Read Bandi NJƆÚ GƆ́LƆI HELE KÉLEI 1 Bible Online

NJƆÚ GƆ́LƆI HELE KÉLEI 1 - Bandi bible

NJƆÚ GƆ́LƆI HELE KÉLEI 1

¹Nyɛ́i ngí ngáá ngutuwɔ́ w̃ɔ́i Ngala fɛ́li mbélaitii fááw̃a, nyá lɔ ngáá kɔlɔí sí vɔ́nɛ í yéle waa í léngaitii yɛ́i yí ngáá nyáh̃apoi sí[1] Ngalá ngí lókolongɔ í wá. Ndóngɔɔ lé ngáá wu kpɛ́lɛɛ ngáá tɔɔỹaá. Ngílaa laa le nɔ́ɔ kɛ́ sítii kínɛi tí tɔɔỹái wɔlɔ́ tiyá bɛ́lɛ ti longɔ́ɔ́ lé ngáá wú ye,

²bɔw̃álale, Ngala tɔɔỹái lɔ mu h̃u aáva kúnafɔ aa lo mu h̃u.

³Bɛlɛ́ Kɛɛɣɛí Ngalá ɛ́ɣɛ ngí H̃íỹɛndou Loí Jísu Kílisitii ti háá bɔwɔ́i, ti yááh̃u w̃aaw̃aanuí, ná vólu, ti lííhei ti ɣɛ́ mu yɛ, muỹɛ́i máá híya ngáá tɔɔỹái ɛ́ɣɛ ndo pélei.

⁴Kóóh̃u í nɛɛní ngwála ná ngí ɣɛ́i faa wɔ́lɔ mba ngáá wú léngaitii ti lɛ́ingaa tiyá lɔ́ɔ híya ngáá Ngalá tɔ́ɔ́ỹaa veleí kíya nɔ́ɔ́ mu Kɛ́ɛ́ɣɛ Ngalá í ndéngɔ mu w̃a ngáá mu ɣɛ́ máa kɛ.

⁵Faale, nyah̃ápoi, nyá lɔ́ɔ́ ndé náá í w̃a ngáá mu kpɛ́lɛɛ mu ló ngáá ỹɔw̃ɔ́ ỹɔ́w̃ɔ. Ná aa ngáá sava niiná ngɔ́ɔ́ ɣɛ́ ngáá ndá múl̃ɔ í yáa, laá lɔ́ nɔ́ɔ í ngáá savaí sí a mú maahɔ́lɔni wɔ́lɔ tɔkúla héimai.

⁶Ndongí sí ngíwaa yɛ́pɛ mba aá waa ngáá kolóngi a maa ɣɛ́ su Ngalángi hávaitiini mbu. Aáva savaí sí va kíya nɔ́ɔ wɔ́ɔ́ mɛni wɔ́lɔ tɔ́ɔ́ nde wú w̃a tɔ́kula héimai aá waa ngáá sí, a mú lɛɛh̃úi h̃uuhíya ndo sú.

⁷Nungáá bíh̃iw̃aa taa núngaa híɣe tɔɔỹaá veleí wa tiyá lɔ náá ngeleí sí wu, tiyɛ́i taá tí gálambongi wó ngáá Jísu Kílisitii aa ɣɛi ngáá nuu búsa ná h̃u í vááni ngeleí sí wu. Nuí fíli áá ná le, maa w̃ɔ́i lɔ ngáá ngakpolówa mɔ́ɔ áá nuu híɣe tɔɔỹaá vélei wa, ná vólu, maa w̃ɔ́i lɔ ngáá Kílisitii wááhilima w̃ɔ́ɔ́.

⁸Faale, a w̃aah̃ú béle gíte ngáá pangɔ kɛinɔɔ́ wɔ́ɔ́ va wála sí w̃a ni yéngenga ma ɛ́ɣɛ wú kúlasuunumai w̃aahɔ́lɔ ngáá ngafɔ́ningɔ.

⁹Nuí fíli ɛ́i ɣɛ́ ndíi ngu ma ngáá kalambongí sí Kílisitii í mbóngɔ, kɛ́ áa ɣéle í ta báha mba, kɛ maa w̃ɔ́i taá Ngála ti háá aa su yíla. Nuí fíli pá áá ɣɛ́ áá maa gálambongi séɣe héɣe mbó nɔ́ɔ kɛ maa w̃ɔ́i taa Kɛɛɣɛí Ngála ɛ́ɣɛ ngi H̃íỹɛndou Loí ti háá lɔ su yíla.

¹⁰Nuí fíli áá vá wú yéle áá kalambo péka wo í síɣe sí wa Jísu Kílisitii í mbóngɔ, waá láali maa w̃ɔ́i w̃a kɛlaa wɔ́ɔ́ lókohei mbu wú vɛ́lɛ wu,

¹¹bɔw̃álale nuí fíli áá lókohei maa w̃ɔ́i wu, kɛ í bahaá mba ngi háá ỹɔí ná ɣɛ́ndaa h̃u.

¹²Faa bíh̃iw̃aa lɔ́ na kule í má ngí ndé wú w̃a. Kɛ́ ngáá lói ngɔ́ɔ́ ló tí vɔ́nɛma kɔlɔ h̃u wú yéle, kɛ́ ndóngɔɔ lé ngí vá a mu yɛ́pɛ lowah̃u maa wúyeni kɛinɔɔ́ mu góóh̃unɛi álaa gɛ́ɛ́lɛ pele h̃u.

¹³Í ndéɣei[2] lɛ́i Ngalá ngí lókolongɔ mba, ngí léngaitiini tí hááni wú w̃a.