Read Bandi FAA YÁKƐ KƆ́LƆI 21 Bible Online

FAA YÁKƐ KƆ́LƆI 21 - Bandi bible

FAA YÁKƐ KƆ́LƆI 21

¹Kɛ ngí ngéleya ɛ́ɣɛ ndɔwɔlɔ́ níínai lɔ́nga. Hésendaa geleáitii í báha yívoi wa ti ỹɛ́ɛ́nɛi.

²Kɛ ngí Hɛ́ɛ́ma Láá Wálai lɔ́a, í ngáá Jɛlúsɛl̃ɛ niinaí áá gúla ngelegóóh̃u Ngalá ngelé kɛ́ kíli batɛ́ngɔ Ngalá mbɛ kíya nɔ́ɔ nyah̃á wɔ́lingɔ níína w̃aayílingɔ áá ɣɛ́ lá áá lí ngi h̃íỹɛ ngelé.

³Kɛ ngí ngoo wála ỹɛ́nia áá gúla Ngalángi w̃ása ngwalaí bɔ́kpɔngi ŋál̃aa véle. Ngói ná i ɣɛi ngáá sí, “Ngala ngí vaá nuu búsaitii ndoow̃a taá tiyéni ti ɣɛ ỹanda yílaa. Taá ɣɛ́ ngáá ngi vóngaa, laá gíte aa ɣɛ ti loow̃á í ɣɛ́ ngáá ti Yálangi.

⁴Aa ti yaah̃ú wɔ́lɔyɛi kpɛ́lɛɛ kpále ti yaah̃ú. Aáva sái ɛ́ɣɛ ndiihoolɛ́ ɛ́ɣɛ ngɔ́lɔ taá ndúwu ya fuulɛ́ ɛ́i mɔ́ɔ la ti w̃a kúnafɔ. Faa vɔ́lɔitii taa ɣɛ́ náa vilái.”

⁵Kɛ Ngalá lɛ́i í héini masa ngwálai bɔ́kpɔngi ya, i ɣɛa ta, “Nyá ngáá ŋani kpɛ́lɛɛ kpátɛ ngáá ngi níína.” Kɛ i ɣɛ́a má, “Ngoí sítii ngáá nde ti vɔ́nɛ bɔw̃álale tiyá lɔ́ ngáá tɔɔỹaá ɛ́ɣɛ tókola ma wóó.”

⁶Í mɔ́ɔ́ ɣɛ ta, “I vilánga! Nyá lɔ́ ngí ngáá hésenda w̃ɔ́i faa kpɛ́lɛɛ tɔ́kula héimai ɛ́ɣɛ ngakɛɛlɛ́ mɔ́i. Nuí fíli njɛ w̃ɔní áá ɣɛ́ ma, ngáá naa gúla kɛlɛ́ma mbɛ ngáá í njɛ́ w̃ááhɔlɔ áá ndɛɛh̃ú hé ngáá í kpɔ́le aáva ɛi sɔw̃ɔ he.

⁷Nuí fíli ngí ndái áá ndó ma, sí lɔ áá ɣɛ́ maa w̃ɔ́i yɛ, ná waa ngáá, ngáá ɣɛ́ ngáá Ngalá maa w̃ɔ́i hááw̃a, maa w̃ɔ́i va aa ɣɛ ngáá ní lóu.

⁸Kɛ́ sítii nduwá ndúwa ngáá ɣɛ́ tí h̃u Ngala fáá ɣɛndái h̃u, sítii taa lá ngáá Ngalá kɛ́ tɛ́i ndí ngu ma taa sítii taa híɣe Ngala péle giteí wa í báha sítii mba ti ngáá nuu váá mbélaa ɛ́ɣɛ kɔlɔsiyá mbélaa taa súkɛ yélaitii ɛ́ɣɛ kɔɔ kɔɔ́ ŋani hɛ́li mbélaitii taá ndɛ́ɛ yélai ti kpɛ́lɛɛ ti lííw̃ai waá ngáá ngɔmbu hó ngwálai h̃u ngɛ́i w̃ááku nyɔu ỹɔungí áá w̃ɔ́ ngwala kíya fukú í na i su. Saí helé kélei wómai va mil̃á.”

⁹Kɛ maléka ngɔ́felangɔi ngapúmaa haa bama ngɔfelangɔi í ɣɛ́i páningi h̃u suulaahéngɔ tí yaá, ngilángi i vaá ngéle, i ɣɛ má, “Vá, ngí Mbáálai Ỹáh̃a Niinaí ɣɛ́ ngáá í yé áá vá wálama ngeyá.”

¹⁰Hɛ́ɛ́ma Ỹínangi i vuí sú, malékai í lí ngáá ngé ngihé ngwálai wú mba. Í Hɛ́ɛ́ma Láá Wálai Jɛlúsɛl̃ɛ ɣɛ ngáá nge áá gúla ngelegóóh̃u Ngalá ngéle.

¹¹Ngalángi múw̃a muw̃angí i ɣɛi áá hólo na. Taa walái ná h̃úu í ɣɛ́i áá hólo kɛ kíya nɔ́ɔ dááma wɔtu ááyaa hólo, suu ɣɛngɔ́ kpál̃au.

¹²Sasa walá yá kóóh̃angɔ i ɣɛi taí sí w̃ááyele mbéleni aáva ndaí i ɣɛi mba púú maah̃ú féle. Ndaa púúngɔ maah̃ú félengɔi sí í ɣɛ́i sasaí wa, malékaitii ti ɣɛ́i na ngáá ngilá ngíla táá naa w̃ááh̃u béle. Sasaí ná laí yílaa fíli, ndaaheí ngílaa pɔ́nɛngɔ ɔ́ɔ́ ɣɛ́ la ndaabɔ́lungi w̃a. Ná wáa ngáá, nde kpambí púúngɔ maah̃úú félengɔitii Ísulɔ yélaitii su.

¹³Sasa walái sí laa púúngɔ maah̃úú félengɔi sítii kɔlɛngɔ́ i ɣɛi lá su ngáá seiw̃aá nááningɔ. I ɣɛi foló gúla veléi h̃uu véle sáwa, i seɣá h̃ú veleí h̃uu véle sáwa, i kɔlɔ́ɔ veleí h̃úu véle sáwa, i foló líí veléi h̃uu véle sáwa.

¹⁴Sasái sí í ɣɛ́i taa walái sí w̃a, i ɣɛi lóóni pɛ́lɛ ló kɔ́tu wala wala púúngɔ maah̃úú félengɔ w̃a. Kɔtuí nátii maa vá tɔ Ngalángi gééla púúngɔ maah̃úú félengɔitii tí Mbáálai hááw̃a ti laahéingaitii pɔnɛngɔ́ í ɣɛ́i lá ti w̃a.

¹⁵Malékai sí í yɛ́pɛni ngéle, suw̃á ngúlui i ɣɛi ngeyá kpatɛngɔ́ ngáá góólii. I ɣɛi ngeyá ngáá í táá walái ná h̃úw̃a la ɛ́ɣɛ sásai láitii taá máa hásai gite.

¹⁶Taa walái ná gáka nááningɔi kpɛ́lɛɛ máá í ɣɛ́i tɔ́iŋ. Malékai i taa walái na h̃úw̃ani ngáá suw̃á ngúlui. Maa wɔ́ɔ́lɔ kíli i ɣɛi ngáá mááli[2] tásu ngiláá hɔ́ndɔ ndɔ́ɔ́lungɔ ỹɔ́kɔ (1,500). Ngakóóh̃a kílii i ngáá mááli tásu ngiláá hɔ́ndɔ ndɔ́ɔ́lungɔ ỹɔ́kɔ.

¹⁷Malékai i mɔ́ɔ sasaí h̃úw̃ani aáva i ɣɛi ngáá kíya nɔ́ɔ nuu búsa h̃úw̃a mbóngɔ ngáá kɔwɔ́ ya hɔ́ndɔ félengɔ púú maah̃úú wɔhíta (216) ỹɔ́kɔ kpaɣá h̃u.

¹⁸Sasaí í ɣɛ́i taa walaí sí w̃a, tongɔ́ i ɣɛi lá ngáá kɔtu vandá kíya dááma wɔtu í na. Aáva taa walái ná butéi va, tongɔ́ i ɣɛi lá ngáá góólii kái káingi suu ɣɛngɔ́ kpál̃au kíya nɔ́ɔ mɛl̃ɛ mɛl̃ɛ.

¹⁹Pɛlɛ́ ló kɔ́tui nátii pa tí taa walaí sí w̃aa hásai lóni ti w̃a ti ɣɛ́i ngáá kɔtu vandá léé lée. Hésendaa wɔtuí í ɣɛ ngáá dááma wɔtu. Fele kélei i ɣɛi ngáá kɔtu boolé tííhaangi taá tóli ngáá sáfaya. Sawa kélei i ɣɛi ngáá kɔtu supu hupúngɔ taá tóli ngáá age. Naáni kélei i ngáá kɔtu boole taá tóli ngáá ímɛla.

²⁰Ndɔɔ́lu kélei i ɣɛi ngáá kɔtu wolé ngí lɛ́i ngi su taá tóli ngáá óni. Ngɔhíta kélei i ɣɛi ngáá kɔtu biỹángi taa tóli ngáá kaníl̃iỹɔ. Ngɔféla kélei i ɣɛi ngáá báhi wɔtui mbuu bóólengɔ taá tóli ngáá kulasolɛi. Ngwahákpa kélei i ɣɛi ngáá kɔtu boolé báhi i su taá tóli ngáá bɛle. Taávu kélei i ɣɛi ngáá báhi wɔ́tui taá tóli ngáá topa. Puu kélei i ɣɛi ngáá kɔtu wolé kɛ́ kúlo wuu lɛ́ingɔ taá tóli ngáá kasidóni. Púúngɔ maah̃úú yiláá kélei i ɣɛi ngáá kɔtu boolé ngi lɛ́i ngi su taá tóli ngáá tukɔi. Kɔtu púúngɔ maah̃úú hele kélei sí i ɣɛi ngáá kɔtu boolé ngi bíỹangi i su taá tóli ngáá amete.

²¹Ndaabɔ́lu púúngɔ maah̃úú félengɔitii ti ɣɛ́i sasaí ná wa, ngiláángi fíli kpatɛngɔ́ i ɣɛi lá ngáá kɔtu vandá yílaa maa bongóngɔ kúlo wolengɔ́, ná wáa ngáá, kɔtuí ná taa tolí ngáá pɛɛ. Peleítii ti taa walái ná h̃u, kpɛ́lɛɛ kpátɛngɔ i ɣɛi la ngáá góólii kái káingi ma ɣɛngɔ́ kpál̃au kíya nɔ́ɔ mɛl̃ɛ mɛl̃ɛ.

²²Ngáá Hɛ́ɛ́ma Yála Pɛ́lɛ lɔí taa walái ná h̃u, bɔw̃álale Ndemɔí Ngalá ɛ́ɣɛ Mbáálai tiyá lɔ́ tí ná ngáá Hɛ́ɛ́ma Yála Pɛ́lɛi hɔ́wɔ fíli.

²³Taa walái sí aa ɣɛi bɛndɛí fólo hááw̃a taá ngálu, bɔw̃álale Ngalángi múw̃a muw̃angí lɔ́ áá naa ɣɛ́ kpál̃au. Mbaalaí lɔ í ná ngáá lámbongi.

²⁴Naa hólongi lɔ áá ngélei sí kpɛ́lɛɛ súú ɣɛ kpál̃au nungái ti yéngengaitii faaw̃a. Ndɔwɔlɔ́ w̃ásangaitii kpɛ́lɛɛ taá vá ngáá tí bátɛitii na.

²⁵Taa walái ná w̃áa hásai láitii ndaawóngɔ aa ɣɛ nɔ́ɔ lá kúnafɔ, bɔw̃álale kpindí ɛ́i mɔ́ɔ vɛlɛ́ na.

²⁶Ngeléi sí wúu háá w̃aanɛɛnɛɛ ngwala walaítii ɛ́ɣɛ maa bátɛitii kpɛ́lɛɛ taá vá ngáá ti ye taa walái ná h̃u.

²⁷Sí fíli faa ỹɔ́u vóngi í mba, ɛi li taa walái ná h̃u. Ngufe tála haa ɣɛ́ mbélaa ɛ́ɣɛ ndɛɛ gɔ́ɔ́la mbélaa tɛ́i li taa walái ná h̃u. Sítii nɔ́ɔ léi táá vá liimá taa walái ná h̃u, aa ɣɛ ngáá sítii tí laahéingi vɔ́nɛngɔ kúnafɔ lɛ́ɛh̃u gɔ́lɔi h̃u í Mbáálai hááw̃a.