɣɛ́ ma Lɔ́ti. Lɔ́ti i ɣɛi ngáá tuva velé vánda w̃ɔɔ, laáva ndiiỹááningɔ í ɣɛi lá kɔwɔ́ato njɔlɔ háitii mba nyaama yélai nátii ti ɣɛ́i su taa walá wálai nátii su.

⁸Lɔ́ti va kɛ́ɛ́hɔ pángɔ i ɣɛi lá aáva ngele fíli ɔ́ɔ́ wo ndii ɔ́ɔ́ ɣɛ́ áá w̃ɔ́ kɔwɔ́ato maa nungái ti háá ỹɔítii mba í ɣɛ́i áá suu lɔ.

⁹Faale, a mú náa lɔngá kíya nungái sítii taa ɣɛ́ Ndemɔí Ngala fááw̃a áá tí w̃ááɣawo ti háá bɔlundáitii su aáva kíya áá ɣɛ́ áá faa lá telembo tála yélaitii ma í ló su Ngala kɔ́sɔ mbaaléve fóloi í fóloma,

¹⁰ngungí nda mɛ́ɛ́ gíte sítiini ma ti hítɛngɔ nɔ́ɔ́ ti líívo kɛɛ ỹɔu ỹɔungáitii polú ngáá luwúi aáva Ngalángi yákpangi wúfema fíli aa tí yɛ. Maa lɛ́ɛ́ galambo mbo mbélaitii ti liibángɔ áá ɣɛ lá ngwála ti lii wɔ́ɔ́lɔngɔ ti w̃a, nduwá fíli pá ɛi ɣɛ́ ti h̃u ngáá ti sítii suuhalatá tí ngakpa su Ngalá ngéya ngelegóóh̃u.

¹¹Malékaitii kele tɔ kíya bɛ́lɛ ti h̃úúbangɔ ngwala aáva ti yakpángɔ ngwala í lɔ́ve ndɛɛ gálambo mbo mbélai mba, kɛ́ ná fíli su, tɛí ngoo ỹɔ́u ỹɔ́ungaa le Ndemɔí Ngalá ngaah̃ú w̃a sítii ma tí ngákpa su ngelegóóh̃u.

¹²Kɛ́ maa lɛ́ɛ́ gálambo mbo mbelaí nátii taa faa fíli súúhalata tɛ́i ngátɔ mba. Ti gúlangɔɔ lé ngáá ndɔbɔ húwaa, kele ɣelé fíli áá tí yɛ́, taá faa ɣɛ́ nɔ́ɔ naa yaah̃ú hááw̃a nɔ́ɔ, tiyɛ́i taa ti le nɔ́ɔ ngáá tí tí hóu, ná vólu, tí tí váá. Aáva kíya nɔ́ɔ taa ndɔbɔ húwaitii páa, ngimɔ́ɔ́ nɔ́ɔ ndɛɛ gálambo mbo mbélai sítii táa vá saa w̃ááhɔlɔma.

¹³Faa báma lɔɔ vá láma ti w̃a ngáá faa bámai sí vóto táá nda. Ti ndá gísiyai kɔwɔ́ato ndiivo kɛí wa aá waa ngáá sí fíli táá kɛ áá ti liivó, taá kɛ folói léi í bɔ́ɔ́ ɣɛ ngáá ngufe tála haa. Aa ɣɛ ngáá ngángufe ɛ́ɣɛ mbɛlɛ ỹaaní ná taa báha wú wá wú lááỹɛ mbomáitii, aáva ti liivó fái wáá nɔ́ɔ́ nɛ́nɛ ngáá faa ỹɔu ɣɛ́ndai.

¹⁴Ti yaah̃ú lɔ nɔ́ɔ fɔ́ kɔ́lɔsiya mbá, ti lii vá ngɛ́i la faa ỹɔ́u ɣɛ́ndai h̃u kulo bɛ́lɛ. Sítii ti h̃úúbangɔ láá le Ngala fái h̃u taa nátii píli kaka péle wa. Mɔní mɔ́ni fáá wala vilingɔ́ tí líí vólu ngwala, kɛ́ aáva Ngalángi vélengi lɔ́ ti wa.

¹⁵Ti híɣenga tɔɔỹaá véle giteí wa, ti hítɛ kaka péle wa. Biyɔ h̃iỹɛndo loí sí í ɣɛ́i ngáá Ngalá ndaa háá le mɔ́ɔ́ tɔ́ɔ ɣɛ́ ma Béél̃ɔ ngí lúva veleí lɔ́ náá ti hítɛa su. Béél̃ɔi ná va, faa ỹɔ́u ɣɛ́ndaa volú wɔ́li sɔlɔndái lɔ í ɣɛ́i ngáá ndiivóngi.

¹⁶Kíya bɛ́lɛ soohaalé ngɛ́i bɔ́ɔ́lɔ, kɛ́ Béél̃ɔ ndái i nuu búsa bɔ́ɔ́lɔ wóni, í Béél̃ɔ haa ỹɔítii suugúla ma, í kpéteve kele ɣele tála hái nátii kɛndáá wa.

¹⁷Maa lɛ́ɛ́ gálambo mbo mbelái nátii ti gúlangɔɔ lé nɔ́ɔ ngáá njɛ wú suuyɛ́ɛ́lingɔ ɛ́ɣɛ njɛ bilíí sí fɛfɛngí áá lí nɔ́ɔ la ngáá pele fíli súú véle. Ngalá ngí kpindí h̃u hítɛngɔ wálai h̃uubátɛnga ti haáw̃a.

¹⁸Ti yónga tevéndai kele ɣelé kíte ɛi ɣɛ́ su. Ndiivo kɛɛ́ ỹɔ́u ỹɔungáitii taa ɣɛ su ngáá lúwui, laá lɔ́ taá nungáitii píli lá faa ỹɔ́u ɣɛ́ndai h̃u. Ná wáá ngáá, nungái sítiini taa ɣɛ́ nɔ́ɔ taá gɔ́wɔ gúla ngáá niina nungái sítiini ndiiwáá ti lɔ́ngɔ ti ɣɛ́ngɔ faa ỹɔ́i h̃u taá tiyéni.

¹⁹Taa núngaitii kuulo ngáá tiyá lɔ́ ti wúmaawo kɛ́ tiyá búte tiyá lɔ faa ỹɔ́i yákpangi wú ngáá nduwɔ lopoá. Sí fíli ngi yákpa ngáá ɣɛ́ nuu w̃aah̃u ngwála, kɛ yá lɔ́ náá ngáá nduwɔ lópo ná wu.

²⁰Ná a mu Lemɔ́i ɛ́ɣɛ mu Wúmaawo Mɔ́i Jísu Kílisitii wɔ́lɔndai í kɛ́ngɔ ngáá háwu nungáitii tí w̃aavéla faa ỹɔ́u ɣɛ́ndai wa pɛlɛngɔ́ nuu búsai volú ngeleí sí wu, aá ɣéle í mɔ́ɔ́ ti lií hóu, tí bá su kpé, kɛ ná ná áá ɣɛ́, ti ɣɛ kíli ỹaaningɔ́ áá ɣɛ náa la Ngala ngele péle í lɔ́ve sí wa ti ɣɛ́i su hése.

²¹Kɛ maa ɔ́ɔ́ ɣɛ́ nɛ́ɛ́ni tɛ́i belé ɣɛ́ hɔ́ɔ́ Ngalángi lélembo peleí sí wɔ́lɔni, í lɔ́ve sí wa taa ɣɛ́ náá kɔ́lɔ kɛ́ tí mɔ́ɔ volú yáfe Ngala kééla woo vandaí wa tí ndéni ti w̃a.

²²Tiyá lɔ́ faanɛ́ɛ́ngai sítii ti hítɛngɔ ngá ti w̃áá véle w̃a, ná wáa ngáá, sítii ti lengɔ́i tiyá vá mbaa ngáá sítii, “Kéke áá yángaima í ngi wú pílii w̃ɔí múl̃ɔ.” Ɛ́ɣɛ mɔ́ɔ, “Búbui maaw̃úỹangɔ áá ɣɛ́ la fó aa mɔ́ɔ́ li í víli palái h̃u, í nɔ́ti nɔ́ti su.”