Read Bandi FAA YÁKƐ KƆ́LƆI 14 Bible Online

FAA YÁKƐ KƆ́LƆI 14 - Bandi bible

FAA YÁKƐ KƆ́LƆI 14

¹Kɛ ngí wɔ́lɛa, ngí Mbáálai lɔ́ i lóóni taa nuu tásu seiw̃aá hɔ́ndɔ ngiláá púu nááningɔ maah̃úú nááningɔitii (144,000) ngihéngi sí wú mbá taa tolí ngáá Sáỹa. Nungái nátii tɔ Mbaalaí taa ngí Kɛ́ɛ́ɣɛ ti laahéingi vɔ́nɛngɔ í ɣɛ́i la ti lavála.

²Kɛ ngí ngoí ỹɛ́nia í gúla ngelegóóh̃u kíya nɔ́ɔ njɛ ááyaa lúndɛ ngwala ɛ́ɣɛ mɔ́ɔ kíya ngele bandɛ́ ááyaa bɔ́ɔ́lɔ. Ngoí gúlangɔ i ɣɛí lá kíya nɔ́ɔ mbaka yɛi mbélaa taa ɣɛ́a mbaka yɛ́i.

³Nuu tásu seiw̃aá hɔ́ndɔ ngilaa púu nááningɔ maah̃úú nááningɔi (144,000) sítii ti ɣɛ́i lóóni Ngalangí w̃ása kpɔkpɔngí wútuwɔ, mbéi fúlu wɔ́li nááningɔi ɛ́ɣɛ kele ɣelé mbélaitii ti ɣɛ́i lóóni na. Nungái nátii sɔ́ingi lɔ́ Ngala ngí ɣɛ́i náa ti wúmaawoi, tiyá lɔ́ nɔ́ɔ ti ɣɛ́i taa ngulé niinái sí hɔ́ɔ́lɛ. Nuu véka fíli ɛ́i belé hómbo ɔ́ɔ́ náá wɔ́li kɛ nɔ́ɔ léi tiyá.

⁴Nungái sítii tɔ faa ỹɔ́u fíli áá ɣɛ́i ti h̃u, ná wáá ngáá, nápa taá ɣɛí faa fíli kɔ́lɔ kɔwɔ́ato nyah̃á háá wa. Tiyá lɔ́ɔ Mbaalaí sí vólu mbéi fíli áá lí na. Tiyá vá tɔ́ mɔ́ɔ ti wúmaawongɔ ngeleí sí wu. Nungáitii su, tiyá hése tɔ́ tí Ngalá ɛ́ɣɛ Mbaalaí hááw̃a.

⁵Nápa taá ndɛɛ gɔ́ɔ́lani aáva tɔmbema w̃áá fíli áá ɣɛ́i ti wa Ngalá ngááh̃u.

⁶Kɛ ngí maléka véka lɔngá áa góvo ngeleí yá kélei. I ɣɛi áá kúnafɔ gééla woo vandaí lé nungáitii ma tí ngélei sí wú taá gúla híítii su bɛ́kpɛ tiyɛ́i taá híí woítii ndé bɛ́kpɛ ti gúlangɔ paatiitíí sú tí ndɔwɔlɔ́i kpɛ́lɛɛ sú.

⁷I ndéni woo wála h̃u, i ɣɛ ta, “A wúfe Ngalá má wú ndaaw̃áálɛ bɔw̃álale táingi folongá ma ngáá áá vá nungáitii kpɛ́lɛɛ kɔ́sɔma. A Ngalá fɛ́li lɛ́i í ngeleya, ndɔwɔlɔ́i, yívoi ɛ́ɣɛ njɛitii kpɛ́lɛɛ kpátɛngɔ.”

⁸Kɛ ngí malékai hele kélei lɔ́a ngeleí yá áá góvo. Íwaa ɣɛ́ ta, “Taa walái sí taa tolí ngáá Babél̃ɔ i wolóa bú, taa walá sí i wolóa bú. Taí sí h̃ú gɔ́lɔsiya ngwalaí i ndɔwɔlɔ vékaitii kpɛ́lɛɛ súúỹaaninga. I kɛ́a ngáá háwu ndɔwɔlɔ vékaitii ti ɣɛ́a ngáá kíya nɔ́ɔ nuu áá ndɔ́ɔ yakpángɔ bɔ́le í sóu.”

⁹Kɛ malékai hawa kélei i vaa ná félengɔitii ti ɣɛ́i náa lɔveí íwaa ndé woo wála h̃ú, áá ɣɛ́ ta, “Nuí fíli áá hésendaa yákpa súwai sí hɛ́li ɔɔ i tokovongí w̃ááhɔlɔ lavála ɔɔ loko w̃a, ɛ́ɣɛ í kɔɔ kɔɔ ŋániitii fɛli tí kpátɛngɔ,

¹⁰Ngalangí lííyaw̃al̃ai áá foló ma. Ndiiyaw̃ál̃a wálai ná kulangɔ́ ngáá ndɔɔ yakpangɔ́ wála maa w̃ɔ́i aa kpɛ́lɛɛ kpɔ́le. Sítii kínɛi taa sítii kɛ, tiyá lɔ́ taa maanɔw̃ɔ́ wálai sí yeɣé ngɔmbu hóngi sí yá ɛ́ɣɛ ngɛi w̃ááku nyɔu ỹɔungí áá w̃ɔ́ ngwála kíya nɔ́ɔ fukú i ná hɛ́ɛ́ma w̃álekaitii ɛ́ɣɛ Mbaalaí yaah̃ú w̃a.

¹¹Nduulí ááyaa gúla ngɔmbu hóngi sí yá ngáá áá ɣɛ́a nungáitii maanɔw̃ɔ́ kúnafɔ taa ngí ndá gúnafɔ ɛi víla. Sítii kínɛi taa ngakpa súwai sí hɛ́li ɛ́ɣɛ kɔɔ kɔɔ ŋániitii, ná vólu, tí ngí lókovongi vú ti w̃a, kúnafɔ w̃áánɔw̃ɔi sí taa híya su foló ɛ́ɣɛ kpindí, ndɛɛlɛmbó ngɛi ɣɛ́ su.”

¹²Ngoí sí lɔ́ ná ngáá í kɛ́ ngáá háwu Ngalángi vóngaitii tiyɛ́i ti golongɔ́ ngí hávaitii mbu ɛ́ɣɛ ti lɔwɔbáɣangɔ í ɣɛ́ lá Jísu yaá tí liilɔ́lɔngɔ í ɣɛ́ la.

¹³Kɛ ngí ngoí ỹɛ́ninga í gúla ngelegóóh̃u, i ɣɛ ta, “Sí vɔ́nɛ. Í séi náa sí h̃úi w̃á í lí ngáá naá wútuwɔ, aa lɔ́ ngáá faa vánda sítii kínɛi mbɛ́ taa lá ngáá Ndemɔí tí wála lɛɛh̃úi w̃a faaw̃a.” Hɛ́ɛ́ma Ỹínangi i ndéni, i ɣɛ ta, “Tɔɔỹáá lé. Tiyá lɔ́ɔ vá liivó kɛ́ma ngáá ndɛɛlɛmbó ti yénge kpa kpangí yá, bɔw̃álale, ná lɔ́ í ngáá kulasuunumái ti yénge pandaí hááw̃a.”

¹⁴Kɛ ngí wɔ́lɛa, ngí njɛ bilí wólengi lɔ́, ŋani tá i ɣɛi njɛ bilí ná yá kulangɔ́ ngáá nuu búsa. Góóli w̃ása mbɔ́ɔ́lɔi í ngu mba ɛ́ɣɛ mbowá yándiili mbɔɔlɔngɔ́ i ngeyá.

¹⁵Kɛ maléka véka i gúlaa Hɛ́ɛ́ma Yála Pɛ́lɛi wu áá yɛ́pɛ woo wála h̃ú ná yéle i ɣɛ́i héini njɛ bilí ya, i ɣɛ ma, “Í wówai yeɣé naá yí pɛ́lɛ sii híí ŋániaitii kula ma, bɔw̃álale, sii híí ŋániaitii tí ngélei sí wú ti gúla táingi i fóloa náa ma.”

¹⁶Kɛ nuí sí í ɣɛ́i héini njɛ bilií ya i ngi wówai yéɣea í ngélei sí wuu síí hii ŋániaitii kula la.

¹⁷Kɛ ngí mɔ́ɔ maléka véka lɔ́a í gúla Hɛ́ɛ́ma Yála Pɛ́lɛi wú í ngelegóóh̃u aa bɛ́lɛ mbowá yándiilingi i ngeyá.

¹⁸Kɛ maléka véka sí ngɔmbúi í tóko h̃u, i hiɣengá Ngalá sááɣa gúla tútui gakala í vá. I yɛpɛní woo wála h̃ú malékai sí yéle mbowá yándiilingi í ɣɛ́i ngeyá. I ɣɛ ma, “Gilépiitii ti ngélei sí wu ti hítia, faalɔ, í wówa yandiilingí yéɣe náa yí tí gúla.”

¹⁹Kɛ malékai sí i ngí wówa yandiilingí yéɣea í ngélei sí wu gilépiitii kula la. I ti vú mbéi taá gilépiitii nganjɔ́wɔlɔ na. Ná vá tɔ áa ló Ngalangí lííyaw̃al̃a walaí yákɛ fááw̃a ngáá faa ỹɔ́u yélaitii.

²⁰Ti gilépiitii fɔɔỹái gilépi lowaí ná h̃u taa walaí sí bélaa aáva ŋaaw̃ɔí í gúlai gilépii yanjɔ́wɔlɔ ndówai ná h̃ú i ɣɛi áá yéi kíya nɔ́ɔ njei yɛ́ ááyaa yéi. Ŋaaw̃ɔi sí h̃úú í ɣɛ́i gooh̃á í híti foló ndɔ́ɔ́lungɔ híya mbomáá h̃u aáva mbuu hulú kíli ɔ́ɔ́ nuu w̃áábɔle votó.