Read Bandi FAA YÁKƐ KƆ́LƆI 20 Bible Online

FAA YÁKƐ KƆ́LƆI 20 - Bandi bible

FAA YÁKƐ KƆ́LƆI 20

¹Kɛ ngí maléka yiláá tɔ́a áá gúla ngelegóóh̃u, ndówa wálai ná kpú ngáá mba maa kíí i ngeyá ɛ́ɣɛ njɔ́lɔwɔ wála.

²Í kaali wálai sí hóuni í ngáá wɔ́lɔ wɔ́lɔ ma gáálii lɛ́i taa ɣɛ́ ma Ngutuwɔ́ Ỹína Nyɔí ɔɔ Setána, i ngíli ngáá njɔlɔwɔ ngáá í ló ngíli h̃u fowó tásu ngiláá ndáá lówah̃u.

³Malékai i Setána víli ndowá wálai na h̃u kpu ngáá mba í ndaabɔ́lu ma, í sítɛnga, i lokovó ndó mba. I ná ɣɛ́ni kɛinɔɔ́ álaa mɔ́ɔ nuu fíli ngákpolowa ngeléi sí wu í ló su kpóloo fówo tásu ngiláángi sí í víla. Ná fówo tásu ngiláángi áá víla, taá bé mba kuu h̃úú lukpúngɔ hááw̃a.

⁴Kɛ ngí mása kpɔ́kpɔngaitii tɔ́a, sítii pá ti ɣɛ́i héini ti ya, ngákpa féngɔ i ɣɛ́i lá ti yaá ngáá tí núngaa gɔ́sɔ. Ngi mɔ́ɔ́ sítii ti yáfuw̃angaitii tɔ́ni tí tí vááni sífaa tí Ngala ngói lení taá tɔ́ɔ́ỹai kɔwɔ́ato sítii kínɛi mbá Jísu í ngákɛni ngáá ti ye, ɛ́ɣɛ taá kɛí tɔ́ɔ ngakpa súwai ɔɔ kɔɔ kɔɔ́ ŋáni ta hɛlí aáva taá ngákpa súwai sí lókovongi vúi lávala ɔɔ loko h̃u. Ti vái ndɛɛh̃úi h̃u, tí ɣɛ́ ngáá masa ngwála wála taa Kílisitii fowó tásu ngiláá ndáá lówah̃u.

⁵Sí lɔ́ i ngáá hésendaa yooɣeí sái h̃u. Nungáá vékaitii ti ɣɛ́i naa hááni, táá yóóɣéni sái h̃ú í ló su kpóloo fowó tásu ngiláángi í víla.

⁶Aá lɔ́ ngáá faa vánda sítii faaw̃a Ngalá ngáá vá ti yooɣéma sái h̃u hése. Tiyá lɔ́ na séɣe héɣe Ngala fááw̃a. Saí héle kélei ɛ́i mɔ́ɔ ti w̃áále. Taá ɣɛ́ náá ngáá saáɣa gula mbélaa Ngala mbɛ́ ɛ́ɣɛ Kílisitii ti mɔ́ɔ ɣɛ ngáa masangáá taa Kílisitii fowó tásu ngiláá ndáá lówah̃u.

⁷Ná fówo tásu ngiláángi áá víla, taá bé náá Setána wa.

⁸Ndɔwɔlɔ́i sítii pa taa ti lolí ngáá Gó ɛ́ɣɛ Mágo, maa yélaitii tiyɛ́i ti bih̃íngɔ kíya nɔ́ɔ kaha í ná tí vahá fáhangɔ ngélei sí wu, Setána lɔɔ vá tí yakpólowama í vá ngáá ti ye kɔɔ wɔ́mai

⁹aáva tí váhai ndɔwɔlɔ́i kpɛ́lɛɛ su ɛ́ɣɛ tí mbéi w̃ááyele mbéle Ngalángi vóngaitii tí na, ná wáá ngáá, taa walaí sí Ngála ndóngɔ la. Kɛ́ ngɔmbúi í gulaní ngelegóóh̃u í tí kpɛ́lɛɛ mɔ́.

¹⁰Ngutuwɔ́ Ỹína Nyɔí, lɛ́i í tí yakpólowani tí pílii ngɔmbuí sí ya ngɛ́i w̃ááku nyɔ́u ỹɔ́ungi áá w̃ɔ ngwála kíya fukú í na í sú mbéi tí ɣɛ́i naa ngakpa súwai ɛ́ɣɛ ndɛɛ yála ndaa háá lé mɔ́i vílii náá ná kílii. Naa lɔ́ taá maanɔ́w̃ɔ wálai yéɣe ná fólo ɛ́ɣɛ kpíndi kúnafɔ fááw̃a.

¹¹Kɛ ngí mása kpɔ́kpɔ kóle ngwalaí lɔ́a nuí ta í héini su. Ndɔwɔlɔ́ ɛ́ɣɛ ngéleya ti kpɛ́lɛɛ ti ỹɛ́ɛ́nɛi kákala kúnafɔ fááw̃a tɛí belé mɔ́ɔ́ lɔ́.

¹²Kɛ ngí sítii tɔ́a ti háángɔ, sítii ti ɣɛ́i ngáá ndaahéi mbá yélaa ɛ́ɣɛ sítii táá ɣɛ́i ngáá ndaahéi mba yélaa, ti lóóni masa kpɔ́kpɔngi gákala. Kɔlɔí sítii saa yélai ti gɛ́ɛ́ haí ɛ́ɣɛ ti híya gílii vɔ́nɛngɔ ti h̃u, tí tí laawóni, ti mɔ́ɔ kúnafɔ lɛ́ɛ́h̃u gɔ́lɔi laawó. Tí sáá yelái kɔsɔ́ni ngáá ti híya gílii ɛ́ɣɛ ti gɛ́ɛ́ hai kíya pɔnɛngɔ́ í ɣɛ́i la maa gɔ́lɔitii su.

¹³Sítii pa ti ɣɛ́i loní njɛ wu, njɛ́i í béi tí wa. Sítii ti háángɔ í ɣɛ́i la, saí í beí tí wa sítii pa ti ɣɛ́i saa yelái ti ỹándai tiyá bɛ́lɛ tí béi ti wa ngáá tí tí kpɛ́lɛɛ kɔ́sɔ kɔwɔ́ato ti gɛ́ɛ́ haí ɛ́ɣɛ ti híya gílii wa.

¹⁴Tí sái ɛ́ɣɛ saa yélai ti ỹándai vílini ngɔmbu hó ngwálai ya. Ngɔmbu hó ngwálai sí yá tɔ́ í ngáá saí helé kéle wómai.

¹⁵Sítii ti laahéingi vɔnɛ́ngɔ áá ɣɛ́i la kúnafɔ lɛ́ɛ́h̃u gɔ́lɔi h̃u tí tí vílini ngɔmbu hó ngwálai sí ya.