Read Bandi FAA YÁKƐ KƆ́LƆI 11 Bible Online

FAA YÁKƐ KƆ́LƆI 11 - Bandi bible

FAA YÁKƐ KƆ́LƆI 11

¹Kɛ ti ngulú hénga ngéya kulangɔ́ ngáá suw̃á ngúlu ɣɛ́ kíli, tí ɣɛ ma, “Lí, yí Hɛ́ɛ́ma Yála Pɛ́lɛi ɛ́ɣɛ Ngala sááɣa gula tútui h̃úw̃a la. Ná vólu, yí sítii kpáɣa táa Ngala fɛ́li na.

²Kɛ́ yálaa Hɛ́ɛ́ma Yála Pɛ́lɛi góvii h̃úw̃a, bɔw̃álale Ngala ngí féngɔ sítii ngeyá táa ngáá ngí vóngaa, tiyɛ́i táa vá lóma Hɛ́ɛ́ma Láá Wálai w̃ááh̃u ngalú puu nááningɔ maah̃úú félengɔ láa lówah̃u,

³ná wáá ngáá, foló tásu ngilaa hɔ́ndɔ félengɔ puu ngɔ́hitangɔ (1,260) laá lówah̃u. Ná h̃úú vá tɔ́ ndáá háá lé mbélaa félengɔi ngáá ti lɔ́ve táa vá ti ndáá háá lé. Ti w̃ááyilingɔ áá ɣɛ́ lá ngáá kúlai kpatɛngɔ́ ngáá njée kpélengi ngáá áá ngákɛ ngáá kɛ aa lɔ ngáá maaw̃aanú háa.”

⁴Ngala ndáa háá lé mbélaa félengɔi nátii tɔ́ tí ngáa ɔ́levi wulu félengɔi ɛ́ɣɛ lámbo towa félengɔi ti lói Ndemɔí Ngála kakála í ngeleí sí wú kpɛ́lɛɛ mááh̃u.

⁵Ná núu fíli áá ɣɛ́ í fáá ỹɔ́u ɣɛ́ ngáá Ngalá ndáá háá lé mbélai nátii, ngɔmbu áá gúla Ngala ndáá háá lé mbélai nátii nda í tí waahílima yélaitii mɔ. Nuu fíli áá ɣɛ́ í fáa ỹɔ́u ɣɛ́ ngáá ti ye, kɛ ngimɔ́ɔ́ taa há.

⁶Ngala ngí ngakpá féngɔ ti yaa ngáá tí njɛ́i h̃úúhou ɛi wa kuí ná láá lówah̃u taá ɣɛ́ taa Ngala ndáá háá lé. Ngakpá tɔ́ múl̃ɔ ti yaa ngáá taa njɛítii pote ngáá ŋaaw̃ɔ, ná múl̃ɔ taa ɣɛ́ lói tí fáá báma fíli ndá ngélewu, taa ndá.

⁷Ná taa víla Ngala ndáá háá léma, ngakpa súwai sí áá gúla ndowái sí h̃u kpu ngáá mba, aa lapi ngáá ti ye, í hómbo ti w̃a, í tí váá.

⁸Aáva ti vúw̃aitii taá ɣɛ́ láá lááni pele walái w̃a taa walái sí h̃u tí tí Lemɔ́i Jísu bakpáni na kulɔsíi w̃a. Aáva naa gúlangɔ i ɣɛi la ngáá Sɔ́dɔu ɛ́ɣɛ Íjepi.

⁹Foló sáángɔ síkpɛ ndáá lówah̃u, nungáá taa gúla híítii su bɛ́kpɛ tiyɛ́i taá híí woítii nde ti gúlangɔ paatiitíí su tí ndɔ́wɔlɔ kpɛ́lɛɛ sú ɛ́ɣɛ tíwaa tí vúw̃aitii kpelé aáva tɛ́i lúw̃ama ngáá tɔ́ɔ́ tí bɔ́lu.

¹⁰Nungáitii ti ngélewu, taá góóh̃unɛɛ nuu félengɔi sítii ti háá laí ná h̃u. Taá ɣɛ́ taa kóóh̃unɛɛ gúú wuya táá fembɛ wɔ́lingaa lɔve ỹɔw̃ɔ́ ỹɔ́w̃ɔ yéle. Sífaa Ngala ndáá háá lé mbéla félengɔi sítii tɔ́ ti ɣɛ́ngɔ táa faa báma walái lá ti w̃a.

¹¹Kɛ́ ná foló sáángɔ síkpɛ í gúlani su, Ngala ngí kɛ́ni ngáá háwu ndɛɛh̃u í vú tí h̃u volú, tí yóóɣe, tí ló. Aáva sítii kínɛi tí tí lɔ́ni, nduwá wála i vúni tí h̃u.

¹²Kɛ Ngala ndáá háá lé mbélaa félengɔi nátii tí ngóó wála ỹɛ́ninga áá gúla ngelegóóh̃u, í ɣɛ ti w̃a, “A vá ngeleí yá!” Ti waahílima yélaitii tí lói ti belé má tí lɛ́ ngelegóóh̃u njɛ bilíí h̃u.

¹³Ngamá nɔ́ɔ́, ndɔwɔlɔ́i í bɛ́lini ngwála. Ná taa walái ná ɔ́ɔ́ wɔ́lɛ su púú, seiw̃aá yílangi lɔ́ í ỹáánini, nuu tásu ngɔ́felangɔ tí há su. Nungáá w̃átai sítii tí ɣɛ́i loní, nduwá wála í vúi tí h̃u. Faalɔ, Ngala lɛ́i í ngelegóóh̃u tí ndaaw̃áálɛni.

¹⁴Faa bámai hele kélei í vílaa ngáá la. Kɛ́ í longá ngáá sawa kélei áá vá vaáma h̃umbuwa.

¹⁵Kɛ malékai wɔféla kélei i ngí ndá búlui hɛ́nga. Ná í ná ɣɛ́ni, ngí ngóó wála walaní mɛ́nini táa gúla ngelegóóh̃u, táa ɣɛ́ ta, “Ngakpángi sí áá núu ɣɛ́ ngáá masa ngeleí sí wu, áá lɔ́ mu Lemɔ́i Ngalá fááw̃a ɛ́ɣɛ ngí Lókolo Mbá W̃ɔ́i, aáva aa ɣɛ ngáá masa kúnafɔ taá ngí ndá gúnafɔ.”

¹⁶Kɛ kele ɣelé mbélaa puu félengɔ maah̃úú nááningɔi tiyɛ́i ti ɣɛ́i héini ti w̃ása kpɔkpɔngáitii suu Ngalá kakála, tí lái Ngala kakála, tí fɛ́li,

¹⁷táa ɣɛ́ ta, “Ndemɔí Ngakpa Ngála Ngwálai, yá lɔ́ yí ná aáva yá lɔ́ yí ɣɛ́ngɔ na wɔ́lɔ. Ní sɛ́ɣɛɛ gúla í w̃á ngáá yí í yákpa ngwálai w̃ááhɔlɔnga aáva yí í w̃ásandai lɔ́kula héinga.

¹⁸Sítii taá ngáá í vóngaa ti liiyaw̃ál̃angɔ i ɣɛngɔ lá ngwala, bɔw̃álale faa bámai yáá vá ndáma ɛ́ɣɛ saa yeláitii ti gɔsɔ́ndai i folóa ma. Kuí i folónga ma ngáá yáá vá náa í yénge mbeláitii maaỹáá féma, ná wáá ngáá, í láa haa lé mbélaitii, ɛ́ɣɛ í vóngaitii kpɛ́lɛɛ tiyɛ́i í wúfema í tí yaá, sítii ti ngáá ndaahéi mbá yélaa ɛ́ɣɛ sítii taa ngáá ndaahéi mbá yélaa. Kuí i folónga ma yáá vá sítii kɛ kíli ỹaanimá táa ngelewuí sí ỹááni!”

¹⁹Ngalangí Hɛ́ɛ́ma Yála Pɛ́lɛi í ngelegóóh̃u, ndaawóngɔ i ɣɛí lá, Kɛ́lɛ Kal̃áŋal̃a Ngwalaí i na. Ngeleí í ɣɛí áá ɣɛ́ míỹa míỹa ngele bandɛ́i áá bɔ́ɔ́lɔ na ngoí yángi í w̃ɔ́nu. Ndɔwɔlɔ́i áá bɛ́li na, sakɔ́ búú wála walaí áá vú.