Read Bandi FAA YÁKƐ KƆ́LƆI 18 Bible Online

FAA YÁKƐ KƆ́LƆI 18 - Bandi bible

FAA YÁKƐ KƆ́LƆI 18

¹Ná sí í gúlai su, ngí mɔ́ɔ maléka véka lɔí áá gúla ngelegóóh̃u. Ngakpa ngwála i ɣɛi ngeyá aáva íwaa hólo ngwala. Ngi hólo mil̃a mil̃angí í ngelewui sí kpɛ́lɛɛ súú ɣɛi kpál̃au.

²I woo gúlani, i ɣɛ ta, “I wolóa bú. Taa walaí sí taa tolí ngáá Babél̃ɔ i wolóa bú. I ɣɛa ngáá ỹína nyɔ́u ỹɔungáitii tí láá h̃u. Ngafuw̃angái ɛ́ɣɛ w̃ɔní ỹɔú ỹɔ́ungaitii tééle lɔ tí ná.

³Taa walaí sí h̃úú háá ỹɔítii ɛ́ɣɛ naa kɔ́lɔsiyangi i hiyangá ndɔwɔlɔ́ vékaitii kpɛ́lɛɛ su kíya nɔ́ɔ ndɔɔ bɔ́lendaa. Ndɔwɔlɔ́ w̃ása ngwala waláitii tí kɛ́a ngáá ti gɔ́lɔsiya mɔ́ɔ. Yawo w̃ááhiya mbélaitii pa ti ndɔwɔlɔ́i h̃u kpɛ́lɛɛ, ti bátɛa ngi lóngi h̃u í sú ngáá ngeleí sí wuu ỹáákaitii.”

⁴Kɛ ngí mɔ́ɔ ngoo véka ỹɛ́nia áá gúla ngelegóóh̃u, ngoí ná i ɣɛ́i ngáá sí, “Ní vóngaitii, a gula taí ná h̃úú wá! A gúla náá wa kɛinɔɔ́ wɔ́ɔ́ loko víli náá háá ỹɔítii su kɛlaa wɔ́ɔ́ náá háá bamaí tá w̃ááhɔlɔ.

⁵Naa háá ỹɔítii ngangí ɣɛ́a wɔɔlɔ ngwala í fólo ngelegóóh̃u, Ngalá pá ngáá leew̃angɔ́ tí w̃a.

⁶A suuhóu kíli ỹɔu wó kíya nɔ́ɔ jɔ́ í wú h̃úúhou kíli ỹɔu wongɔ́. Sí í kɛ́ngɔ ngáá wú ye, a poto kúlandaa ɣɛ ma féle. Ná ɣɛ́ndai gúlangɔ í ɣɛ́ lá ngáá ndɔɔ yákpangɔ héndaa ngeyá áá nuu hóu. Ndɔí sí yákpangɔ í ɣɛ́ lá í lɔ́ve sí wá í féngɔ nungáitii ngeyá.

⁷Kɛ ngáá háwu ngi w̃áánɔw̃ɔi ɛ́ɣɛ ngí w̃ááw̃aanui áa ngeɣé í híti ngí wúfemai h̃u í mááhɔlɔngɔ ɛ́ɣɛ ngí líívo kɛi í kɛ́ngɔ. I ɣɛi áá ndé gí ma ngáá aa lɔ́ ngáá ndɔwɔlɔ́ w̃ása ngwala, aa ngáá pónyah̃a aáva áá ndé múl̃ɔ gí ma ngáá maaw̃áánu háá ɛi lá kakála kúnafɔ.

⁸Ngí yóngangi sí hááw̃a, aa seebɛní ngaa mááw̃aanu w̃ááhɔlɔ ɛ́ɣɛ ndɔlɛ í sóu foló yíla kpéi ma, i mɔ́ɔ w̃ɔ́ ngɔmbu yá, bɔw̃álale Ndemɔí Ngalá lɛ́i áá kɔ́sɔ áá lɔ́ ngáá ngakpa mɔ́ɔ wala.”

⁹Ndɔwɔlɔ́ w̃ása ngwala walaítii kínɛi tí ngeleí sí wu, tiyɛ́i ti kɛ́a ngáá tí gɔ́lɔsiya mɔ́ɔ ɛ́ɣɛ ti líívo kɛ mɔɔ wala, tiyá lɔ́ɔ vá wɔ́lɔma ɛ́ɣɛ tí w̃ááw̃aanu ná taá ndúúlii lɔ́ áá gúla mɔngí h̃ú taa walaí ná áá ɣɛ́ áá mbó.

¹⁰Taa ló p̃óuma bɔw̃álale taa ɣɛ́ taa lúwa ngáá tɔ́ɔ́ ngí w̃áánɔw̃ɔi tá yéɣe, táá ɣɛ́ ta, “Kpóu! Sí lɔ́ ngáá faa ỹɔ́u wála haa ɛ́ɣɛ ndúwa háá wála ngáá Ngalá ngáá ngakpa táá walaí sí Babél̃ɔ woló nɔ́ɔ háwa yílaa ndáá lówah̃u ngí háá ỹɔítii fááw̃a!”

¹¹Yawo wɔ mbélaitii ti ngélei sí wu, taá wɔ́lɔ tí mɔ́ɔ́ w̃aaw̃áanu faaw̃a bɔw̃álale, nuu fíli ɛi mɔɔ ti yáwo ỹaakaítii ngíya.

¹²Nuu fíli ɛi mɔɔ ɣɛ na ɔ́ɔ́ tí yáwo vanda ỹáákai sítii ngíya kíya góóli í na ɛ́ɣɛ kɔlu woléngi sí taa kpátɛ ngáá naholói. Ná vólu, kɔtu vánda gúlo gulóitii taa hólo ɛ́ɣɛ kɔtu wolé pándaitii maa bongongɔ wala ngiyáa mbélaa tɛ́i mɔ́ɔ́ ɣɛ na. Kula boolé vóto ngí bíỹangi i su, ɛ́ɣɛ kula biỹángi taa hɛ́mgbɛ gúlaitii ɛ́ɣɛ kula vanda vékaitii ti h̃ɔ́w̃ɔ bangɔ́ í báha náa ngulú vándai sítii mba taa ngulú yéngengi wó la, ɛ́ɣɛ ŋaniáitii taa kpátɛ ngáá selé láángɔluitii, ti mɔ́ɔ́ kpatɛ ngáá ngulú vándaitii ɛ́ɣɛ sítii taa kpátɛ ngáá kɔluí ɛ́ɣɛ báhi gɔ́lu ɛ́ɣɛ kɔtu woléngaitii, ti yáá mbélaa tɛ́i mɔ́ɔ́ ɣɛ na.

¹³Ŋani w̃ááku nɛɛ nɛɛngáitii kíya sɛ́ndi wulɔ í ná taa ti tolí ngáá sínamɔ, ísɛngi, mɛ́i ɛ́ɣɛ filakísɛngi, ná vólu, ndɔí, ngulɔ́i ɛ́ɣɛ ngɛ́ingi ná taa tolí ngáá fuláwai taa biléi bátɛ lá ɛ́ɣɛ mɛɛni sí taa tolí ngáá wíítii ɛ́ɣɛ tóŋaniaitii í báha soítii mba ɛ́ɣɛ ngɛ́ingi sí taa hei su tí píli soí wá ɛ́ɣɛ nduwɔáitii ɛ́ɣɛ nuu búsa, ti yaa mbélaitii taá mɔ́ɔ́ ɣɛi na.

¹⁴Yawo wɔ mbélaitii taá ɣɛ́ náa ma, “Ŋani vandáitii kpɛ́lɛɛ í longɔ́ í ɣɛngɔ la, ti guláá í yáá. Í bátɛi kpɛ́lɛɛ ɛ́ɣɛ í líívo kɛi tí guláá í yáá, aáva kúnafɔ yɛ́i mɔ́ɔ́ tí w̃ááhɔlɔ.”

¹⁵Yawo wɔ mbélai sítii tí bátɛi yawo wɔndái h̃u taa walái ná h̃u, taa ló p̃óuma bɔw̃álale taa ɣɛ́ taá lúwa ngáá tɔɔ maanɔw̃ɔ́i ná tá yéɣe áá wó ngáá taí ná. Taá ɣɛ́ taá wɔ́lɔ táá w̃aaw̃áánu,

¹⁶táá ɣɛ́ ta, “Kpóu! Sí lɔ́ ngáá faa ỹɔ́u wála haa ɛ́ɣɛ nduwá háá wála taa maaw̃aanú ma taa walái sí hááw̃a kulangɔ́ í ɣɛ́ngɔ lá ngáá nyah̃a ɔ́ɔ́ w̃aayíli ngáá kula boolé vóto ngí bíỹangi i su ɛ́ɣɛ kula biỹá ɛ́ɣɛ kula wolé pánda maa vungɔ́ ngáá góóli wɔlingáitii taa kɔtu vanda gúlo gulóaitii táá hólo ɛ́ɣɛ kɔtu wolé pándaitii maa bongóngɔ ngwala.

¹⁷Háwa yiláá ndáá lówah̃u, ngi bátɛ walaí kpɛ́lɛɛ i ỹaaniá.” Sitíma hiya mbélaitii kpɛ́lɛɛ í báha yawo w̃ááhiya mbélaitii ɛ́ɣɛ njɛ ya ngénge mbeláitii kínɛi ɛ́ɣɛ sitímai h̃u yélaitii tí lói p̃óuma,

¹⁸tí wɔ́lɔ ná tí taí ná w̃ɔ́ ndúúlii lɔ́i áá gúla ngáá mɔngí taa walái ná í ɣɛ́i áá mbo. Tí woo gúlai tí ɣɛ́ ta, “Nápa taa fíli aa nɛɛ ɣɛi na ɔ́ɔ́ ɣɛ́ ngáá taa walái sí ɣɛ́ kíli ngakpa péle w̃a!”

¹⁹Tí tutuwángi híyani wú mba, tíwaa wɔ́lɔ ɛ́ɣɛ táá w̃ááw̃aanu, tí ɣɛ́ ta, “Kpóu! Sí lɔ́ ngáá faa ỹɔ́u wála haa ɛ́ɣɛ nduwá háá wála taa walái sí hááw̃a. Aá lɔ́ ngáá taa walá sítii kínɛi sitímai í tí yaá tí bátɛi ngí bátɛi h̃u. Háwa yiláá ndáá lówah̃u, taa walái sí bátɛi kpɛ́lɛɛ i ỹaaniá.”

²⁰A gooh̃unɛ́ɛ́ wɛ́i kínɛi wú ngelegóóh̃u, bɔw̃álale Babél̃ɔ i wolóa. A gooh̃unɛ́ɛ́ wɛ́i wú ngáá Ngalángi vóngaitii, ɛ́ɣɛ Ngalángi géélaitii í báha Ngalá ndáá háá lé mbélaitii mba. Faa ỹɔ́i í kɛ́ngɔ ngáá wú ye, Ngala ngí pelé lálanga aáva maa háá bamaí lɔ́ Ngalá ngáá nda ma.

²¹Kɛ ngakpa máleka wala yiláá i vaa, í kɔ́tu ỹííngɔ wála yiláá ngéɣe í píli yívoi wu, i ɣɛ ta, “Ngimɔ́ɔ́ taa walái sí Babél̃ɔ áá vá wólama bú kúnafɔ nuu ɛ́i mɔ́ɔ ɣɛ na.

²²Mbaka yɛ́i mbélaa ɛ́ɣɛ ngule hɔ́ɔ́lɛ mbélaa taa fúlutu hɛ mbélaa ɛ́ɣɛ búlu hɛ mbélaa ti tá fíli tɛ́i mɔ́ɔ ɣɛ na. Ngenge mɔ́ɔ́ híí fíli ɛi mɔ́ɔ́ ɣɛ taí ná h̃u kúnafɔ kɛlaa nuu ɔ́ɔ́ mɛ́ɛ́ni yénge mɔ́ɔ́ h̃uuỹɛ́ni ná.

²³Kúnafɔ lámbo fo ngɛi mɔ́ɔ hólo taí ná h̃u. Kúnafɔ nyah̃á wɔ́li kóóh̃unɛɛ ɛi mɔ́ɔ wo na. Naa yáwo w̃aahíya mbélaitii tɔ tí ɣɛ́ngɔ ngáá ngakpa mbélaitii ngélewu. Taí sí h̃u húkɛ gulandái i nungáá kpɛ́lɛɛ ngákpolowanga ngélewu.”

²⁴Faa báma i langá Babél̃ɔ w̃a bɔw̃álale Ngalá ndáá háá lé mbélaitii ɛ́ɣɛ Ngalángi vóngaitii ti ỹááw̃ɔitii tí vúngɔ taí sí h̃u. Tɔɔỹaá lé sítii kpɛ́lɛɛ tí tí váángɔ ngeleí sí wu, ti háá lɔ ngu mba.