Read Bandi FAA YÁKƐ KƆ́LƆI 19 Bible Online

FAA YÁKƐ KƆ́LƆI 19 - Bandi bible

FAA YÁKƐ KƆ́LƆI 19

¹Ná sí í gúlai sú, ngí ngoo yámbɔɔlɔngɔ wála ỹɛnií áá gúla ngelegóóh̃u kíya nɔ́ɔ faŋa wala áá ɣɛ́a ngule hɔ́ɔ́lɛ, táá ɣɛ́ ta, “A mú Ngála ndaaw̃áálɛ! Aá lɔ́ ngumaawóngi áá gúla ngeyá ɛ́ɣɛ ngakpa máánɛɛngɔ wálai aa lɔ́ faaw̃a!

²Ngi háá waalévendai aa ɣɛ ngáá tɔɔỹaá ɛ́ɣɛ telembo. I kɔlɔsiyá mɔ́ɔ walaí sí wáálevea ngáá kɛ aa veléi bɔw̃álale i ngeleí sí wuu ỹáánia ngáá ngí gɔ́lɔsiyangi. Ngalá tɔɔ́ faa bá ndáma, bɔw̃álale, i Ngalangí yénge mbélaitii paangɔ́.”

³Ti mɔ́ɔ́ woo lɛ́, ti ɣɛ́ ta, “A mú Ngalá ndaaw̃áálɛ! Taa walái sí w̃ɔ́ ndúúlii w̃áá ɛ́i léve kúnafɔ!”

⁴Kele ɣelé mbélaa vúú félengɔ maah̃úú nááningɔitii ɛ́ɣɛ fulú wɔ́li nááningɔitii ti hítɛi wumbú ya, tí Ngála fɛ́li lɛ́i í ɣɛ́i héini masa kpɔ́kpɔngi ya, ti ɣɛ́ ta, “A mú Ngála ndaaw̃áálɛ! Amíína!”

⁵Kɛ ngí ngoí ỹɛniá í gúla Ngalángi w̃ása kpɔ́kpɔngi ŋál̃aa véle, ngoí ná i ɣɛi ngáá sí, “Wú kpɛ́lɛɛ wáá wúfe Ngala ma wú ngáá Ngalá ngénge mbélaitii ɛ́ɣɛ nuu kpɛ́lɛɛ taa wúfe ma, ti ɣɛ́i ngáá ndaahéi mbá yélaa ɔɔ taa ɣɛ́i ngáá ndaahéi mbá yélaa, a mú mú Yálangi laaw̃áálɛ!”

⁶Kɛ ngí ngoí ỹɛ́nia kíya nɔ́ɔ faŋa walá áá ɣɛ́ ỹanda ɔɔ kíya nɔ́ɔ njɛ walá áá ɣɛ́a lúndɛ ɛ́ɣɛ múl̃ɔ ngele bandɛ́ ááyaa bɔ́ɔ́lɔ ngoí yá ngí w̃ɔ́nu. Ngoí ná i ɣɛi ngáá sí, “A mú Ngála ndaaw̃áálɛ, sífaa lɛ́i í ngáá Ndemɔí mú Yálangi, aá lɔ́ ngáá Ngakpa Ngalá Ngwala ɛ́ɣɛ Ndɔwɔlɔ W̃ása Ngwala.

⁷A mú kpɛ́lɛɛ mu góóh̃unɛɛngɔ í ɣɛ́ lá, a mú kóóh̃unɛɛ gúla. A mú Ngala ndaaw̃áálɛ. Mbaalaí ỹáh̃a gula sɔ́wɔi i folóa ma aáva ngí ỹáh̃ai i bɔwɔ́ ɣɛ́ kíli batɛngá.

⁸Nyah̃ápoi sí w̃ááyilingɔɔ lé ngáá kula wolé pánda Ngalá ngí féngɔ mbɛ.” Kula woléngi sí lɔ́ áá lo Ngalangí vóngaitii ti lúva velé vándai hááw̃a.

⁹Kɛ malékai i ɣɛa má, “Sí vɔ́nɛ. ‘Aá lɔ́ ngáá faa vánda sítii faaw̃a tí tí lolínga Mbáálai ỹáh̃a wɔlí kuí w̃a.’ ” Kɛ i mɔ́ɔ ɣɛa má, “Ngoí sítii tiyá lɔ́ɔ ngáá tɔɔỹaá gééla woo áá gúla Ngalá ngéya.”

¹⁰Ngí hítɛi wumbú yá malékai gakála ngáá ngí fɛ́li, kɛ́ i ɣɛi má, “Yaa ná ɣɛ́! Ngalá tɔ́ nɔ́ɔ yáá fɛ́li. Nyá bɛ́lɛ nyá lɔ́ nɔ́ɔ ngáá Ngalá ngénge mɔ́ɔ kíya nɔ́ɔ yí ná ɛ́ɣɛ í mbála Yála fɛ́li mbélaa, ná wáá ngáá, sítii kpɛ́lɛɛ ti langɔ́ ngáá tɔɔỹaá woí Jísu í ndéni.” Tɔɔỹaá woí Jísu í ndéni áá lɔ́ɔ í ngáá Ngalángi gééla woí wúngi Ngala ndaa háá lé mbélai taa nde.

¹¹Kɛ ngí tɔ́a ngelegóóh̃u laa í wó soo woléngi i ná. Soo woléngi sí híya mɔ́i taa ɣɛ ma Tokola Ma W̃ɔ́ɔ́ ɛ́ɣɛ Tɔɔỹaá W̃ɔ́ɔ́ aáva ngi háá waalévengi ɛ́ɣɛ ngí gɔ́i áá kɔ́ taa ɣɛ́ telembo péle w̃á.

¹²Ngaah̃ú gɛ́hɛi i ɣɛi áá hólo kíya nɔ́ɔ ngɔmbu hó aáva masa mbɔ́ɔ́lɔ bíh̃ingɔ i ɣɛi ngu mba. Ndaaheingí pɔnɛngɔ́ í ɣɛ́i la ma, nuu fíli aa ɣɛi kɔ́lɔ kɛ nɔ́ɔ laá bútei.

¹³Jogbongí i ɣɛi ma, ndɛbɛngɔ́ i ɣɛi lá ngáá ŋaaw̃ɔi. Ndaahéingi i ɣɛi mɔ́ɔ ngáá “Ngala Kééla Woí.”

¹⁴Ngelegóóh̃u hóyaitii ti ɣɛ́i polú tí soo woléngaitii kɔma, ti w̃ááyilingɔ ngáá kula wolé pándaitii ti wúyangɔ fó.

¹⁵Mbówa hɔ́kpɔ yándiilingi sí áá vá hómboma lá ndɔwɔlɔ́itii ma ngeleí sí wu i gúlai nda. Aa bandí bándi héi ti w̃a ngí w̃ásandai h̃u aáva aa lɔ́ ti yanjɔ́wɔlɔ mbéi i ngáá Ngakpa Ngála Ngwalaí lííyaw̃al̃a walaí ỹándai áá faa bá ngwála la ná nungáitii ma ti háá ỹɔítii fááw̃a.

¹⁶Jogbongí í ɣɛ́i ma, ndaahéingi vɔ́nɛngɔ i ɣɛi lá ma, pɔnɛngɔ́ múl̃ɔ kpálai w̃a. Ndaahéingi ná i ɣɛi ngáá sí, “Ndɔwɔlɔ́ W̃ása Ngwalaí ndɔwɔlɔ w̃ásangaitii fááw̃a ɛ́ɣɛ Ndemɔí nde mbélaitii kpɛ́lɛɛ fááw̃a.”

¹⁷Kɛ ngí malékai lɔ́a i lóóni folói w̃a. W̃ɔniáitii kpɛ́lɛɛ ti ɣɛ́i taa góvo ngeleya, áa ti lolí woo wála h̃u, áá ɣɛ́ ta, “A vá, wú w̃áákpɔ mbá ỹanda yíla Ngalangí gúú walái hááw̃a.

¹⁸A vá, wú sítii tí háángɔ wú ti yóitii mɛ, ná wáá ngáá, ndɔwɔlɔ́ w̃ásangaitii ɛ́ɣɛ sóyai ti núú wala waláitii ɛ́ɣɛ sóyaitii taa tí hóitii ɛ́ɣɛ tí híya mbélaitii ɛ́ɣɛ nuu kpɛ́lɛɛ, ná wáá ngáá, sítii ti ngáá nduwɔá ɛ́ɣɛ sítii taa ngáá nduwɔá í báha sítii mba ti ngáá ndaahéi mbá yélaa ɛ́ɣɛ sítii taa ngáá ndaahéi mbá yélaa.”

¹⁹Kɛ ngí hésendaa yakpa súwai lɔ́a ɛ́ɣɛ ngeleí sí wu w̃ása ngwala waláitii taa ti hóyaitii. Tí yátɛni mba ngáá tí lápi ngáá nuí sí i ɣɛ́i soí gɔ́ma taa ngí ndá hóyaitii.

²⁰Ngakpa súwai sí ɛ́ɣɛ ndɛɛ yála ndaa háá lé mɔ́i sí i káámaa haa bih̃íw̃aa ɣɛ́ni ngakpa súwai yɛ, tí tí hóuni ngáá pelésina. Káámaa hái sítii ndɛɛ yála ndaa haá lé mɔ́i í kɛ́ni, aá lɔ́ í nungáitii ngakpólowani lá ngáá tí ngakpa súwai sí lókovongi vú w̃a. Aá lɔ́ nɔ́ɔ múl̃ɔ í kɛ́i tí pɛ́lɛ kɔɔ kɔɔ́ ŋáni hɛ́li má ti kpátɛi kulangɔ́ ngáá ngakpa súwai sí. Ngakpa súwai sí ɛ́ɣɛ ndɛɛ yála ndaa háá lé mɔ́i ndɛɛh̃ú í lói tí h̃u tí tí víli ngɔmbu hó ngwálai ya ngɛi w̃ááku nyɔ́u ỹɔ́ungi ná áá w̃ɔ́ ngwala kíya fukú í na í su.

²¹Ngakpa súwai sí hóyaitii kpɛ́lɛɛ ti hááni mbowa hɔ́kpɔi sí ya áá gúla nuí sí lá áá ɣɛ héini soí gɔ́ma. W̃ɔniáitii pa tí tí luwú yóitii mɛ́ni ngáá hɛmbɛ́ fíli.