Read Bandi NJƆÚ HESENDAA GƆLƆÍ 3 Bible Online

NJƆÚ HESENDAA GƆLƆÍ 3 - Bandi bible

NJƆÚ HESENDAA GƆLƆÍ 3

¹A tɔ lɛ́ɛ kíya Kɛɛɣɛí Ngalá ndóngɔ ngwala ngáá mú ye. Ndongí í su ngáá mú ye ngwala yabɔ́ɔ́lɔngɔɔ lé ná lɔ í kɛ́a p̃ɛ́ɛ́ taá mu lolí ngáá Ngalángi léngaitii aáva p̃ɛ́ɛ́ a muỹá lɔ́ ngáá ngí léngaa. Nungái sítii tí ngáá ngeleí sí wúu yélai taá kɔ́lɔ ngáá ele gíte waa ngáá mú ye sífaa nápa taá ɣɛ́ngɔ Ngalá kɔ́lɔ ngáá ele gíte waa ngáá laá.

²Mu mbála vandáitii, a muỹá lɔ́ náá ngáá Ngalángi léngaa kɛ́ kíya máá vá ɣɛmá, nga ngáá nɛ́ɛ́ kpál̃au. Kɛ́ aáva a mú kɔ́lɔ ngáá ná Jísu Kílisitii áá vá a maá ɣɛ́ ngáá kɛ kíli bɔw̃álale a maá tɔ kíya gíte í na.

³Nuí fíli kitomái sí áá ɣɛ́ mbɛ Jísu Kílisitii h̃u, maa w̃ɔ́i aa bɔwɔ́ h̃uuhóu w̃a, nguyangɔ́ í ɣɛ lá fó faa ỹɔí yaá kíya nɔ́ɔ Jísu Kílisitii í na faa ỹɔ́u fíli áá su.

⁴Nuí fíli áá faa ỹɔ́u ɣɛ́, maa w̃ɔ́i velé lálangɔ aa ɣɛ́ la Ngalángi hávai ỹááni fááw̃a bɔw̃álale faa ỹɔ́u ɣɛ́ndai waa ngáá Ngalángi hávai ỹáánindai.

⁵Wú kɔ́lɔ ngáá Jísu Kílisitii i vaangɔ́ ngeleí sí wu ngáá kɛinɔɔ́ í nuu búsai wúya fó fáá ỹɔ́i yaá, laáva faa ỹɔ́u fíli áá ɣɛi su.

⁶Faale, nuí fíli kpahangɔ áá ɣɛ́ lá Jísu Kílisitii wa maa w̃ɔ́i ɛi ndi ngu ma ngáá faa ỹɔ́u ɣɛ́ndaa. Kɛ́ nuí fíli áá ndí ngú ma ngáá faa ỹɔ́u ɣɛ́ndaa, kɛ maa w̃ɔ́i aa nɛɛ Jísu Kílisitii lɔ́ni kɛlaa ɔ́ɔ́ ɣɛ́ kɔ́lɔ ngáá ele gíte waa ngáá laá.

⁷Ní léngaitii Ngala fái h̃u, wálaa kɛ nuu fíli ɔ́ɔ́ wú yákpolowa. Nuí fíli áá ɣɛ́ áá sítii kɛ tí péle w̃a, kɛ maa w̃ɔ́i lɔ ngáá telembo mɔ́ɔ́ Ngalá ngááh̃u kíya nɔ́ɔ́ Jísu Kílisitii gíte í ngáá telembo mɔ́ɔ́ Ngalá ngááh̃u.

⁸Nuí fíli áá ndí ngu ma ngáá faa ỹɔ́u ɣɛndáá kɛ maa w̃ɔ́i lɔ ngáá Ngutuwɔ́ Ỹína Nyɔí núú bɔw̃álale Ngutuwɔ́ Ỹína Nyɔí lɔ ngáá faa ỹɔ́u ɣɛ mɔ́ɔ wɔ́lɔ kpɔ́lɔɔ ngetéyangi lɔ́kula héimai. Ngalángi H̃íỹɛndou Loí i vaangɔ́ ngeleí sí wu háwui sí kái kái fááw̃a, ná wáa ngáá, í Ngutuwɔ́ Ỹína Nyɔí háá h̃uubatɛ nyɔu ỹɔungáitii kpɛ́lɛɛ nyááni.

⁹Nuí fíli áá ɣɛ́ ngáá Ngalángi ndá lóu, maa w̃ɔ́i ɛi ndi nɔ́ɔ́ ngú ma kélei ngáá faa ỹɔ́u ɣɛ́ndaa bɔw̃álale, Ngalángi ndá ɣɛ́ kílii kái kái áá ɣɛ maa w̃ɔ́i h̃u. Aáva sífaa í ngáá Ngalángi lóu, faale, ɛi hómbo ɔ́ɔ́ ndi ngu ma ngáá faa ỹɔ́u ɣɛ́ndai nɔ́ɔ.

¹⁰Kɛ ngimɔ́ɔ́ nuu áá ɣɛ́ Ngalángi léngaitii ɛ́ɣɛ Ngutuwɔ́ Ỹína Nyɔí léngaitii ndówah̃u kɔ́lɔ. Ná wáá ngáá nuí fíli ɛ́i ɣɛ́ áá sítii kɛ tí péle w̃a Ngalá kákala, ɔɔ nuí fíli ɛ́i ɣɛ́ loí ngáá ngí mbála Yalá fɛ́li mbélaitii kɛ maa w̃ɔ́i aa ngáá Ngalángi lóu.

¹¹Keela wói sí wú mɛ́nini wɔ́lɔ tɔ́kula héimai aá waa ngáá sí, kɛ a mú ló ngáá ỹɔw̃ɔ́ ỹɔ́w̃ɔ.

¹²A málaa ɣɛ́ ngáá siỹɛndópoi ná tɔ́ɔ́ ɣɛ́ ma Kíŋ ɣɛ kíli lɛ́i í ɣɛ́i ngáá nuí sí taa ɣɛ́ ma Nyaama W̃ɔ́i ngi núu. Kíŋ ná lɔ í bɔwɔ́ bɔ́wɔ ndéɣei vááni. Kíŋ í ngi ndéɣei vááni sífaa Kíŋ i ɣɛi ngáá tuva velé ỹɔ́u w̃ɔɔ aáva ngi ndéɣe í ɣɛi ngáá tuva velé vánda w̃ɔɔ.

¹³Faale, mu mbála Yalá fɛ́li mbélaitii, álaa gɔ́ɔ́la wú wá ná ngeleí sí wúu yélai taa híli ngáá wú ye.

¹⁴A mú suuwɔlɔ́ ngáá a maá mɔ́ɔ ngáá nuu háángɔ ɣɛ́ kíli Ngalá kákala, kɛ́ a muỹá lɔ́ náa ndɛ́ɛ́h̃u gítei h̃u. Ná yakɛ́ngɔɔ lé kpál̃au ngáá mú ye bɔw̃álale a mu longɔ́ɔ́ lé ngáá mu mbála Yalá fɛ́li mbélaitii. Nuí fíli ndo ngɛ́i ɣɛ́ su, kɛ maa w̃ɔ́i gúlangɔɔ lé nɛ́nɛ ngáá nuu háángɔ ɣɛ́ kíli.

¹⁵Nuí fíli áá ɣɛ́ hílii ngáá ngí mbála Yalá fɛ́li mbélaitii, kɛ maa w̃ɔ́i lɔ ngáá nuu váá mɔ́ɔ, aáva wú suuwɔ́lɔ nɔ́ɔ ngáá nuu váá mɔ́ɔ ɛi ɣɛ kúnafɔ lɛ́ɛ́h̃ui h̃u.

¹⁶Ndongí va kɔlɔ́ kíli lɔ ngáá sí mu yɛ, ngáá kíya Jísu Kílisitii i lɛ́ɛ́h̃ui gúlani kɛ́lɛma a mu hááw̃a. Ngimɔ́ɔ́ nɔ́ɔ a muỹá bɛ́lɛ kule í mú w̃a a mú lɛ́ɛ́h̃ui gúla kɛ́lɛma a mu mbála Yalá fɛ́li mbélaitii faaw̃a.

¹⁷Ná nuu áá ɣɛ́ na toko i mbɛ́ aáva í ngí mbála Yalá fɛli mɔ́i lɔ i kpeɣé sú, kɛ́ í yaah̃ú w̃ááleve ngáá ngi mbála Yalá fɛli mɔ́i ná, kɛ aa ɣelé ndé náá ngáá Ngalángi lóngi lɔ́ ndií h̃u?

¹⁸Wɛ́i wú ngáá ní léngaa Ngala fái h̃u, nyá lɔ́ɔ nde wú w̃á ngáá a mú lóngi ỹɔw̃ɔ́ ỹɔ́w̃ɔ hááw̃a álaa ɣɛ́ nɔ́ɔ a mu laa wóó h̃u. Kule lɔ́ mú w̃a mú ndó kítei sí yákɛ kpál̃au áá gúla a mu lúva velé h̃u.

¹⁹Ná a maa ɣɛ loi ngáá ỹɔw̃ɔ́ ỹɔ́w̃ɔ, a maá ɣɛ́ kɔ́lɔ ngáá a muỹá lɔ tɔɔỹaá gákai w̃áa véle. Faalɔ, bele bɛ́lɛ mu gi mái aa nde ngáá kɛ a maá vélei, a mu liihéingɔ aa ɣɛ lá Ngalá kákala. Bɔw̃álale Ngalángi géle ɣelengi lɔ́vengɔɔ lé mu gi mái wa aáva i faa kpɛ́lɛɛ kɔ́lɔ.

²¹Mu mbála vandáitii, ná mu gi mái ɛ́i mu velé lála kɛ nduwá fíli ɛi ɣɛ mu h̃u Ngalá kákala.

²²Sí fíli a maá Ngála fɛ́li faaw̃a, aa fe mu yaá bɔw̃álale a mu golóngɔɔ lé ngi hávaitiini mbu ɛ́ɣɛ mú wáá fái sítiini kɛ ti ngáá ndiivó fáitii.

²³Sí vá í ndéngɔ mu w̃a ngáá a mu kɛ́, aá wáa ngáá, mu lá ngáá ngí H̃íỹɛndou Loí Jísu Kílisitii, ná vólu, a mu ló ngáá ỹɔw̃ɔ́ ỹɔ́w̃ɔ kíya nɔ́ɔ Jísu Kílisitii í ndéngɔ mu w̃a ngáá mú kɛ.

²⁴Ná mu gólongɔ áá ɣɛ́ la Ngalángi hávaitiini mbu kɛ mu báhangɔɔ lé Ngalá mba Ngalá bɛ́lɛ nɔ kpahangɔ́ mú wa. Sí vá a maa ɣɛ́ kɔ́lɔ mba ngáá kɛ mu báhangɔɔ lé Ngála mba aá wáa ngáá Hɛ́ɛ́ma Ỹínangi í kɛ́ngɔ ngáá háwu í mú volú.