Read Bandi FAA YÁKƐ KƆ́LƆI 16 Bible Online

FAA YÁKƐ KƆ́LƆI 16 - Bandi bible

FAA YÁKƐ KƆ́LƆI 16

¹Kɛ ngí ngoo wála ỹɛ́nia áá gúla Hɛ́ɛ́ma Yála Pɛ́lɛi wu, áá ɣɛ́ maléka ngɔ́felangɔitii ma, “A lí, wú páni ngɔ́felangɔitii ngeɣé Ngalángi lííyaw̃al̃ai í tí h̃u wú pú ngelewu.”

²Kɛ sí í ɣɛ́i hésendaa w̃alékai ndá váningi h̃u i púa ngélewu. Nduwu w̃aa heebɛ́ ỹɔ́u ỹɔungí áá ɣɛ́ ngáá pala lééle áá báálɛ ngwala, i gulaní sítii kpɛ́lɛɛ má ngakpa súwai lókovongi í ɣɛ́i ti w̃á ɛ́ɣɛ sítii kpɛ́lɛɛ ti ɣɛ́i taa kɔɔ kɔɔ́ ŋáni sí hɛ́li í ngáá ngakpa súwai sí ɣɛ́ kíli.

³Kɛ malékai hele kélei i vaá í ngí ndái vu yívoi ya. Yívoi i vóte ngáá kíya nɔ́ɔ nuu háángɔ ỹááw̃ɔ aáva ná i kɛí ngáá háwu fulú ỹániaitii kínɛi tí ɣɛ́i yívoi wu tí há.

⁴Kɛ malékai hawa kélei i vaá í ngí ndái vu njei yɛ́ wála walaí ɛ́ɣɛ njei yɛ́ gúlo guloítii nga aáva ti kpɛ́lɛɛ ti vótei ngáá ŋaaw̃ɔ.

⁵Kɛ ngí malékai sí woo ỹɛ́nia njei yɛ́itii tí tóko h̃u i ɣɛ ta, “Yɛ́i faa ỹɔ́u áá í h̃ú, yɛ́i yí ɣɛ́ngɔ na wɔ́lɔ, yí na sí h̃u, yí fái sí waalévea ngáá telembo péle.

⁶Nungái sítii tɔ wɔ́lɔ ti Ngalángi vóngaitii ɛ́ɣɛ Ngalá ndáá háá lé mbélaitii paaní. Náá hááw̃a, yí faa bámai sí lánga ti w̃a tíwaa ŋaaw̃ɔ́i sí bɔ́le. Sí kúle í má í lá tí w̃a, aá lɔ́ áá lá tí w̃a!”

⁷Kɛ ngí ngoí ỹɛ́ninga áá gúla Ngalá sááɣa gúla tútui ŋál̃aa véle, áá ɣɛ́ ta, “Ndemɔí Ngakpá Ngála Ngwalaí, í háá waalévendai aá lɔ́ ngáá tɔɔỹaá i ngáá telembo.”

⁸Kɛ malékai nááni kélei i vaá í ngí ndá váningi h̃u háá bamaí vú folói w̃a. Ná i kɛí folói í bándi ngwala áá nungáitii maa w̃ɔ kíya nɔ́ɔ́ ngɔmbu í na.

⁹Folo lúye nduyengí wála bandingɔ́ i ɣɛi lá í pɛ́lɛ nungáitii mɔ́ma ngáá suulɔ́vengɔ. Nungái sítii tí pɛ́lɛ Ngalá ngɛ́ɛ́lima, lɛ́i ngakpá ngí ngeyá faa bámai sítii mááh̃u. Kɛ́ taá kɛi tɔɔ bé tí háá ỹɔítii mba tɔɔ́ Ngalá ndaaw̃áálɛ.

¹⁰Kɛ malékai lɔ́ɔ́lu kélei i vaa í ngí ndá váningi h̃u háá bamaí vú ngakpa súwai sí w̃ása kpɔkpɔngí h̃u. Kpindí wála í vɛ́lɛi mbéi kínɛi suwa walái sí w̃ásandai í ɣɛ́i na. Nungáitii kpɛ́lɛɛ tí ngí w̃ásandai wu, ti ɣɛ́i taa nɛɛngítii nyíí nyíí kɔwɔ́ato nduwu ya fuulɛ́i wa í ɣɛ́i áá wó ngáá ti ye.

¹¹Ti ɣɛ́i náa taa Ngalá ngɛ́ɛ́li lɛ́i í ngelegóóh̃u. Ti ɣɛ́i taa ná ɣɛ́ kɔwɔ́ato nduwu ya fuulɛ́i wa í ɣɛ́i áá wó ngáá ti ye ɛ́ɣɛ palaítii í ɣɛ́i ti w̃a. Kɛ́ taá kɛi tɔɔ́ bé tí háá ỹɔítii mba.

¹²Kɛ malékai wɔhíta kélei i vaa í ngí ndá váningi h̃u háá bamaí vú njɛ wálai sí yá taa tolí ngáá Yufuleti. Njɛ wáalai ná i yɛɛlii kɛinɔɔ́ ndɔwɔlɔ w̃ásangai sítii táá gúla ngáá foló gúla máa veleí h̃úú véle tí pele w̃ááhɔlɔ.

¹³Kɛ ngí ỹína nyɔu sáángɔ lɔ́nga ti gúlangɔ ngáá ndohóa. Ngiláángi gulaí kaalii lá, pekaí í gúla ngakpa súwai yiláángi lá, sawa kélei í gúla ndɛɛ yála ndaa háá lé mɔ́i la.

¹⁴Ỹína nyɔú sáángɔi sítii tɔ taa káámaa haítii kɛ. Tiyá lɔ́ɔ vá ndɔwɔlɔ w̃ásangaitii kpɛ́lɛɛ ngátɛma mba ngélei sí wu kɔɔ wɔ́ fááw̃a foló wálai ná w̃a Ngakpa Ngála Ngwalaí áá vá ngí yákpa ngwalaí yákɛma.

¹⁵Ndemɔí Jísu i ɣɛ ta, “A gindó su, nyáá ngáá vá kíya nɔ́ɔ́ ŋúỹa w̃ɔ́ɔ. Aa lɔ́ ngáá faa vánda nuu fíli mbɛ́ áá w̃ááhei wo ngí gúlaitii tí kpélaa ngáá ɛi li ngitíí ya ngáá w̃aaỹaaká ɔ́ɔ́ wúfe kpɔsú!”

¹⁶Ỹína nyɔí sítii tí kɛ́i ngáá háwu ndɔwɔlɔ w̃ásangaitii tí yátɛmba ỹandái sí taa lolí ngáá Ámagɛdɔ Híbulu woí h̃u.

¹⁷Kɛ malékai wɔféla kélei i vaá í ngí ndá váningi h̃u háá bamaí vú ngeleya. Ngoo wála i gulaí masa kpɔ́kpɔngi ŋál̃aa véle í Hɛ́ɛ́ma Yála Pɛ́lɛi wu, i ɣɛ ta, “I vilangá.”

¹⁸Ngeleí i ɣɛi áá ɣɛ́ míỹa míỹa. Ngele bandɛ́i í pɛ́lɛ bɔɔlɔ́ma, ngoí yá ngí w̃ɔ́nu, ndɔwɔlɔ́i í bɛ́li ngwala. Táingi ná h̃uu lɔ́ ndɔwɔlɔ́i í kpɛ́lii ỹɔú ỹɔ́u ngwalaí wóni kɛɣɛ́laa fíli áá nɛ́ɛ́ ɣɛ́i. Sí h̃úú ỹɔ́ungɔ i ɣɛí lá í lɔ́ve pekaítii kpɛ́lɛɛ mbá.

¹⁹Taa walaí sí i wali sú sáwa, taa walá wálaitii kínɛi ti ndɔwɔlɔ vékaitii su ti kpɛ́lɛɛ tí wólo ngóloni. Faa ỹɔ́i sí kínɛi í ɣɛ́i áá ɣɛ́ taí ná h̃u, Ngala ngí giséini ti w̃a. Náá hááw̃a, i ngi lííyaw̃al̃a walaí lɛ́ni taí sí w̃a. Ngi lííyaw̃al̃a walaí ná kúlangɔɔ lé ngáá ndɔɔ yakpángɔ wála kule áá ɣɛ́ nuu w̃á ngáá í kpɛ́lɛɛ kpɔ́le.

²⁰Ndɔwɔlɔ́itii kínɛi tí w̃ááyele mbélengɔ í ɣɛ́i lá ngáá njɛí, ti w̃áá í bɔ́leni. Ngihéngitii kpɛ́lɛɛ ti ỹɛ́ɛ́nɛ.

²¹Sakɔ́ búú wála walaí i ɣɛi áá gúla ngeleí yá áá h̃úndɛ nungáitii má. Sakɔ́i nátii ti yiláá ngílaa p̃ɛ́ɛ́ míí kíli ɔ́ɔ́ ɣɛ́ ngáá p̃áu hɔ́ndɔ ngiláá. Nungái sítii ti pɛ́lɛi náa Ngalá ngɛ́ɛ́lima kɔwɔ́ato faa báma walaí wá í ɣɛ́i áá lá ti w̃a ngáá suulɔ́vengɔ.