Read Bandi PÍTƐ GƆ́LƆI HELE KÉLEI 3 Bible Online

PÍTƐ GƆ́LƆI HELE KÉLEI 3 - Bandi bible

PÍTƐ GƆ́LƆI HELE KÉLEI 3

¹Mu mbála vandáitii, ní gɔ́lɔi hele kélei lɔ́ náá ngíwaa pɔ́nɛ wú yéle. Kɛ́ félengɔ p̃ɛ́ɛ́ su hése keleí ɛ́ɣɛ fele kélei sí nyá lɔɔ́ yákpa gíte ngáá ngááyaa wú gísitɛ faí sítiini mba kɛinɔɔ́ fáa ỹɔ́u fíli álaa ɣɛ́ wú gísiyaitii su.

²Kɛ́ ndóngɔ gíte lé wú gísei faí sítiini ma Ngalángi hɛ́ɛ́ma láa háá le mbélai tí ndéni, ná vólu, wú ɣɛ́ wáá giséi sí w̃a Ndemɔí Jísu lɛ́i mɔ́ɔ í ngáá mu Wúmaawo Mɔ́i í ndéni, niỹɛ́i ni ngáá ngí gééla hiya mbélaitii ni vái ní ndéni wú w̃a.

³Hése faí p̃ɛ́ɛ́ kule í wú w̃a wú ngátɔ mba aá wáá ngáá ná ngéteyangi yakɛ́ɛ́lɛndai áá bɛ́ɛ́ mba, nungáá taá ɣɛ́ ngeleí sí wu tíwaa ti ndá lɛ́ɛ́h̃ui h̃uuhíya ngáá ndiivo kɛɛ́ ỹɔ́u ỹɔ́ungaitii taa ɣɛ́ su, aáva taá ɣɛ́ taá ngɛ́lɛ gulásu wo ngáá wú ye,

⁴táá ɣɛ́ ta, “Kuulóngi Jísu Kílisitii í mbóni wɔ́lɔ ngáá aá lɔɔ vá yángaimama, bele hɔwɔ́ lɔ́ náá áá hítɛnga hɔ́ɔ? A mu kɛ́ɛ́ɣɛni ti haánga, kɛ́ ná fíli su, faítii kpɛ́lɛɛ tiyá lɔɔ́ ndí nɔ́ɔ ngu ma kíya í ɣɛ́i na wɔ́lɔ í séi ngetéyangi bátɛ sɔ́wɔ w̃a í fólo sí h̃úi w̃a.”

⁵Kɛ́ ná táá nde tiyá lɔ́ɔ kpále nɔ́ɔ wóli wá ngáá Ngala ngí ngetéyangi sí bátɛi wɔ́lɔ ngáá laa wói. I ndɔwɔlɔ́i bátɛi áá kúla njɛí h̃u, aáva njɛí lɔ́ í ndɔwɔlɔ́i bátɛi la.

⁶Njɛí vá tɔ Ngalá ngí kɛ́i ngáá háwu í hé, í ndɔ́wɔlɔi sí kpɛ́lɛɛ máábɔle, ŋáni kpɛ́lɛɛ tí ló mbu wɔ́lɔ.

⁷Kɛ́ ngélewui sí í ná mú su náá Ngalá ndáa wói ná lɔ́ nɔ́ɔ múl̃ɔ í na ngéya ngandɔ́ɔ́lɔngɔ mɔ fááw̃a kúna. Ngandɔ́ɔ́lɔngɔɔ lé ngáá kɛinɔɔ́ folói ná í fólo ma Ngalá ngáá sítii mbaaléve taá faaw̃á ngáá taá véleni í tí ɣɛ kíli ỹaaní.

⁸Mu mbála vandáitii, a waa lééw̃a sí w̃a. Ná áá ɣɛ́ ngáá Ndemɔí Jísu ndá hái h̃u, fowó tásu ngiláángi kulangɔ́ɔ́ lé nɔ́ɔ ngáá folo yílaa aáva folo yílaangi vá kulangɔ́ɔ́ lé nɔ́ɔ múl̃ɔ ngáá fowó tásu ngiláá.

⁹A mu Lemɔ́i Jísu h̃uulɛíngɔ láá le paalaí volú ngi gúúlongi hítɛ fááw̃a nga kíya í tí lɛ́ingaa ti gísiyai h̃u, kɛ́ aá ɣéle, aá lɔ́ɔ liilɔ́lɔ wú háá ya bɔw̃álale aa loí kúnafɔ ɣɛ́ kíli ỹaanií ɔ́ɔ́ wó ngáá nuu fíli, kɛ́ aá ɣéle, ndongɔ́ɔ́ lé nuu kpɛ́lɛɛ tí vólu yáfe ti háá ỹɔítii mba.

¹⁰Kɛ́ aáva paa holói ná váálai gúlangɔɔ lé ngáá kíya ŋuỹá w̃ɔ́i í na nuu ɣɛ́i ɣɛ́ paa l̃áingi wɔ́lɔ ŋuỹá womái. Aáva ngeleí áá ỹɛɛl̃ɛ́ vóma woo wála h̃u, ngeleya kɔ́lingaitii pa taá w̃ɔ, ti ɣɛ kíli í ỹááni. Ndɔwɔlɔ́i sí vá ɛ́ɣɛ sí kpɛ́lɛɛ í su taá ỹaaní, tɛí mɔ́ɔ ɣɛ́ na.

¹¹Ná ngimɔ́ɔ́ ŋani kpɛ́lɛɛ kɛ́ kíli áá vá ỹáánima, ná ná áá ɣɛ́, kɛ kule lɔ́ wú w̃a wú ɣéle wú lɛ́ɛ́h̃uitii suuhíya? Kule lɔ́ wú w̃á wú ɣɛ́ ngáá faa ỹɔ́u ɣɛ́ tála yelaa, wú bɔ́wɔ gúla kɛ́lɛma Ngalá mbɛ.

¹²Faalɔ, ná wáá fóloi ná luwɔɔ́ béle Ngalángi íwaa vá nuu kpɛ́lɛɛ kɔ́sɔma ma, kɛ a kɛ ngáá hɛmbɛ́ wááyaa sí ɣɛ áá paalái h̃úúɣɛ lukpú vólu. Folói ná w̃a, ngɔmbuí aa ngeleí w̃ɔ, ngeleya kɔ́lingaitii pa ti yangíwu yɔ́ɔ́lɛɛ ngɔmbu bandí bándii h̃u.

¹³Kɛ́ aa vá kíya nɔ́ɔ Ngala ngí mu guulóngɔ, a mu yaah̃ú lɔ́ ngelewu níínai wa, telembo fáá léé lee va tɔ nɔ́ɔ áá ɣɛ́ na.

¹⁴Faale, mu mbála vandáitii, ná wá bɛ́lɛ wúwaa kuulóngi sí lúwɔɔ béle kɛ a yakpá ngáá taalí fíli ngáá faa ỹɔ́u gúlo ɣéle tɔ álaa ɣɛ́ wú w̃a faa fíli su ɛ́ɣɛ tɔmbema w̃áá fíli álaa ɣɛ wú wa Ngalá kákala. Kɛ́ wú ɣɛ ndiiheí h̃u wáá Ngála.

¹⁵Wú hómbo wú gísei ma gíte ngáá Ndemɔí Jísu liilɔlɔí áá mbo a mu yaá aá lɔ́ nɔ́ɔ na ngáa a mu bɔwɔ́ wúmaawongi hááw̃a kíya nɔ́ɔ a mu mbála Yála fɛ́li mɔ́i Pɔ́ɔ lɛ́i a mu longɔ́ lá laá bɛ́lɛ í kɔ́lɔ vɔ́nɛngɔ wú yéle ngáá kele ɣeléngi sí Ngala ngí féngɔ ngéya í púngɔ su.

¹⁶Faí sítii tɔ́ nɔ́ɔ jɔ́ í pɔ́nɛni ngí gɔ́lɔitii kpɛ́lɛɛ sú ná í kɔlɔ vɔ́nɛi kɔwɔ́ato ti wa. Faa lɛ́ingaani taá ɣɛ́ ngi gɔ́lɔi nátii sú ti yatɔ́ndai mba kpangɔ́ ngwala. Maa hái nátii pá tɔ sítiini taá faa gíte yakɔ́lɔ aáva taa lóóni kpáŋ kpáŋ Ngala fái h̃u taá maa vóte ngáá bɔwɔ́ liivó péle kíya nɔ́ɔ taá kɛ ngáá faa vékaitii ti vɔ́nɛngɔi Ngala Kɔ́lɔi h̃u. Ná vá tiwáá kɛ, tiyá lɔɔ vá ngáá kɛ kíli ỹáánii bɔwɔ́ w̃ááh̃u.

¹⁷Faale, mu mbála vandáitii, ná wú fái sí h̃uuwɔlɔ́ náá kílii, kɛ waayaa w̃aah̃ú béle gíte maa hái h̃u ngáá pangɔ́ kɛinɔɔ́ nyaama yélai sítii tí gákangɔ tɔɔỹaá vélei wa, tɔ́ɔ́ vá kɛ wɔ́ɔ́ víli kaka péle wa, tɔ́ɔ wú gúla wú lóó gilí vándai h̃u wú su Ngala fái h̃u.

¹⁸Kɛ́ aá ɣéle, a ndi ngu ma ngáá lɛɛh̃úi h̃uuhíyandaa Ndemɔí Jísu háá bɔwɔí w̃áá véle w̃a lɛ́i í ngáá mu Wúmaawo Mɔ́i, wu ɣɛ́ nɔ́ɔ wáá ɣɛ́ kɔlɔ kélei. A maayáá mu Lemɔ́i Jísu Kílisitii lɛ́ máá ngufema hé mbɛ í séi háá w̃a í lí ngáá naa lúwɔ kúnafɔ! Amíína.