Read Bandi NJƆÚ HESENDAA GƆLƆÍ 5 Bible Online

NJƆÚ HESENDAA GƆLƆÍ 5 - Bandi bible

NJƆÚ HESENDAA GƆLƆÍ 5

¹Nuí fíli áá ɣɛ́ lái la ngáá kɛ Jísu lɔ í ngáá Ngalángi Lókolo Mbá W̃ɔ́i, maa w̃ɔ́i lɔ ngáá Ngalángi lóu. Nuí fíli pa ndóngɔ áá ɣɛ́ la ngáá Kɛɛɣɛí Ngála kɛ maa w̃ɔ́i longɔ́ɔ́ lé ngáá ngi léngaitii bɛ́lɛ.

²Sí a maa ɣɛ́ kɔ́lɔ mbá ngáá a mu longɔ́ɔ́ lé ngáá Ngalángi léngaitii aá wáa ngáá, ná mú longɔ́ áá ɣɛ́ la ngáá Ngalá, a mu golóngɔ ngi hávaitiini mbu.

³Mu lóngi Ngála fááw̃a aá waa ngáá kolói maa mbo ngi hávaitiini mbu. Ngi hávaitiini pa ti bangɔ́ wála laa le mu híya fááw̃a ngáá ti ye,

⁴bɔw̃álale Ngalángi léngai ti yilá ngílangi fíli ngakpá tɔ́ ti yaá ngeleí sí wuu háá ỹɔítii mááh̃u. Ndangí maa ɣɛ́ su ngáá Jísu aá lɔ í ngáá mú yákpangi áá kɛ mú hómbo mú bɔ́wɔ h̃uuhóu ngeleí sí wuu haa ỹɔítii ngeyá.

⁵Nuí áá hómbo í bɔ́wɔ h̃úuhou ngeleí sí wúu háá ỹɔítii ngeyá, maa w̃ɔ́i waa ngáá nuí sí ndángɔ áá ɣɛ́ lá la ngáá Jísu lɔ í ngáá Ngalángi H̃íỹɛndou Loí.

⁶Jísu Kílisitii sí lɔ í vááni ngeleí sí wu. Aáva faa sáángɔ lɔ na taa faa yákɛ kɔwɔ́ato Jísu vaalái wa aáva tiyá lɔ woo h̃u. Tiyá wáa ngáá, njɛi ná í ngúyai w̃ááhɔlɔni la, ɛ́ɣɛ ngi yááw̃ɔi í vúni ná tí pááni ɛ́ɣɛ Hɛ́ɛ́ma Ỹínangi. Aa ɣɛi nɔ́ɔ léi ngáá njɛ yílaa kɛ́ njɛíni ngáá ŋaaw̃ɔí ti ɣɛ́i na. Aáva Hɛ́ɛ́ma Ỹínangi gíte aa maa hái yakɛ́ kpál̃au ngáá kɛ tɔɔỹaá le bɔw̃álale Hɛ́ɛ́ma Ỹínangi lɔ ngáá tɔɔỹaá w̃ɔ́ɔ.

⁹Ná nuu búsa ɣéle ná áá hééle woo le faa h̃u, mú lá la, kɛ aa maá lá ngáá Ngalángi ndá hééle woí ngwála. Hééle woí vá tɔ Ngalá ngáá ndé kɔwɔ́ato ngi H̃íỹɛndou Loí wa.

¹⁰Nuí fíli áá ɣɛ laí ngáá Ngalángi H̃íỹɛndou Loí, kɛ maa w̃ɔ́i langɔ́ɔ́ lé ngáá hééle woí sí. Kɛ́ nuí fíli ɛ́i ɣɛ́ lái la, kɛ i Ngalá kɛ́nga ngáá ndɛɛ w̃ɔ́ɔ́ bɔw̃álale maa w̃ɔ́i ɛi ɣɛ laí ngáá hééle woí sí Ngalá ngáá nde kɔwɔ́ato ngi H̃íỹɛndou Loí wa.

¹¹Hééle woí sí vá Ngalá ngáá ndé áá wáa ngáá sí, Ngalá ngi kúnafɔ lɛ́ɛ́h̃ui héa mu yɛ, aáva a maá mááhɔlɔ ngi H̃íỹɛndou Loí w̃áa véle w̃a.

¹²Nuí fíli taá Ngalángi H̃íỹɛndou Loí ti háá áá ɣɛ́ su yíla, kɛ maa w̃ɔ́i lɔ náa kúnafɔ lɛ́ɛ́h̃ui h̃u, kɛ́ nuí fíli taá Ngalángi H̃íỹɛndou Loí ti háá ɛ́i ɣɛ su yíla, kɛ maa w̃ɔ́i aa kúnafɔ lɛ́ɛ́h̃ui h̃u.

¹³Nyá lɔ́ɔ kɔlɔí sí vɔ́nɛ wú yéle wɛ́i wú lángɔ ngáá Ngalángi H̃íỹɛndou Loí kɛinɔɔ́ wú ɣɛ́ kɔ́lɔ ngáá kɛ kúnafɔ lɛ́ɛ́h̃ui lɔ wu hááw̃a.

¹⁴Nduwá ndúwa ngáá mu h̃u Ngalá kákala bɔw̃álale mú súúwɔlɔ kpál̃au ngáá ná á maá fɛlí ŋani fíli fááw̃a áá ɣɛ́ ngáá ndiivo fáá aa mu woo ỹɛ́ni.

¹⁵Ná mú kɔ́lɔ ngáá aa mu woo ỹɛ́ni ná máa fɛ́li faa fíli fááw̃a, kɛ a maá ɣɛ́ kɔlɔ́ ngáá mu maahɔ́lɔnga.

¹⁶Ná nuu fíli áá ngí mbála Yalá fɛ́li mɔ́i lɔ í wáá faa ỹɔ́u ɣɛ́ ngáá ɛ́i wála kúnafɔ lɛ́ɛ́h̃ui w̃a, maa w̃ɔ́i í Ngala fɛ́li faaw̃a aáva Ngalá ngáá ngi mbála Yalá fɛ́li mɔ́i ná gúnafɔ lɛɛh̃uí w̃ááɣawo. Nyá lɔɔ yɛ́pɛ kɔwɔ́ato faa ỹɔ́i sítiini mbá nuu áá ti ɣɛ ɛ́i wála kúnafɔ lɛ́ɛ́h̃ui w̃a. Faa ỹɔ́i lɔ́ ná áá kɛ ngáá háwu nuu áá wála kúnafɔ lɛ́ɛ́h̃ui w̃a. Ngáá ndéma ngáá maa w̃ɔ́i í Ngala fɛ́li maa háá ỹɔí ná hááw̃a.

¹⁷Faa fíli nuu áá kɛ ɛ́i ɣɛ́ péle w̃a aá lɔ́ ngáá faa ỹɔ́u kɛ́ faa ỹɔ́u lɔ́ na ɛ́i kɛ ngáá háwu nuu ɔ́ɔ́ wála kúnafɔ lɛ́ɛ́h̃ui w̃a.

¹⁸A mú súúwɔlɔ ngáá nuí fíli í ngáá Ngala ndóu ɛi ndi nɔ́ɔ ngu ma ngáá faa ỹɔ́u ɣɛ́ndaa bɔw̃álale Ngalángi H̃íỹɛndou Loí aa maa w̃ɔ́i w̃ááh̃u béle aáva nuí síí w̃ɔ́i taa ɣɛ́ ma Nyaama W̃ɔ́i ɛi hómbo ɔ́ɔ́ faa fíli kɛ́ ngáá maa w̃ɔ́i.

¹⁹A mú súúwɔlɔ ngáá muỹá lɔ́ ngáá Ngalángi ndá núngaa aáva mu súúwɔlɔ ngáá nungáá vékaitii kpɛ́lɛɛ tí ngeleí sí wu tiyá lɔ́ Nyaama W̃ɔ́i wu.

²⁰A mú súúwɔlɔ ngáá Ngalángi H̃íỹɛndou Loí i vaangá ngeleí sí wu aáva i kɛ́a ngáá háwu mú ɣɛ́ ngáá faa yatɔ́ mba mbélaa kɛinɔɔ́ mu ɣɛ́ Ngalá kíte wɔlɔ́ ngáá ele gíte waa ngáá laá. Aáva a mu háá aa ɣɛ su yíla maá Ngalá kíte, sífaa maá ngí H̃íỹɛndou Loí Jísu Kílisitii mu háá lɔ su yíla. Jísu vá tɔ í ngáá Ngalá kítei ɛ́ɣɛ kúnafɔ lɛ́ɛ́h̃ui hé mɔ́i.

²¹Wɛ́i wú ngáá ní léngaa Ngala fái h̃u, a waa báha kpahá faa fíli mba kɔ́wɔ í tóngɔ kɔɔ kɔɔ́ ŋáni[1] haa wa taa ti yeɣé ngáá ngalángaa.