Read Bandi FAA YÁKƐ KƆ́LƆI 4 Bible Online

FAA YÁKƐ KƆ́LƆI 4 - Bandi bible

FAA YÁKƐ KƆ́LƆI 4

¹Ná ná í gúlani su, ngí wɔ́lɛni ngí kó tɔ́ ndaawóngɔ ngelegóóh̃u. Ngoí sí ngí mɛ́ni hése kulangɔ́ ngáá búlu wóó ngí mɔ́ɔ mɛniní, i ɣɛ má, “Vá mbéi ngeleí yá. Nyá lɔ́ɔ vá kɛ́ma ngáá í yé sí kúle í ma í ɣɛ́ ná sí áá gúla su.”

²Ngáma nɔ́ɔ kɛ Hɛ́ɛ́ma Ỹínangi i vúnga sú, ngí ngelegóóh̃u lɔ masa ngwálai bɔ́kpɔngi i na nuí tá i héini su.

³Nuí ná w̃ɔ́i yááh̃ui i ɣɛí áá hólo kíya nɔ́ɔ dááma wɔtu ɛ́ɣɛ kɔtu biỹangí sí taá tolí ngáá kaníl̃iỹɔ. Ngí w̃ása kpɔkpɔngí w̃áá yelé mbélengɔ í ɣɛí lá ngáá ŋaní tá kulangɔ́ ngáá ngele gílangi áá hólo kíya nɔ́ɔ kɔtu booléi sí taa tolí ngáá ímɛla.

⁴Masa kpɔ́kpɔ púú félengɔ maah̃úú nááningɔ i ɣɛí masa ngwálai bɔ́kpɔngi w̃ááyele mbélengɔ. Kele ɣelé mbélaa púú félengɔ maah̃úú nááningɔ ti ɣɛ́i héini ti h̃u. Ti w̃ááyilingɔ ngáá kula wolé, masa mbɔ́ɔ́lɔi kpatɛngɔ́ ngáá góóli í vɛ́lɛi tí wú mba.

⁵Mbéi masa ngwálai bɔ́kpɔngi sí í na, ngeleí i ɣɛí áá ɣɛ́ na míỹa míỹa, ngele bandɛ́i áá bɔ́ɔ́lɔ na, ngoí yángi w̃ɔ́nu na. Ngalí ngɔ́felangɔ i ɣɛi lóni masa ngwálai bɔ́kpɔngi gákala áá hó. Ngalí ngɔ́felangɔi nátii tɔ ti ngáá Ngalangí ỹína ngɔ́felangɔitii.

⁶Masa ngwálai bɔ́kpɔngi ná wútuwɔi ɣɛngɔ́ i ɣɛi lá kíya nɔ́ɔ njɛ wála áá ɣɛ́ ỹanda, ngakɛ́ngɔ kpál̃au kíya nɔ́ɔ mɛl̃ɛ mɛl̃ɛ. Fulú wɔ́li nááningɔ ti ɣɛ́i masa ngwálai bɔ́kpɔngi ná w̃ááyele mbélengɔ ti yaah̃úi í ti w̃ááyele mbélengɔ, tɔ́ɔ vólu véle lɔ tí wútuwɔɔ lɔ́.

⁷Fulú wɔ́lingai nátii su, maifɔ́lɔ kélei gúlangɔ í ɣɛi lá ngáá njala ɣɛ kíli. Fele kélei gúlangɔ i ɣɛi lá ngáá nika hiná. Sawa kélei yaah̃úi gúlangɔ i ɣɛi lá ngáá nuu búsa yááh̃u bátɛ kíli. Nááni kélei gúlangɔ i ɣɛi lá ngáá koɣɛ áá yáá góvo.

⁸Kovóngi i ɣɛi fulú wɔ́li nááningɔi nátii mba ngáá ngɔhíta ngɔ́hita, ɛ́ɣɛ ti yaah̃úi i ɣɛi ti yelé mbélengɔ, ti góvongitii mbu ɣéle tɔ. Tiyá lɔ́ɔ nɔ́ɔ fɔ́ ngule hɔ́ɔ́lɛndaa ya kpindí p̃ɛ́ɛ́ taá foló. Ti ɣɛ́i taá ɣɛ́ ta, “Ndemɔí Ngála, lɛ́i í ngáá ngakpa mɔ́ɔ́ walaí faa ỹɔ́u fíli áá sú, lɛ́i í na kúnafɔ, lɛ́i í ɣɛ́i na wɔ́lɔ ɛ́ɣɛ lɛ́i áá vá vááma.”

⁹Fulú wɔ́li nááningɔi sítii ti ɣɛi taá Ngalá ndaaw̃áálɛ taá ngufema hé mbɛ́ taá sɛ́ɣɛɛ gulá ma ngule h̃u, lɛ́i í héini masa kpɔ́kpɔngi h̃u kúnafɔ taá ngí ndá gúnafɔ. Ná taá ná ɣɛ́,

¹⁰kele ɣéle mbélaa puú félengɔ maah̃úú nááningɔi nátii taá hítɛ wúmbu yá tíwaa síí w̃ɔ́i hɛ́li í héi masa kpɔ́kpɔngi h̃u, lɛ́i i ndɛɛh̃úi h̃u kúnafɔ taá ngí ndá gúnafɔ. Taá tí w̃ása mbɔ́ɔ́lɔitii kúla wú mba tí pú masa kpɔ́kpɔngi gakála, ti ɣɛ́ ta,

¹¹“Ni Lemɔ́i ɛ́ɣɛ ni Yálangi, yá lɔ́ í gúlaɣɛngɔ ngáá nuu ngáá yí sɛ́ɣɛɛ gula ma w̃ááhɔlɔ taá ngufema. Ná vólu, yí ndaaw̃áálɛ mááhɔlɔ í yákpangi hááw̃a. Sífaa yí ngélewu kpɛ́lɛɛ kpátɛngɔ aáva i ɣɛngɔ ngáá í háá h̃úubatɛ ngáá yí kɛ́ngɔ ngáá háwu tí ɣɛ́ na aáva yí ndɛɛh̃ú vú tí h̃u.”