Read Bandi FAA YÁKƐ KƆ́LƆI 22 Bible Online

FAA YÁKƐ KƆ́LƆI 22 - Bandi bible

FAA YÁKƐ KƆ́LƆI 22

¹Malékai í mɔ́ɔ ndɛɛh̃ú w̃ááhɔlɔ njɛ́ wálai ɣɛ́i ngáá ngé ngaséɣengɔ kpál̃au kíya nɔ́ɔ mɛl̃ɛ mɛl̃ɛ í na. Njɛí sí i ɣɛi áá gúla mbéi Ngála ɛ́ɣɛ Mbaalaí ti w̃ása kpɔkpɔngí í na.

²Njɛí ná i ɣɛi peleí liiwáá í táá walái ná h̃u. Ndɛɛh̃ú w̃ááhɔlɔ ngúlui sítii taá wá yíla ngalú fíli su, ti láɣaitii pa ti ngáá salé ngeléi sí wuu yélaitii mbálo fááw̃a, ti ɣɛ́i njɛí ná góóɣaka félengɔi w̃a.

³Sí fíli pá Ngala péle ngáá ɣɛ́ mba, ɛi li taa walái ná h̃u. Ngalá ɛ́ɣɛ Mbáálai ti w̃ása kpɔkpɔngí aa ɣɛ taa walái ná h̃u aáva sítii ti ngáá Ngalángi yénge mbélaitii, taá ɣɛ́ taá fɛ́li na.

⁴Taá yááh̃u lá Ngalá ma aáva Ngalá ndaahéingi vɔ́nɛngɔ aa ɣɛ lá ti lavála.

⁵Kpindí ɛ́i mɔ́ɔ vɛlɛ taa walái ná h̃u aáva lámbo ɔɔ foló kpɛ́ndɛ ɛi mɔ́ɔ ɣɛ nungáitii mba bɔw̃álale Ndemɔí Ngála aa ɣɛ́ ngáá ti lámbo tiyá vá taá ɣɛ́ ngáá ndɔwɔlɔ́ w̃ásangaa kúnafɔ fááw̃a.

⁶Kɛ malékai i ɣɛa má, “Ngoí sítii kpɛ́lɛɛ yí mɛ́ningɔ tiyá lɔ́ ngáá tɔɔỹaá ɛ́ɣɛ tokolá ma wóo. Ndemɔí Ngála, lɛ́i í ngí Ỹínangi héngɔ laa háá lé mbélaitii ngeyá, í ngi w̃álekai lɔ́venga ngáá í ngákɛ ngáá ngi yénge mbélaitii sí kule í ma áá vá ɣɛ́ma h̃úmbuwa.”

⁷Jísu i ɣɛ ta, “A wolílo sí w̃a ngáá ndé! Nyáá ngáá vá h̃úmbuwa!” Aá lɔ ngáá faa vánda sítii faaw̃a táá híya ngáá Ngalá kééla woí sítii pɔnɛngɔ́ kɔlɔí sí h̃u!

⁸Nyɛ́i ngí ngáá Njɔú, ngí fái sí ỹɛ́nini aáva ngi kpɛ́lɛɛ súúlɔ. Ná ngí vílai kpɛ́lɛɛ mɛ́nima ɛ́ɣɛ súúlɔma, ngí hítɛi wúmbu yá malékai sí gákala í fái sítii kɛ́ni ngáá ngé ngáá ngí fɛli.

⁹Kɛ́ malékai i ɣɛi ma, “Yaa ná ɣɛ́! Ngalá tɔ́ nɔ́ɔ yáá fɛli. Nyá bɛ́lɛ nyá lɔ́ nɔ́ɔ ngáá Ngala ngénge mɔɔ́ kíya nɔ́ɔ yí na, ɛ́ɣɛ í mbála Yalá ndaa háá lé mbélai ɛ́ɣɛ sítii kpɛ́lɛɛ ti golongɔ́ ngoí sítii mbu tí kɔ́lɔi sí h̃u!”

¹⁰Kɛ malékai i ɣɛa má, “Yáá Ngalá kééla woí sítii ndɔɔwú tí kɔ́lɔi sí h̃u, bɔw̃álale, táingi fái sítii táá vá ɣɛ́ma ma, suu áá mɔ́ɔ gooh̃á.

¹¹Bɛlɛ́ nuí fíli í ngáá nyaama w̃ɔ́ɔ́, í ndí ngu ma ngáá ngi ỹááma gulandái. Nuí fíli pá í ngáá njɔlɔ w̃ɔ́ɔ́, í ndí ngu ma ngáá ngi yɔ́lɔ gulandái. Nuí vá í ngáá faa vánda ɣɛ́ mɔ́ɔ, í ndí ngu ma ngáá ngi háá vanda ɣɛndái ɛ́ɣɛ nuí sí vá kulangɔ́ áá ɣɛ́ la kɛlɛ́ma Ngalá mbɛ, í ndí ngu ma h̃íí na.”

¹²Jísu i ɣɛ ta, “A wolílo sí w̃a ngáá ndé! Nyáá ngáá vá h̃úmbuwa! Nyáá ngáá vá ngáá maaỹángaitii aáva ngáá fé nuí fíli ngeyá kɔwɔ́ato sí wa áá ɣɛ́ kɛ́ni.

¹³Nyá lɔ́ ngí ngáá hésendaa w̃ɔ́i faa kpɛ́lɛɛ tɔ́kula héimai ɛ́ɣɛ ngakɛ́ɛ́lɛ mɔ́i.”

¹⁴Aá lɔ́ ngáá faa vánda sítii faaw̃a ti ɣɛ kíli gulangɔ́ ngáá kíya nungáá taa w̃áá gúla wúya fó. Tiyá vá tɔ naa gúlangɔ kɛ́lɛma ti yɛ ngáá tí ngúlu wángi sí ỹɛ áá ndɛ́ɛ́h̃u gítei hé, ná vólu, ti wála sasaí lá tí lí taa walái h̃u.

¹⁵Kɛ́ sítii ti ngáá nyaama yélaitii ɛ́ɣɛ súkɛ gúla mbélaitii taa kɔlɔsiyá mbélaitii ɛ́ɣɛ nuu váa mbélaitii ɛ́ɣɛ sítii taá kɔɔ kɔɔ́ ŋániitii fɛ́li ɛ́ɣɛ sítii ti longɔ ngáá ndɛɛ gɔ́ɔ́landai, tɛí lí taa walái ná h̃u kúnafɔ.

¹⁶Jísu i mɔ́ɔ ɣɛ ta, “Nyɛ́i ngí ngáá Jísu, ngí ní w̃alékai lɔ́venga í fái sítii ndé wú kpɛ́lɛɛ má wú ngáá Ngala fɛ́li mbélaitii. Nyá lɔ́ ngáá Masangí Deevé lé kpámbii h̃uu w̃ɔ́ɔ, nyá lɔ́ múl̃ɔ ngí ngáá ngele su lémuleɣai ngáá hólo.”

¹⁷Hɛ́ɛ́ma Ỹínangi ɛ́ɣɛ Nyáh̃a Wɔ́lingɔ Níínai kɛ ti Ndemɔí Jísu lolínga, ti ɣɛ́ ma, “Vá!” Nuí fíli áá fái sí ỹɛ́ni, aá bɛ́lɛ kule lɔ́ má í ɣɛ́ tá, “Vá!” Nuí fíli njɛ́ bɔ́le mɔ́ni áá ɣɛ́ ma, í vá í ndɛɛh̃u w̃ááhɔlɔ njɛ́i sí bɔ́le aáva ɛi sɔw̃ɔ he.

¹⁸Nyɛ́i ngí ngáá Njɔú, nyá ngáá ndaahí kpákpa mbo ngáá wú kpɛ́lɛɛ ngáá wɛ́i wáá Ngalá kééla woí sítii mɛ́ni tí kɔ́lɔi sí h̃u, nuí fíli áá tá báha Ngala ngói sítii mba tí kɔ́lɔi sí h̃u, faa bámai sítii pɔnɛngɔ́ kɔ́lɔi sí h̃u, Ngalá ngáá kpaha maa w̃ɔ́i háá bamaí wa.

¹⁹Nuí fíli pá áá ta gúla Ngala ngói sítii mba ti kɔ́lɔi sí h̃u, Ngalá ngáá ta gúla hɛ́i sí wa í faaw̃a kɔlɔí sí h̃u, ná wáa ngáá, maa w̃ɔ́i ɛi ngulú wángi sí ta w̃ááhɔlɔ nuu áá ndɛ́ɛ́h̃u gítei w̃aahɔ́lɔ la. Ná vólu, ɛi li Hɛ́ɛ́ma Láá Wálai sí h̃u.

²⁰Nuí sí í lókoheingɔ fái sítii kpɛ́lɛɛ mbú ngáá kɛ tɔɔỹáá le i ɣɛ ta, “Ngí tɔɔỹái le í w̃á, nyáá ngaa vá h̃úmbuwa.” Amíína, Ndemɔí Jísu, vá.

²¹Bɛlɛ́ Ndemɔí Jísu haa bɔwɔí í ɣɛ́ wú kpɛ́lɛɛ mbɛ́.