Read Bandi NJƆÚ HESENDAA GƆLƆÍ 1 Bible Online

NJƆÚ HESENDAA GƆLƆÍ 1 - Bandi bible

NJƆÚ HESENDAA GƆLƆÍ 1

¹Niỹá lɔ́ɔ kɔlɔ vɔ́nɛ wú yéle kɔwɔ́ato nuí síí w̃ɔ́i wa taa ɣɛ́ ma Keela Woí. Keela Woí sí vá tɔ í ngáá ndɛɛh̃u gítei hé mɔ́i. Aáva í ɣɛi na ngetéyangi lɔ́kula héimai wɔ́lɔ. Ní ngoo ỹɛ́nini, ní tɔ ngáá bɔwɔ́ bɔ́wɔ yááh̃ui. Ní tɔá gíte, aáva ní lúba mba ngáá loko.

²Ná ndɛɛh̃u gítei sí he mɔ́i í gúlani kála kála ma, ní tɔ́ni, aáva naá fáa lé kɔwɔ́ato mba. Aáva niỹá lɔ́ɔ ndé wú w̃á ngáá ndɛɛh̃úi sí lɔ na kúnafɔ fááw̃a. I ɣɛi na wɔ́lɔ taá Kɛɛɣɛí Ngala, aáva Kɛɛɣɛí Ngála í kɛ́nga ngáá háwu ní ɣɛ́ kɔ́lɔ.

³Sí ní tɔá ɛ́ɣɛ sí ní mɛningá, laá lɔ naá faa lé wú w̃a kɔwɔ́ato mba ngáá kɛinɔɔ́ wá bɛ́lɛ nɔ́ wú báha ni wa, a mu háá í ɣɛ́ su yíla maá Kɛɛɣɛí Ngálani ngaa ngí H̃íỹɛndou Loí Jísu Kílisitii.

⁴Niỹá lɔɔ sí vɔ́nɛ wú yéle ngáa kɛinɔɔ́ ní góóh̃unɛi álaa gɛ́ɛ́lɛ pele h̃u.

⁵Keela wói va Ngalángi H̃íỹɛndou Loí í ndéngɔ, náá nde wú w̃a aá waa ngáá sí, Ngalá tɔ́ ngáá lámbo fo kɛ kíli aáva aa ngáá kpindí h̃u w̃ɔ́ɔ́ kulo bɛ́lɛ.

⁶Faale, ná a maa ɣɛ́ ndé ngáá a mu báhaa Ngalá mba, a mu háá í ɣɛ́ su yíla, kɛ́ máá sítii kɛ ti ngáá kpindí h̃u háitii, kɛ ná ná áá ɣɛ́, kɛ muỹá lɔ́ ngáá ndɛɛ gɔ́ɔ́la mbélaa. Aáva kɛ a maá híyama ngáá tɔɔỹaá vélei.

⁷Kɛ́ ná a maa ɣɛ́ kala kála ma kíya nɔ́ɔ Ngalá kpútei í ná, í kála kála ma, ná ná áá ɣɛ́, kɛ a mu háá lɔ nɔ́ɔ su yíla. Aáva saáɣa haí Ngalángi H̃íỹɛndou Loí Jísu í mbóngɔ, aa mu wúya fó, faa ỹɔ́u fíli ɛi ɣɛ mu h̃u.

⁸Ná a maa ndé ngáá faa ỹɔ́u fíli aa mu h̃u, kɛ a muỹá lɔ́ɔ bɔ́wɔ yákpolowa nɔ́ɔ aáva kɛ Ngala tɔ́ɔ́ỹaa fíli aa mu h̃u.

⁹Kɛ́ ná a maa gáhe ngáá mu háá ỹɔítiini Ngalá ma, a mu háá ỹɔítii súúhaalo, í mu wúya fó faa kpɛ́lɛɛ ngéya taa ɣɛ́ ngáá faa ỹɔítii bɔw̃álale aá lɔ́ ngáá tɔwɔbáɣa w̃ɔ́ɔ́ ɛ́ɣɛ telembo mɔ́ɔ́.

¹⁰Ná a maa ndé ngáá maá nɛ́ɛ faa ỹɔ́u fíli kɛ́ni, kɛ muỹá lɔ́ɔ Ngalá kúla ngáá ndɛɛ gɔ́ɔ́la mɔ́ɔ́, kɛ Ngala kééla woí a mu lií h̃u.