Read Bandi NJƆÚ HESENDAA GƆLƆÍ 2 Bible Online

NJƆÚ HESENDAA GƆLƆÍ 2 - Bandi bible

NJƆÚ HESENDAA GƆLƆÍ 2

¹Kíya bɛ́lɛ ngí sí lénga wú w̃á, nyá lɔ́ɔ kɔlɔí sí vɔ́nɛ wú yéle wɛ́i wú ngáá ní léngaa Ngala fái h̃u ngáá kɛinɔɔ́ wálaa fáá ỹɔ́u ɣɛ́. Kɛ́ ná wú tá fíli áá faa ỹɔ́u ɣɛ, nuu yílaa tɔ́ na, lɛ́i í ngáá Jísu Kílisitii í ngáá telembo mɔ́i aáva í ngáá mu lúúỹangi, aa yɛpɛ Kɛɛɣɛí Ngála ngéle mu haáw̃a.

²Laá lɔ́ í ngáá saáɣai a mu háá ỹɔítii súúhaalo fááw̃a. Aáva aa gɛɛlɛí nɔ́ɔ a muỹá séɣe héɣe mbá kɛ́ laá lɔ́ í ngáá saáɣai nuu kpɛ́lɛɛ ti háá ỹɔítii suuhaaló fááw̃a.

³Ná a maa gólo Ngalángi hávaitiini mbu, kɛ mu gi mái aa ɣɛ kpál̃au, mú ɣɛ́ kɔ́lɔ ngáá ele gíte waa ngáá Ngalá.

⁴Ná a maa nde ngáá mú Ngála kɔ́lɔ kɛ́ mɔí gólo ngi hávaitiini mbu, kɛ muỹá lɔ́ ngáá ndɛɛ gɔ́ɔ́la mbélaa aáva Ngala tɔ́ɔ́ỹaa fíli ɛi ɣɛ́ mu h̃u.

⁵Kɛ́ ná a maa gólo Ngalángi gééla woí wu, Ngalángi lóngi áá ɣɛ́ mú h̃u, kɛ aa gɛɛlɛngɔ́ pele h̃u. Ná vá tɔ áá ngákɛ ngáá a mu háá í ɣɛ́a su yíla a maá Ngála.

⁶Ná á maá nde ngáá maá Ngála mu ɣɛ́a ngáá nuu yílaa, kɛ kule lɔ́ mu w̃a mú lɛ́ɛ́h̃ui h̃uuhíya kílii í ɣɛ́ ngáá kíya Jísu Kílisitii ndái í na.

⁷Mu mbála vandáitii, savaí sí ngíwaa pɔ́nɛ kɔlɔí sí h̃u wú yéle, aa ngáá sava niiná. Kɛ́ aá lɔ́ ngáá sava vɔlɔ́, í ɣɛ́ngɔ wú yáá í séi tɔkúla heímai kái kái má. Maa háva vɔ́lɔi sí aá lɔ́ í ngáá Ngalángi gééla woí sí wú mɛningá náa kílii.

⁸Kɛ́ aáva ná fíli su sí ngíwaa pɔ́nɛ kɔlɔí sí h̃u wú yéle aá lɔ́ ngáá kalambo níína kɔwɔ́ato sava vɔlɔí wa. Sí Jísu Kílisitii í kɛ́ngɔ ɛ́ɣɛ sí wúwaa kɛ aá lɔ́ áá ngákɛ ngáá kɛ kalambo níínai lɔ ngáá tɔɔỹaá. Sífaa, kpindíí lɔɔ lí náa aáva lámbo fongí gítei vá tɔ náa áá hólo.

⁹Ná maa nde ngáá muỹá lɔ kala kála ma mbéi lámbo fo kítei í na, kɛ́ mu hilíngɔ ngáá mu mbála Yalá fɛ́li mbélaitii, kɛ muỹá lɔ́ nɛ́nɛ kpindí h̃u.

¹⁰Ná maa ló ngáá mu mbála Yalá fɛ́li mbélaitii, kɛ muỹá lɔ lámbo fo kiteí yá. Ná vólu, kɛ faa fíli a mu híya veléi wa áá kɛ ngáá háwu maa faa ỹɔ́u ɣɛ́.

¹¹Kɛ́ ná maa híli ngáá mu mbála Yalá fɛ́li mbélaitii, kɛ muỹa lɔ kpindí h̃u, múwaa híya su, aáva mɔí ɣɛ́ kɔ́lɔ ngáá peleí sí múwaa líí la bɔw̃álale kpindíí i kɛngá mɔí ỹánda lɔ.

¹²Nyá lɔ́ɔ kɔlɔí sí vɔ́nɛ wú yéle wɛ́i wu ngáá ndengáitii ndóngɔ ngáá wú ye, bɔw̃álale, wú háá ỹɔítii suuhaa í lónga Jísu Kílisitii haalái h̃u.

¹³Nyá lɔ́ɔ kɔlɔí sí vɔ́nɛ wú yéle wɛ́i wú ngáá ndou lé mbélaitii bɔw̃álale, wú núi sí wɔ́lɔ í ɣɛ́ngɔ wɔ́lɔ ná ngetéyangi lɔ́kula héimai. Nyá lɔ́ɔ kɔlɔí sí vɔ́nɛ wú yéle wɛ́i wú ngáá fóningeleaitii bɔw̃álale wú hómboa nuí síí w̃ɔ́i w̃a taa ɣɛ́ ma Nyaama W̃ɔ́i.

¹⁴Nyá lɔ́ɔ kɔlɔí sí vɔ́nɛ wú yéle wɛ́i wú ngáá ndengáitii ndóngɔ ngáá wú ye, bɔw̃álale, wú kɔ́lɔ ngáá ele gíte waa ngáá mu Kɛ́ɛ́ɣɛ Ngála. Nyá lɔ́ɔ kɔlɔí sí vɔ́nɛ wú yéle wɛ́i wú ngáá ndoú lé mbélaitii bɔw̃álale, wú núi sí wɔ́lɔ í ɣɛ́ngɔ wɔ́lɔ ná ngetéyangi lɔ́kula héimai. Nyá lɔ́ɔ kɔlɔí sí vɔ́nɛ wú yéle wɛ́i wú ngáa fóningeleaitii bɔw̃álale, wú h̃úúbangɔɔ lé Ngala fái h̃u aáva Ngala kééla woí lɔ wú líí h̃u, ná vólu, wú hómboa nuí síí w̃ɔ́i w̃a taa ɣɛ́ ma Nyaama W̃ɔ́i.

¹⁵Ngeleí sí wuú w̃áálo ngálaa ɣɛ́ wú lií h̃u kɛlaa sítii kpɛ́lɛɛ ti ngáá suu wɔ́lingaitii. Ná ngeleí sí wuu lóngi áá ɣɛ́ wú lií h̃u, kɛ ndo ngáá wú líí h̃u Kɛɛɣɛí Ngála fááw̃a,

¹⁶sífaa, sítii kínɛi ti ngáá ngeleí sí wuu haítii ti tá fíli ɛi gula Kɛɛɣɛí Ngála ngéya. Ti kpɛ́lɛɛ tɔ́ ngáá ngeleí sí wúu haítii. Ná waa ngáá, faa ỹɔ́u ɣɛ́ ndíívo kɛi áá ɣɛ́ nuu h̃u ɛ́ɣɛ sítii nuu yáá tí lɔ, ti w̃ɔní í víli í líí vólu ɛ́ɣɛ sítii kínɛi nungáitii ti lii áá ɣɛ́ wɔ́ɔ́lɔ faaw̃a ná taá tí w̃ááhɔlɔ.

¹⁷Ngeleí sí wú ɛ́ɣɛ sí kínɛi tí ngáá suu wɔ́lingaitiini ngáá nuu búsaa taá mɔní mɔ́ni kɛ, kpɛ́lɛɛ tɔ́ɔ́ vá vílama, kɛ́ ná maa Ngalá ndiivó fáitii kɛ, maa kúnafɔ lɛ́ɛ́h̃u w̃aahɔ́lɔ.

¹⁸Wɛ́i wú ngáá ní léngaa Ngala fái h̃u, ngetéyangi yákɛɛlɛndai bɛ́ɛ́ngɔɔ lé náa mba. Tí ndéni wɔ́lɔ ngáá Jísu Kílisitii waahílima w̃ɔ́i lɔɔ vá vaamá, aáva mbaahílima yélaa bih̃íw̃aa lɔ́ náa kílii ngéteyangi h̃u. Faale, a mú kɔ́lɔ ngáá ngetéyangi yákɛɛlɛndai i bɛɛngá náá mba.

¹⁹Nungái sítiini pa ti gúlai mu liiwáá kɛ́ taá ɣɛ́i gítei ngáá mu tá. Bele ti ɣɛ́i ngáá mu ta, tɔ́ɔ́ ɣɛ́ loí mu gúúwui h̃u, kɛ́ kpétevengi tí mbóngɔ mu wa, ná lɔ í ngakɛ́ngɔ kpál̃au ngáá kɛ taá ɣɛ́ngɔ ngáá mu gúúwui h̃uu yélaa.

²⁰Kɛ́ Jísu Kílisitii i kɛ́a ngáá háwu H̃ɛ́ɛ́ma Ỹínangi í ɣɛ mu volú, faale, wú kpɛ́lɛɛ wú tɔɔỹái wɔlɔ́.

²¹Náá hááw̃a, ngáá kɔlɔí sí vɔ́nɛma wú yéle sífaa wáá tɔɔỹái wɔlɔ́, kɛ́ aá ɣéle, nyá lɔ́ɔ pɔ́nɛ wú yéle sífaa wú tɔɔỹái wɔlɔ. Ná vólu, wú suuwɔlɔ́ ngáá ndɛɛ fíli ɛi gula tɔɔỹaá h̃u.

²²Kɛ ele lɔ hɔ́ɔ́ í ngáá ndɛɛ gɔ́ɔ́la mɔ́i? Ndɛɛ gɔ́ɔ́la mɔ́i waa ngáá nuí sí áá nde ngáá Jísu aa ngáá nuí síí w̃ɔ́i taa ɣɛ́ ma Kílisitii ná wáá ngáá Ngalángi Lókolo Mbá W̃ɔ́i. Maa w̃ɔ́i ná lɔ́ í ngáá Jísu Kílisitii waahílima w̃ɔ́i. Maa w̃ɔ́i ɛi lokohéi Jísu Kílisitii wú lɛí í ngáá Ngalángi H̃íỹɛndou Loí kɛlaa Ngalá kítei lɛí í ngáá Kɛɛɣɛí.

²³Nuí fíli ɛ́i ɣɛ́ lókoheini Ngalángi H̃íỹɛndou Loí wu, kɛ maa w̃ɔ́i taá Kɛɛɣɛí Ngála ti háá aa su yíla. Kɛ́ nuí fíli áá lokohéi Ngalángi H̃íỹɛndou Loí wu, kɛ maa w̃ɔ́i taá Kɛɛɣɛí Ngalá ti háá lɔ su yíla.

²⁴Faale, keela wói wú mɛningɔ́ tɔ́kula héimai wɔ́lɔ í ló wú gí ma ngáá pangɔ́. Ná maa gééla wói áá ló wú gí ma ngáá pangɔ́, kɛ wáá Ngalángi H̃íỹɛndou Loíni ɛ́ɣɛ Kɛɛɣɛí Ngála wú báhangɔ aa ɣɛ́ lá su hɔ́wɔ fíli.

²⁵Aáva sí Jísu Kílisitii gíte í mu guulóngɔ lá aá waa ngáá kúnafɔ lɛ́ɛ́h̃ui.

²⁶Nyá lɔɔ kɔlɔí sí vɔ́nɛ wú yéle kɔwɔ́ato sítii mba táá ɣɛ́ ti wú yákpolowa, ti wú gúla wú híya veléi wa.

²⁷Kɛ́ Hɛ́ɛ́ma Ỹínangi Jísu Kílisitii í kɛ́ngɔ ngáá háwu wú maahɔ́lɔngɔ aá lɔ wú vólu. Faalɔ, nuu fíli álaa lo mɔ́ɔ wú gálamboma. Hɛ́ɛ́ma Ỹínangi aa wú gálambo ngáá fáitii kpɛ́lɛɛ aáva sí áá wú gálambo la, tɔɔỹaá le, ɛi ɣɛ ngáá ndɛɛ́. Faale, kalambongí Hɛ́ɛ́ma Ỹínangi áá mbó ngáá wú báhangɔ í ɣɛ́ la su Jísu wa í ndí ngu ma, wú gólo maa gálambongai mbu.

²⁸Wɛ́i wu ngáá ndengáitii ndóngɔ ngáá wú yé, a ló kpáhai h̃u wú su mba kɛinɔɔ́ ná áá vá, nduwá álaa ɣɛ́ wú h̃u foloí ná w̃a áá va vááma ma ngáá wɔ́i mɔ́ɔ lo yaah̃ú lɔ́ɔ́wuma mba ngufé su maa hóloi ná w̃a.

²⁹Wú kɔ́lɔ ngáá Jísu Kílisitii lɔ́ ngáá telembo mɔ́ɔ́. Faale, kule lɔ nɔ́ɔ́ wú w̃a wú ɣɛ́ kɔ́lɔ ngáá nuí fíli áá ɣɛ́ áá fái sítii kɛ taa ɣɛ́ péle w̃a Ngála kákala, kɛ maa w̃ɔ́i lɔ ngáá Ngalángi lóu.