Read Bandi FAA YÁKƐ KƆ́LƆI 6 Bible Online

FAA YÁKƐ KƆ́LƆI 6 - Bandi bible

FAA YÁKƐ KƆ́LƆI 6

¹Kɛ ngí Mbáálai lɔ́nga í hésendaa lokovongí w̃ááleve. Kɛ ngí fúlu wɔ́li nááningɔitii tí tá yíla ngóó ỹɛ́ninga í bɔ́ɔ́lɔ woo wála h̃ú kíya nɔ́ɔ ngele bandɛ́ ááyaa bɔ́ɔ́lɔ, í ɣɛ ta, “Vá!”

²Ná ngí wɔ́lɛni na, ngí sóó woléngi lɔ́ni lói. Soo woléngi sí híya mɔ́i kilángi ɛ́ɣɛ ndékpai i ɣɛi ngeyá, tí masa mbɔ́ɔ́lɔi he ngeyá. Soo woléngi sí híya mɔ́i gúlangɔ i ɣɛ́i lá ngáá wúluba ngi ndá áá ndó ma, i ɣɛi áá lí ngáá ngi ndá í ndóma múl̃ɔ kɔɔ h̃u.

³Kɛ Mbáálai í mɔ́ɔ tokovongí héle kélei w̃áálevenga. Kɛ ngí fúlu wɔ́lingi héle kélei woo ỹɛ́ninga, i ɣɛ ta, “Vá!”

⁴Kɛ ngí sóo veká lɔ́nga í gúla kpiỹángɔ. Tí ngakpá féi soo biỹángi sí híya mɔ́i yaá ngáá í vá ngáá kɔɔ ngeleí sí wú ngáá nuu búsa ááyaa ỹɔw̃ɔ́ ỹɔ́w̃ɔ váá. Tí mɔ́ɔ mbowá hɔ́kpɔ wála hení ngeyá.

⁵Kɛ Mbaalaí i mɔɔ tokovongí hawa kélei w̃áálevenga. Kɛ ngí mɔ́ɔ fúlu wɔ́lingi hawa kélei woo ỹɛ́ninga, i ɣɛ ta, “Vá!” Ná ngí wɔ́lɛni na, ngí soo lɛingí lɔ́ni lói na. Soo lɛingí sí híya mɔ́i, sikééli i ɣɛi ngeyá.

⁶Kɛ ngí mɔ́ɔ ngoí ta ỹɛ́ninga í ɣɛ́ nuu wóo áá gúla fúlu wɔ́li nááningɔitiini ndiiwáá, i ɣɛ ta, “Nungáá tɔ́ɔ ɣɛ́ taá yénge kp̃ái folói w̃a, tí kɔ́pu félengɔ kpé ngíya mɛɛní sí h̃u taa tolí ngáá wíítii ngáá maa gápangi ɔɔ ná náa láá lé, tí kɔ́pu ngɔ́hitangɔ kpé ngíya mɛɛní sí h̃u taa tolí ngáá báálei ngáá maa gápangi. Kɛ́ ndɔɔ yilíndai ɛ́ɣɛ ngúlɔ bátɛndai ti w̃áá álaa léve.”

⁷Kɛ Mbaalaí í mɔ́ɔ tokovongí nááni kélei w̃áálevenga. Kɛ ngí fúlu wɔ́lingai tí nááni kélei woo ỹɛ́ninga, i ɣɛ ta, “Vá!”

⁸Ná ngí wɔ́lɛni na, ngí soí tá lɔ́ni lói na maí i ngáá báhi wúú bóólengɔi. Soí sí híya mɔ́i laahéingi i ɣɛi ngáá Sái. Nuí síí w̃ɔ́i vá taá ɣɛ́ ma Saa Yeláitii Tí Ỹándai, i ɣɛi héini soí sí gɔ́ma Sái í ɣɛ́i áá síya. Tí ngákpa féni tí yaa ngáá nungáitii kpɛ́lɛɛ tí ngélewu tí wɔ́lɛ su ngáá séiw̃aa nááningɔ tí séiw̃aa yílangi váá ngáá kɔ́ɔ, ndɔlɛ, seebɛ ɛ́ɣɛ ngákpa suwaítii.

⁹Kɛ Mbaalaí í mɔ́ɔ́ tokovongí lɔ́ɔ́lu kélei w̃áálevenga. Ná ngí wɔ́lɛni na, sítii tí ɣɛ́i tí vááni ngí tí yáfuw̃angaitii tɔní Ngala sááɣa gúla tútui gakála. Tí tí vááni bɔw̃álale tí Ngalangí gééla woí léni aáva tí ló ma.

¹⁰Ti ɣɛ́i taá yɛ́pɛ woo wála h̃u, táa ɣɛ́ ta, “Ndemɔí Ngakpa Mɔ́ɔ́ Wálai, yɛ́i sí faa ỹɔ́u áá í h̃u aáva í lɔ́ɔ́ỹangɔ, kuí bɛ́ɛ́ lɔ́ áá fólo ma sítii tí ní váángɔ ngeléwu yɔ́ɔ́yaa tí waaléve ngáá táa vélei, yí fáá bá ndá tí w̃a?”

¹¹Tí tí yilá ngíla fíli kɔ́ni ngáá jogbo kóle. Tí ndé tí w̃a ngáá tí naa guló w̃áálɛlɛ nɛ́nɛ í ló sú kpóloo tiyɛ́i kule í tí w̃a tí sáá w̃ááhɔlɔ tí tí váá kíya nɔ́ɔ tiyá bɛ́lɛ tí tí vááni. Ná wáá ngáá, tí mbála Yalá fɛ́li mbélaitii tiyɛ́i táa yénge Ngála mbɛ́.

¹²Kɛ ngí Mbaalaí lɔ́nga í tókovongi wɔhíta kélei w̃ááleve. Ná í mááleveni, ndɔwɔlɔ́i í bɛ́lini ngwála, foloi i lɛ́i tí tí kíya nɔ́ɔ kula lɛí, ngalúngi í bíỹa kíya nɔ́ɔ ŋááw̃ɔ.

¹³Temúleɣaitii tí ɣɛ́i taá gúla ngeleí ya táá vú ndɔwɔlɔ́i wa kíya nɔ́ɔ fɛfɛ ngááyaa ngulú wa kpóóle vú mbu.

¹⁴Ná ná í gúlai su, ngeleí w̃áá i gálani kíya nɔ́ɔ taá sába w̃ááɣala í ỹɛ́ɛ́l̃ɛ. Ngihéitii kpɛ́lɛɛ ɛ́ɣɛ ndɔwɔlɔ́itii maayelé mbélengɔi ngáá njɛí ti gúlei.

¹⁵Kɛ ndɔwɔlɔ w̃ása ngwala waláitii ɛ́ɣɛ masangáitii taa kɔɔ wúlubaitii, ɛ́ɣɛ kpatɛ yélaitii taa ngákpa mbélaitii ɛ́ɣɛ nungáá vékaitii kpɛ́lɛɛ, ná wáá ngáa, nduwɔáitii ɛ́ɣɛ sítii táa ngáá nduwɔá, ti lɔ́ɔ́wu ndɔ́ɔ́wui kokongítii su ɛ́ɣɛ kɔtuítii mbu ti ngihéitii su.

¹⁶Nungái sítii tí woo gúlani, tí ɣɛ́ ngihéitii ɛ́ɣɛ kɔtuítii ma, “A vú ni w̃a, wú ni w̃áálɔɔwu nuí síí w̃ɔ́i yáa í héini masa ngwálai bɔ́kpɔngi yá ɛ́ɣɛ faá bámai áá gúla Mbaalaí yáa!

¹⁷Táingi i fólonga ma táá vá tí háá báma walaí láma nungáá w̃a aáva nuu fíli ɛi hombó ɔ́ɔ́ wúmaa wo sú.”