Read Bandi NJƆÚ HESENDAA GƆLƆÍ 4 Bible Online

NJƆÚ HESENDAA GƆLƆÍ 4 - Bandi bible

NJƆÚ HESENDAA GƆLƆÍ 4

¹Mu mbála vandáitii, wálaa ɣɛ́ nɔ́ɔ wáá lá ngáá nuí kpɛ́lɛɛ nɔ́ɔ ngáá ná nɔ́ɔ léi taá kula ngáá kɛ Ngalángi Hɛ́ɛ́ma Ỹínangi lɔ́ íwaa tí wúto. Kɛ́ aá ɣéle, waayaa ti yilá ngílangi fíli ngásɔbɛ ngáá pangɔ́, wú ɣɛ́ kɔ́lɔ ná wɔ́lii Ngalángi Hɛ́ɛ́ma Ỹínangi lɔ áá ɣɛ́ áá tí wú to. Sífaa, nuu bíh̃iw̃aa lɔ́ náá ngelewu táá kulá ngáá tiyá lɔ́ ngáá Ngalá ndaa háá lé mbélaa kɛ́ ɛi ɣɛ́ ngáá tɔɔỹaá.

²Sí vá wáá ɣɛ́ kɔ́lɔ mba ngáá nuí sí Ngalángi Hɛ́ɛ́ma Ỹínangi áá ɣɛ́ áá ngúto, aá wáá ngáá nuí fíli áá nde ngáá Jísu Kílisitii i ɣɛi ngeléi sí wu ngáá nuu búsa kɛ Ngalángi Hɛ́ɛ́ma Ỹínangi lɔ́ áá ɣɛ́ áá maa w̃ɔ́i ná wúto.

³Kɛ́ nuí fíli áá w̃ááɣaalii ngáá fái sí kɛ Ngalángi Hɛ́ɛ́ma Ỹínangi láá le áá ɣɛ́ áá maa w̃ɔ́i ná wúto. Kɛ Jísu Kílisitii waahílima w̃ɔ́i ỹínangi lɔ áá maa w̃ɔ́i wúto. Wú ɣɛ́i mɛniní wɔ́lɔ ngáá Jísu Kílisitii waahílima w̃ɔ́i lɔ vá vaamá aáva í vaangá náa kílii ngeleí sí wu.

⁴Kɛ́ wɛ́i wú ngáá ní léngaa Ngala fái h̃u, wálaa, wá lɔ́ Ngala fááw̃a aáva sítii taá kúla ngáá tiyá lɔ́ ngáá Ngalá ndaa háá lé mbélaa kɛ́ ɛ́i ɣɛ ngáá tɔɔỹaá, wú hómbonga ti w̃a bɔw̃álale Ngalángi Hɛ́ɛ́ma Ỹínangi í wú vólu, ngakpángɔɔ lé í lɔ́ve ỹínangi sí wa í ngélei sí wuu yélaitii polu.

⁵Tiyá lɔ ngáá ngeleí sí wúú yélaa aáva taá yɛ́pɛ kɔwɔ́ato ngeleí sí wúú haítiini mba, faalɔ, nungái sítiini ti ngáá ngeleí sí wúú yélaitii taá wólilo tí w̃a.

⁶Kɛ́ muỹá laá muỹá lɔ́ Ngalá fááw̃a. Nuí fíli pa í Ngála kɔ́lɔ ngáá ele gíte waa ngáá laá, maa w̃ɔ́i aa wolílo mu w̃a. Kɛ́ nuí fíli pa ɛ́i ɣɛ Ngalá fááw̃a, maa w̃ɔ́i ɛi wolílo mu w̃a. Ná va tɔ áá kɛ maa ɣɛ́ ndowah̃úngi wɔ́lɔ tɔɔỹaá Ỹínangi wa ɛ́ɣɛ ndɛɛ ỹínangi.

⁷Mu mbála vandáitii, a mu ló ngáá ỹɔw̃ɔ́ ỹɔ́w̃ɔ bɔw̃álale Ngalá tɔ ndongí áá gúla ngeyá. Nuí fíli ndó ngáá ɣɛ́ ndíi h̃u nungáá vékaa hááw̃a maa w̃ɔ́i lɔ ngáá Ngalángi lóu aáva i Ngalá kɔ́lɔ ngáá ele gíte waa ngáá laá.

⁸Nuí sí vá ndo ngɛ́i ɣɛ́ ndií h̃u nungáá vékaa haaw̃a kɛ maa w̃ɔ́i aa Ngalá kɔ́lɔ ngáá ele gíte waa ngáá laá sífaa Ngalá tɔ ngáá ndo mɔ́ɔ́.

⁹Ngalángi lóngi yááh̃u ɣɛ́ kíli lɔ ngáá sí ngáá mu ye, i ngi H̃íỹɛndou Lou yiláángi lɔ́vengɔ ngeleí sí wu ngáá kɛinɔɔ́ a mú ndɛ́ɛ́h̃u gítei w̃aahɔ́lɔ laá maa véle w̃a.

¹⁰Ndongí gítei aa ngáá ndongí mu sú ngáá Ngala kɛ́ aá wáa ngáá ndongí Ngala ngí su ngáá mu ye í ngi H̃íỹɛndou Loí lɔ́vengɔ ma ngáá saáɣa a mu háá ỹɔítii suuhaaló fááw̃a.

¹¹Mu mbála vandáitii, ná ngimɔ́ɔ́ Ngalá ndóngɔ ngáá mu ye kɛ kulé lɔ́ mú w̃a muỹá bɛ́lɛ mu ló ngáá ỹɔw̃ɔ́ ỹɔ́w̃ɔ.

¹²Nápa nuu áá nɛ́ɛ́ Ngalá tɔ́ni kɛ́ ná a maa ló ngáá ỹɔw̃ɔ́ ỹɔ́w̃ɔ kɛ ná ná áá ɣɛ́, kɛ Ngala tɔ mu volu aáva kɛ ngi lóngi aa gɛɛlɛngɔ́ péle h̃u.

¹³Mu kɔ́lɔ ngáá mu báhangɔɔ lé Ngála mba aáva Ngalá bɛ́lɛ nɔ kpahangɔ́ mu wa sífaa i kɛngɔ́ ngáá háwu ngi Hɛ́ɛ́ma Ỹínangi í ɣɛ́ mu volú.

¹⁴Ní ngi H̃íỹɛndou Loí lɔ́nga, niỹá vá náá nde nungáá w̃a ngáá Kɛɛɣɛí Ngalá i ngi H̃íỹɛndou Loí lɔ́vengɔ ngáá ná í ɣɛ́ ngáá Ngumaawó Mɔ́i ngeleí sí wu.

¹⁵Nuí fíli áá ndé ngáá Jísu lɔ í ngáá Ngalángi H̃íỹɛndou Loí kɛ maa w̃ɔ́i báhangɔɔ lé Ngalá mbá Ngalá bɛ́lɛ nɔ́ kpahangɔ́ maa w̃ɔ́i wa.

¹⁶Niỹa gíte vá ní ndóngi sí wɔ́lɔ í Ngála ngéya mu haáw̃a aáva ni langɔ́ɔ́ lé la. Ngalá tɔ ngáá ndo mɔ́ɔ́. Nuí fíli pá ndo ngáá ɣɛ́ ndií h̃u kɛ maa w̃ɔ́i báhangɔɔ lé Ngalá mba Ngalá bɛ́lɛ nɔ kpahangɔ́ maa w̃ɔ́i wa.

¹⁷Ná vá tɔ í kɛ́a Ngalángi lóngi mu haáw̃a áá gɛɛlɛngɔ́ pele h̃u kɛinɔɔ́ ndúwa fíli álaa ɣɛ́ mu h̃u folói ná w̃a Ngalá ngáá va nuu kpɛ́lɛɛ kɔ́sɔma, bɔw̃álale, a muỹá lɔ́ɔ lɛɛh̃úi h̃uuhíya ngeleí sí wu kíya nɔ́ɔ Jísu Kílisitii áá ngi ndái h̃uuhíya.

¹⁸Nduwá fíli áá ndo su, Ngalángi lóngi áá gɛɛlɛngɔ́ pele h̃u aa kɛ ngáá háwu nduwá í gúla nuu h̃ú. Faa báma lándai nuu w̃a aá lɔ áá ndúwai vu nuu h̃u. Ná nuu áá ɣɛ áá lúwa, ná lɔ́ áá ngakɛ́ ngáá kɛ Ngalángi lóngi i gɛɛlɛngɔ́ pele h̃u.

¹⁹Ndongí lɔ́ mu liítii sú bɔw̃álale Ngalá hése tɔ í lóngɔ ngáá mu ye.

²⁰Ná nuu áá ɣɛ́ ta, “Ndóngɔɔ lé ngáá Ngála,” kɛ́ sílimai í maa w̃ɔ́i lií h̃u ngí mbála Yalá fɛ́li mɔ́i hááw̃a, kɛ aá lɔ́ ngáá ndɛɛ gɔ́ɔ́la mɔ́ɔ́ sífaa ɛi lo ngáá Ngála lɛí áá nɛ́ɛ́ tɔní nápa ná ɛ́i ɣɛ́ loi ngáá ngi mbála Yalá fɛ́li mɔ́i lɛ́i áá tɔ.

²¹Savaí Jísu Kílisitii í féngɔ mu yaá aá wáa ngáá sí, nuí fíli áá ɣɛ́ loi ngáá Ngalá, kule lɔ́ ma í ló ngáá ngi mbála Yalá fɛ́li mɔ́i.