Read Bandi FAA YÁKƐ KƆ́LƆI 1 Bible Online

FAA YÁKƐ KƆ́LƆI 1 - Bandi bible

FAA YÁKƐ KƆ́LƆI 1

¹Sítii pɔnɛngɔ́i kɔlɔí sí h̃u kɔwɔ́ í tóngɔ fáitii mba Jísu Kílisitii í ngákɛni. Ngala ngí fái sítii ngakɛ́ni ngáá Jísu Kílisitii ngáá í ngákɛ ngáá ngi yénge mbeláitii. Tiyá lɔ́ ngáá faa tá ngáá táá vá ɣɛ́ma h̃umbuwá. Aáva Jísu í ngi w̃álekai lɔ́veni ngi yénge mɔí Njɔú yéle ngáá í fái sítii ngákɛ la.

²Sí kínɛi pá Njɔú í súúlɔni, í tí lení. Sí vá tɔ í ngáá konángi kɔwɔ́ato kééla woí sí wa Ngala ngí pílini, Jísu Kílisitii í ngákɛni ngáá aá lɔ́ ngáá tɔɔỹáá.

³Aá lɔ́ ngáá faa vánda nuí sí w̃ɔ́i hááw̃a áá kɔ́lɔi sí gála. Aá lɔ́ mɔ́ɔ ngáá faa vánda sítii faaw̃a taá wólilo Ngala ndaa háá lé mɔ́ɔ woo vili ngói sí w̃á tí híya ngáá sítii kínɛi pɔnɛngɔ́i kɔlɔí sí h̃u, bɔw̃álale kuí h̃úú áá mɔ́ɔ gooh̃á sítii tí lengɔ́i kɔlɔí sí h̃u táá vá ɣɛ́ma.

⁴Nyɛ́i ngí ngáá Njɔú, nyáá lɔ́ɔ kɔlɔí sí vɔ́nɛ wú yéle wɛ́i wú ngáá Ngala fɛ́li kúúwu ngɔ́felangɔitii wu Ésiya lataí h̃u. Ngala lɛ́i í na kúnafɔ lɛ́i í ɣɛ́i na wɔ́lɔ ɛ́ɣɛ lɛ́i áa vá vááma, bɛlɛ́ ngi háá bɔwɔí ɛ́ɣɛ ngi lííhei ti ɣɛ́ wú yɛ́. Tí mɔ́ɔ́ gúla ỹína panda ngɔ́felangɔitii ngeyá tí ngi yéngengi h̃u ngi w̃ása kpɔkpɔngí gákala.

⁵Ɛ́ɣɛ mɔ́ɔ, ti gúla Jísu Kílisitii yáa lɛ́i í ngáá tɔ́wɔbaɣa héélei í ngáá hésendaa w̃ɔ́i Ngala ngí mbuyoɣéni sái h̃u, ɛ́ɣɛ lɛ́i í ngáá ngakpa mása ngwálai ndɔwɔlɔ́ w̃ásangaitii mááh̃u ngeleí sí wu. Jísu Kílisitii i loi ngáá mu ye, aáva í lɛɛhúi gúlani kɛlɛ́ma ngáá saáɣa haí í mbóni, í mú gúla faa ỹɔ́u ɣɛ́ndaa yakpangí wu.

⁶Jísu i mɔɔ mu ɣɛ́a ngáá saáɣa gúla mbélaa ngi w̃ásandai h̃u ngáá maayáá yénge maá tiyéni ngi Yálangi yɛ́, lɛ́i í ngáá ngi Kɛ́ɛ́ɣɛ. Bɛlɛ́ Jísu Kílisitii laaw̃áá í lɛ́ ngakpá ngí ɣɛ́ mbɛ kúnafɔ taá ngí ndá gúnafɔ! Amíína.

⁷A wolílo! Jísu Kílisitii lɔ́ɔ vá vááma njɛbilií ya. Nuu kpɛ́lɛɛ táa Jísu lɔ, í báha sítii kéle tɔ mba tí pááni. Aáva nuu kpɛ́lɛɛ taa wɔ́lɔ kɔwɔ́ato mba. Tɔɔỹaá h̃u ná lɔ́ɔ vá ɣɛ́ma. Amíína.

⁸Ndemɔí Ngákpa Ngála Ngwalaí lɛ́i í ná kúnafɔ lɛ́i í ɣɛ́i na wɔ́lɔ ɛ́ɣɛ lɛ́i áa vá vááma i ndéni, í ɣɛ ta, “Nyáá lɔ́ ngí ngáá hésendaa w̃ɔ́i faa kpɛ́lɛɛ tɔ́kula héimai ɛ́ɣɛ ngakɛɛlɛ́ mɔ́i.”

⁹Nyɛ́i ngí ngáá Njɔú, wú mbála Yalá fɛ́li mɔ́i, ɛ́ɣɛ mu báhangɔ Jísu Kílisitii wa, nyá lɔ́ mɔ́ɔ ngáá wú mbála ndiilɔlɔ́i sí h̃u múwaa kúla maanɔw̃ɔ́i sí h̃u múwaa ngéɣe sífaa mú Jísu Kílisitii w̃ásandai wu. Tí lííni ngáá ngé ndɔwɔlɔ́i sí w̃á táa tolí ngáá Patímɔ, maayelé mbélengɔ ngáá njɛí ti ndó na ngáá pelésina, sífaa ngí Ngála ngói lení Jísu í ngákɛni ngáá aá lɔ́ ngáá tɔɔỹáá.

¹⁰Ná í ɣɛ́i ngáá Tɛnɛ́mai, Hɛ́ɛ́ma Ỹínangi i vúni sú, kɛ ngí ngóó wála ỹɛ́ninga ngáá pólu véle kíya nɔ́ɔ taá búlu wála hɛ́.

¹¹Ngoí sí í léni ma i ɣɛi ngáá sí, “Sí vɔ́nɛ yáá naá lɔ, yí máá gɔ́lɔi lɔ́ve Ngala fɛ́li kúúwu ngɔ́felangɔitii su, tí taí sítii su taá ti lolí ngáá Ɛ́fɛsɔ, Símɛna, Pɛgɔ́mɔ, Tayatálɔ, Sadé, Feladɛ́fiya ɛ́ɣɛ Leyodésiya.”

¹²Kɛ́ ná ngí vóteni ngáá ngí nuí sí w̃ɔ́i lɔ í ɣɛ́i áá yɛ́pɛ ngéle, ngí tówa ngɔ́felangɔ lɔní kpatɛngɔ́ ngáá góóli lámbongai tí tí ya.

¹³Ngí ŋáni tá lɔ́ni lámbo tówa ngɔ́felangɔi nátii ndiiwáá kulangɔ́ ngáá nuú búsa, jogbongí í ma fólongɔ kɔwɔ́ ya, kilisúi yílingɔ ngáá góóli bɛtíí.

¹⁴Ngu ndeɣái wólengɔ i ɣɛi lá pé pé kíya nɔ́ɔ hɛ́mgbɛ wóle. Ngaah̃ú gɛ́hɛi i ɣɛi áá hólo kíya nɔ́ɔ ngɔ́mbu hóu.

¹⁵Kɔwɔí w̃aa í ɣɛ́i áá hólo míl̃a mil̃a kíya nɔ́ɔ́ góóli wuyangɔ́. Ngoí gúlangɔ i ɣɛi lá kíya nɔ́ɔ njɛ ááyaa lúndɛ ngwala.

¹⁶Temúleɣa ngɔ́felangɔ i ɣɛi hóuni ngísa lokói ya. Aáva mbowá hɔ́kpɔ yándiili ndái i mba féle i gúlai ndá. Ngaah̃úi i ɣɛi áá hólo kíya nɔ́ɔ foló yákpangɔ hólo.

¹⁷Ná ngí tɔ́ni, ngí lái kɔwɔ́ wú í ɣɛ́ nuu háángɔ ɣɛ kíli. I yísa lokói vɛ́lɛni má, i ɣɛ má, “Yaa lúwa! Nyáá lé, nyɛ́i ngí ngáá hésendaa w̃ɔí faa kpɛ́lɛɛ tɔ́kula héimai ɛ́ɣɛ ngakɛɛlɛ́ mɔ́i.

¹⁸Nyáá le, nyɛ́i ngí ndɛɛh̃úi h̃u! Sáángɔ i ɣɛngɔ lá, kɛ́ nyá lɔ́ mɔ́ɔ ndɛɛh̃ú h̃ú kúnafɔ fááw̃a. Ngakpá tɔ́ ngéya saa w̃ááh̃u ɛ́ɣɛ saa yelái ti ỹándai.

¹⁹Faalɔ, sítii yíwaa súúlɔ, kɔ́lɔ vɔ́nɛ kɔwɔ́ato ti wa, ná wáá ngáá, sítii táa ɣɛ́ náa ɛ́ɣɛ sítii táa vá ɣɛ́ma.

²⁰Sí lɔ́ í ngáá faa vólu hái kɔwɔ́ato temúleɣa ngɔ́felangɔitii mba yíwaa tí lɔ hói ngísa lokói ya ɛ́ɣɛ faa vólu hái kɔwɔ́ato góóli lowa ngɔ́felangɔitii mba. Temúleɣa ngɔ́felangɔi nátii tɔ maá tí lɔ mu gí ngí hítɛ maléka ngɔ́felangɔitii mba tí Ngala fɛ́li kúúwu ngɔ́felangɔitii faaw̃a. Góóli lowa ngɔ́felangɔi nátii tɔ maá ti lɔ mu gí ngí hítɛ Ngala fɛ́li kúúwu ngɔ́felangɔitii mba.”