Read Bandi NJƆÚ GƆ́LƆI HAWA KÉLEI 1 Bible Online

NJƆÚ GƆ́LƆI HAWA KÉLEI 1 - Bandi bible

NJƆÚ GƆ́LƆI HAWA KÉLEI 1

¹Nyɛ́i ngí ngáá ngutuwɔ́ w̃ɔ́i Ngala fɛ́li mbélaitii fááw̃a, nyá lɔ ngáá kɔlɔí sí vɔ́nɛ í yéle, Gééyɔ, yɛ́i yí ngáá ní mbála vandái, ndóngɔ ngáá í ye ngáá tɔɔỹaá.

²Mu mbála vandái, nyá lɔ́ɔ Ngala fɛ́li ngáá í lúwu h̃ú wúyangɔ í ɣɛ́ lá aáva í ndí ngu ma, ná vólu, faítii kpɛ́lɛɛ tí ndí ngu ma ngáá pangɔ́ ngáá í ye kíya nɔ́ɔ yáa lɛ́ɛ́h̃ui h̃uuhíya ngáá pangɔ́ Ngala fái h̃u.

³Kóóh̃unɛɛngɔ wála i ɣɛi lá ná a mu mbála Yalá fɛ́li mbélai ti lɛ́ingaa tí fóloni mbéinda, tí ndé má kíya yíwaa híya nɔ́ɔ ngáá Ngala tɔ́ɔ́ỹaa veleí.

⁴Faa fíli áa ná ɔ́ɔ́ kóóh̃unɛɛ ɔ́ɔ́ lɔ́ve sí wá ngáá ngíwaa mɛ́ni ngáá sítiini tí ngáá ní léngaa Ngala fái h̃u tiyá lɔɔ híya ngáá Ngala tɔ́ɔ́ỹaa veleí.

⁵Mu mbála vandái, sí kule í í w̃a yí kɛ yá lɔ́ɔ kɛ mu mbála Yalá fɛ́li mbélai sítiini mbɛ́ kíya bɛ́lɛ ti ngáá sotángaa.

⁶Ndongí yí su ngáá ti ye tí súúɣɛngɔ ngáá Ngala fɛ́li mbélaitii ti mbéinda. Bɔ́ kái tí wa tí ndí ngu ma ngáá ti Yála ngenge siyangí tí su kíya Ngalá ndóngɔ nɔ́ɔ yí kɛ ti yɛ.

⁷Sífaa, siyangí sí tí su tiyá lɔ́ɔ mbo Jísu Kílisitii hááw̃a, taá kɛ́ngɔ tɔɔ́ lókohei ŋani fíli mbú áá gúla nuu yáa áá ngáá Ngála fɛ́li mɔ́ɔ.

⁸Faale, kule lɔ́ mú w̃a a muỹɛ́i mu ngáá Ngala fɛ́li mbélaitii a mú lóko bɔ tí wa kɛinɔɔ́ a mu lɔ́ngɔ á mu ɣɛ́ ngáá ngengengí sí wó mbélaa, ná wáa ngáá, Ngalángi lɔ́ɔ́ỹai léndai.

⁹Ngí kɔ́lɔ h̃úú lukpu gulo vɔnɛní Ngala fɛ́li mbélaitii ngéle tí na. Kɛ́ Dayatɔ́fi, lɛ́i ndongɔ́ ngáá bɔwɔ́ gúlandaa ngáá ngutuwɔ́ w̃ɔ́ɔ́ Ngala fɛ́li mbélaitii fááw̃a, ɛi kɛ ɔ́ɔ́ wóliɣɛ faa fíli má naá nde, kɛlaa ɔ́ɔ́ híya la.

¹⁰Kɛ́ ná náá ngáá ɣɛ́ vaaní, sí kínɛi í kɛ́a ngáá kpɛ́lɛɛ kúla náá kɛlɛ́ma. Ná wáa ngáá, faa ỹɔ́u wála walaítii áá ɣɛ́ áá nde kɔwɔ́ato ni wa ɛ́ɣɛ ndɛ́itii áá ɣɛ áá kɔ́ɔ́la. Kɛ́ sí ɣéle tɔ áá kɛ, ná ɛ́i ndiilá, aá ɣéle p̃ɛ́ɛ́ mu mbála Yalá fɛ́li mbélai tiyɛ́i tí Ngala ngénge siyangí h̃u ɛi kɛ ɔ́ɔ́ lókohei ti wu. Sítii kele tɔ taa ɣɛ́ tí lókohei ti wu, aa ti betéve ná wa. Aa ɣɛ p̃ɛ́ɛ́ áá yákpa ngáá í nátii kula Ngala fɛ́li mbélaitii mba.

¹¹Mu mbála vandái, yálaa suw̃a suw̃ama wó faa h̃ú ɛ́i ɣɛ́ péle w̃a kɛ́ suw̃a suw̃ama wó faa h̃ú áá ɣɛ́ péle w̃a. Nuí fíli áá ɣɛ́ áá faa ɣɛ́ pangɔ́ áá ɣɛ la maa w̃ɔ́i lɔ Ngalá fááw̃a. Kɛ́ nuí fíli pá áá ɣɛ́ áá faa ỹɔ́u ɣɛ́ kɛ maa w̃ɔ́i áá nɛ́ɛ Ngalá kɔ́lɔ ngáá ele gíte waa ngáá laá.

¹²Nungáitii kpɛ́lɛɛ taá ɣɛ́ taa yɛ́pɛ ngáá pángɔ kɔwɔ́ato Damítiyɔ wa, aáva kíya íwaa híya ngáá Ngala tɔ́ɔ́ỹaa veleí aá lɔ́ áá ngákɛ ngáá kɛ tɔɔỹaá lé. Niỹá bɛ́lɛ nɔ naá yɛ́pɛ ngáá pangɔ́ kɔwɔ́ato mba, wáá vá wú kɔ́lɔ nɔ́ɔ ngáá sí náa nde tɔɔỹaá le.

¹³Faa bíh̃iw̃aa lɔ́ na kule í má ngí ndé wú w̃a. Kɛ́ ngáá lói ngɔ́ɔ́ ló tí vɔ́nɛma kɔlɔ h̃u wú yéle,

¹⁴kɛ́ ndóngɔɔ lé ngí vá h̃úmbuwa a mu yɛ́pɛ lowah̃u maa wúyeni. Bɛlɛ́ Ngalángi lííhei í ɣɛ́ wú yɛ́. A mu mbála Yalá fɛ́li mbélai kpɛ́lɛɛ tí hááni wú w̃á. Ngí há mu mbála Yalá fɛ́li mbélaitii kpɛ́lɛɛ má ngáá ngilá ngíla.