Read Bandi JÚU 1 Bible Online

JÚU 1 - Bandi bible

JÚU 1

¹Nyɛ́i ngí ngáá Júu, ngi ngáá Jimisí ndéɣei ɛ́ɣɛ Jísu Kílisitii yénge mɔɔ, nyá lɔ́ ngáá kɔlɔí sí vɔ́nɛ wú yéle wɛ́i Kɛɛɣɛí Ngála ngí wú lólingɔ ngáá wú ɣɛ ngáá Ngala fɛ́li mbélaitii. Ná wáá ngáá, wɛ́i Ngalá ndóngɔ ngáá wú ye aáva Jísu Kílisitii áá wu w̃ááh̃u béle.

²Bɛlɛ́ Ngalángi yááh̃u w̃aaw̃aanui ɛ́ɣɛ ngi lííhei ɛ́ɣɛ ngi lóngi tí ɣɛ́ wú yɛ́ ngáá ngambɔ́ɔ́lɔngɔ.

³Mu mbála vándaitii, ngí ɣɛ́ngɔ loí ngi kɔlɔ vɔ́nɛ wú yéle kɔwɔ́ato ngumaawóngi wá mú maahɔ́lɔngɔ. Kɛ́ aa ɣéle, faa ta i kɛ́a náa nyá lɔ́ɔ pɔ́nɛ náa ngáá ngí wú lííwuulɛ kɛinɔɔ́ wú ló kpáŋ sí w̃aaɣáwondai h̃u mu langɔ́ la. Ná wáá ngáá Ngala ndaa wói í féni wɔ́lɔ su yíla kpé ngi vóngaitii ngeyá.

⁴Nungáá lɛ́ingaa tiyɛ́i taa Ngalá fááw̃a tí vílinga wú gúúwui h̃u wáá faa wɔ́lɔ mba. Tiyá lɔ́ɔ Ngala kééla woí ɣɛ́ kíli ỹaaní kɔwɔ́ato Ngalángi háá bɔwɔí wa. Tiyá lɔ́ɔ ndé ngáá kɛ Ngalá kɛ́ɛ́hɔ pángɔɔ lé, faalɔ, aa ngáá faa ỹɔ́u ná nuu áá kɔ́lɔsiya mbo. Nungái sítii taá lokohéima Jísu Kílisitii wu lɛ́i í ngáá mu W̃ááliɣi yiláá kpéngi ɛ́ɣɛ mu Lemɔ́i. Ngala Kɔ́lɔi í yɛpɛngɔ́ wɔ́lɔ kpɔ́lɔɔ faa bámai wa nungái sítii táá vá ngeɣéma.

⁵Kíya bɛ́lɛ wú faa wɔ́lɔ sí wa kílii, a giséi sí w̃a í ɣɛ́ni Ísulɔ yeláitii mbɛ ná Ndemɔí Ngala í tí w̃ááɣawoni nungái sítiini ngeyá taa ɣɛ́ tí w̃a Íjepiai. Ísulɔ yélai tí lɛ́ingaa taá ɣɛ́i laí ngáá Ngalá kpósouŋ aáva Ndemɔí Ngála ngí sítii tí háá h̃uuvuni taa ɣɛ́i laí la.

⁶A giséi sí w̃a múl̃ɔ í ɣɛ́ni ngáá malékai sítiini taá kɛ́ni tɔɔ ló ti ndá yéngemaitii ngáá tɔɔ́ tí ndá yéngengaitii mbo ɛ́ɣɛ tí lokogúlani mbéi haa h̃u ti ɣɛ́i na. Aáva Ngalá ngi ti vuní njɔwɔ́itii nga kúnafɔ faaw̃a kpindi h̃u ngáá ti lo ná, í ló su í fólo kɔsɔ́ fólo wálai w̃a.

⁷A giséi sí w̃a í ɣɛ́ni ngáá taa walá wálai sítii tɔ́ɔ́ ti lolí ngáá Sɔ́dɔu ɛ́ɣɛ Gɔmɔ́lɔ ɛ́ɣɛ ti béla láitii suu yélaitii tiyɛ́i ti yaá háa wálai í ɣɛ́i nɔ́ɔ ngáá kɔlɔsiyángi ɛ́ɣɛ njɔlɔ haítiini. Ti ɣɛ́i ngáá kɛ kíya nɔ́ɔ malékai nátii ti ɣɛ́i na. Nungái nátii tiyá lɔ́ maanɔw̃ɔ́ h̃u kúnafɔ wɔ́mbui h̃u, ná vá tɔ í ngáá tɔmaseí a mu haáw̃a.

⁸Nungái sítii ti vílinga wú gúúwui h̃u taa híya ngáá ti h̃íŋal̃aitii taá mbó, ná vá tɔ áá tí ɣɛ kíli ỹaaní kíya nɔ́ɔ í ɣɛ́i ngáá nátii ngí yɛ́pɛngɔ ti wa. Tɛ́i Ngala tɔ yaah̃ú kulo bɛ́lɛ, ná vólu, taá ngelegóóh̃u w̃álekaitii suuhaláta.

⁹Ngutuwɔ́ w̃álekai ná ɣéle tɔ taa ɣɛ́ ma Maikɔ aa ngoo ỹɔ́u ỹɔ́u ndení Ngutuwɔ́ Ỹína Nyɔí w̃a ná táa láa ti ɣɛ́i taá laahasa Muusé vuw̃aí hááw̃a. Sí nɔ́ɔ́ léikei í ndéni ma, i ɣɛi ngáá sí í ɣɛ́i ma, “Ndemɔí Ngala ngáá faa bá ndá í w̃a!”

¹⁰Kɛ́ nungái sítii taa faa fíli suuhaláta tɛ́i ngátɔ mba. Ti gulangɔ́ɔ́ lé ngáá ndɔbɔ huwáa sí ɣéle tɔ tí faa wɔ́lɔ mba kulo aá lɔ́ áá ti ɣɛ kíli ỹaaní.

¹¹Suu lɔ vá ɣɛ́ma ỹɔ́u ti w̃a ngwala. Sífaa, siỹɛndópoi sí tɔ́ɔ́ ɣɛ́ ma Kíŋ, ti tuva veléi yangéɣenga. Kápa mɔnii i kɛ́a ti hítɛnga nɔ́ɔ jɔ́ kaka pélei sí wa siỹɛndópoi sí tɔ́ɔ́ ɣɛ́ ma Béél̃ɔ í ɣɛ́i mba. Tí lóa Ngála ndaa wú kíya nɔ́ɔ siỹɛndópoi sí tɔ́ɔ́ ɣɛ́ ma Kɔlɔ í kɛ́ni aáva ti haa h̃uu lɔɔ vú kíya nɔ́ɔ í ɣɛ́i ngáá kɔlɔ bútei.

¹²Ná wáá ɣɛ́ wáá wú Yála fɛ́li ndááỹɛngi wo, nungái sítii kulangɔ́ɔ́ lé ngáá ỹandáá bɔíŋngɔ áá ɣɛ́ la wú lááỹɛ mbo máa. Tɛí gísiya ngáá nungáá vékaa kulo bɛ́lɛ, ti wúfe talángɔɔ lé. Ti beɣéngɔɔ lé nɔ́ɔ ngáá bɔwɔ. Ti gúlangɔɔ lé nɔ́ɔ ngáá njɛ bilíí fɛfɛngí áá ɣɛ́ áá maa lúkpe, kɛ́ ɛi wa. Ti gúlangɔɔ lé ngáá ngulúitii tɛ́i wá ti wa sɔ́wɔi ɔ́ɔ́ bɔ́ɔ́ folo ma. Ti gúlangɔɔ lé múl̃ɔ ngáá ngulúitii taa ti vulúkula í báha ti hápei kpɛ́lɛɛ mbá tí há pɔ́.

¹³Ngufe tálai í ti h̃u kɛɛlɛ́ ngáá mba kíya nɔ́ɔ njɛí áá ɣɛ́ áá lúndɛ ngí húúlengi áá lɛ́nga. Ti gúlangɔɔ lé ngáá temúleɣai áá ɣɛ́ káka su, Ngalá ngáá ɣɛ ỹanda bátɛni mbɛ kpindí wála h̃u áá ɣɛ́ na kúnafɔ.

¹⁴Siỹɛndópoi sí tɔ́ɔ́ ɣɛ ma Íínɔ, Ádau í ɣɛ́i ngáá ngi káwala wɔ́lɔ í Ngalá ndáa háá léni kɔwɔ́ato nungái sítii mba, í ɣɛ ta, “A wɔ́lɛ lɛɛ! Ndemɔí lɔ́ɔ́ vá ngáá tasu bih̃i kpih̃i hɛ́ɛ́ma w̃álekaitii su

¹⁵ngáá i nuu kpɛ́lɛɛ kɔ́sɔ. Aa lɔ́ɔ vá sítii kpɛ́lɛɛ mbaalévema taá Ngala faaw̃a ngáá taá velei faa ỹɔ́i nátii kpɛ́lɛɛ fááw̃a ti kɛ́ngɔ ɛ́ɣɛ ngoo ỹɔítii kpɛ́lɛɛ faa ỹɔ́u yélai tí ndéngɔ kɔwɔ́ato mba, í fáa bá nda ti w̃a.”

¹⁶Nungái sítii tiyá lɔ́ nɔ́ɔ fɔ́ wúsubɔɔlɔma aáva taá ɣɛ́ múl̃ɔ taá núngaa baalɛ hóu. Nungái sítii kpɛndɛngɔ́ɔ́ lé nɔ́ɔ ti liivó fáá ỹɔítii ma. Tiyá lɔ́ nɔ́ɔ fɔ́ taa yonga téve, táá nungáá lɛ́nga kɛinɔɔ́ sí tí longɔ́ la tí maahɔ́lɔ ti yaá.

¹⁷Kɛ́ wɛ́i wú ngáá mu mbála vandáitii, a gísei sí w̃a mu Lemɔ́i Jísu Kílisitii géélaitii tí ndéni wú w̃a wɔ́lɔ ngáá áá lɔ́ɔ́ va ɣɛ́ma.

¹⁸Tí ndéni wú w̃a, ti ɣɛ́ ta, “Ngetéyangi yákɛɛlɛmai, nungáá tiyá lɔ́ɔ́ vá vaamá taá ngɛ́lɛ gúla wú h̃ú, tiyɛ́i ti beɣéngɔ ngáá ti liivó faa ỹɔítii nɔ́ɔ.”

¹⁹Tiyá lɔ taa vá ngáá ngoo yátɔ tálai wú liiwaa, taa gísiya nɔ́ɔ ngáá ngeleí sí wuu haítii aáva Hɛ́ɛ́ma Ỹínangi áa ti volú.

²⁰Kɛ́ wɛ́i wú ngáá mu mbála vandáitii, hɛ́ɛ́ma lángi í wú h̃u í ló wú h̃u, í wú h̃úúba kpé wú híya velé h̃u. A waayaa Ngala fɛ́li Hɛ́ɛ́ma Ỹínangi yákpangi h̃u.

²¹Ngalángi lóngi í su ngáá mu ye mu lúva veléi í kɛ í ndi ngu ma. Waayaa Ndemɔí Jísu Kílisitii luwɔɔ́ béle ngáá í vá ngáá kúnafɔ lɛ́ɛ́h̃ui mu yɛ sífaa, aa lɔ ngáá ngaah̃u w̃aaw̃aanú w̃ɔ́ɔ.

²²Sítii tí wú lííwaa taá nɛ́ɛ́ loí kɔ́wɔ yiláá nga Ngala fái h̃u, a ti h̃úúhou kíli wo ngáá pangɔ́.

²³Ti lɛ́ingaa lɔ saa velé w̃a táá lí njahááma wɔ́mbui h̃u, a ti w̃ááɣawo tɔ́ɔ́ va lí ná. Ɛ́ɣɛ maanɛ́ɛ́ngɔɔ lé waayaa ti lɛ́ingaa yaah̃u w̃ááw̃aanu hóu kɛ́ a w̃aah̃ú béle ngáá ti háá ỹɔí ta vo kúlo kéle tɔ álaa híya wú w̃a.

²⁴A mú mu Yála ngiláá kpéngi lɛ lɛ́i í ngáá mu Wúmaawo Mɔ́i! Aa kɛ ngáá háwu a mɔ́i gúla ngi hái h̃u, aáva a mu w̃ááw̃uỹangɔ aa ɣɛ lá fó faa ỹɔ́i yáa, ná vólu, mu ɣɛ́ kooh̃unɛɛ h̃u ndoow̃á ngi háá w̃aanɛɛnɛɛ ngwalaí h̃u. A mu Lemɔ́i Jísu Kílisitii w̃aa véle w̃a, bɛlɛ́ ndaaw̃áá í lɛ, ngufema í ɣɛ́ mbɛ, ná vólu, bɛlɛ́ ngi háá w̃aanɛɛnɛɛ ngwalaí, ngi yákpangi, ɛ́ɣɛ ngi w̃ásandaa walaí tí ɣɛ́i na wɔ́lɔ aáva tí na sí h̃úi, ti ɣɛ na kúnafɔ! Amíína.