Read Bandi FAA YÁKƐ KƆ́LƆI 8 Bible Online

FAA YÁKƐ KƆ́LƆI 8 - Bandi bible

FAA YÁKƐ KƆ́LƆI 8

¹Ná ná í gúlani su, ngí Mbáálai lɔ́ni í tókovongi wɔ́fela kélei w̃ááleve. Ná í ná ɣɛ́i, ngelegóóh̃u í ɣɛ́i ló ndó háwa hikpɛ́ ndáá lówah̃u.

²Kɛ ngí mɔ́ɔ́ maléka ngɔ́felangɔitii tɔngá lóóni Ngala kakála. Ti búlui héni tí yaá ngáá ngilá ngíla.

³Kɛ maléka veka í váánga, í ló Ngala saáɣa gula tútui gakála góóli vaningí í ngeyá taá ngɛí w̃ááku nɛ́ɛ́ nɛɛngi sí w̃ɔ́ sú taa tolí ngáá ísɛngi. Tí ísɛngi héni ngeyá bih̃í ká ká ngáá í kpáha Ngalangí vóngaitii tí Yála fɛli ngói wa ngáá tí pú góóli haáɣa gula tútui w̃a í lóni masa kpɔ́kpɔngi gakála.

⁴Ísɛngi sí w̃ɔ ndúúlui ɛ́ɣɛ Ngalangí vóngaitii tí Yála fɛ́li ngóitii í ɣɛi áá gúla malékai sí yáa í lóni Ngalá kákala áá lɛ́.

⁵Kɛ malékai í ísɛ paningí sí yéɣenga í ndááhe ngáá Ngala saáɣa gula tútui h̃uu wɔ́mbui, í píli ngelewu. Ngele bandɛ́i í pɛ́lɛi bɔɔlɔ́ma, ngoí yángi í w̃ɔ́nu, ná vólu, ngeleí áá ɣɛ́ míỹa míỹa, ndɔwɔlɔ́i í bɛ́li.

⁶Kɛ maléka ngɔ́felangɔi nátii búlu ngɔ́felangɔi í tí yáa, tí ɣɛ́ kíli batɛngá ngáá tí tí hɛ.

⁷Kɛ maifɔ́lɔ málekai i ngí ndá búlui hɛ́nga. Ná í ná ɣɛ́ni, sakɔ́i ɛ́ɣɛ ngɔ́mbui supungɔ́ ngáá ŋaaw̃ɔí i ɣɛi áá yéi áá vú ngelewu. Ngelewu wɔ́lɛngɔ su ngáá seiw̃aá sáángɔ, seiw̃aá yílangi gɛ́ɣɛlai i w̃ɔní í báha suu wúluitii mba ɛ́ɣɛ tufa booléitii kpɛ́lɛɛ.

⁸Kɛ malékai hele kélei i ngi ndá búlui hɛ́nga. Ná í ná ɣɛ́ni, ŋaní tá kulangɔ́ ngáá ngihé ngwála ngɔmbu í mbá í víli yívoi wu. Yívoi wɔ́lɛngɔ su ngáá seiw̃áa sáángɔ, seiw̃aá yílangi gɛ́ɣɛlai i votení ngáá ŋaaw̃ɔ.

⁹Fúlu wɔ́lingaitii kínɛi ti ɣɛ́i mbu, ti yakɔ́lɛngɔ su ngáá seiw̃áa sáángɔ, seiw̃áa yílangi gɛ́ɣɛlai tí hááni, sitímaitii kínɛi tí ɣɛ́i nga, ti yakɔ́lɛngɔ su ngáá seiw̃áa sáángɔ, seiw̃aá yílangi gɛ́ɣɛlai i ỹaanií.

¹⁰Kɛ malékai háwa kélei i ngi ndá búlui hɛ́nga. Ná í ná ɣɛ́ni, temúleɣa wála yílaa i gúlai ngeleí ya íwaa w̃ɔ́ kíya nɔ́ɔ ngalí, í vú njɛítii ma. Ná wáá ngáa, njɛ wála wálaitii ɛ́ɣɛ njei yɛ́ gólo gulóaitii kpɛ́lɛɛ ngeleí sí wú ná kɔlɛmái áá ɣɛ́ sú sáwa, seiw̃aá yílangi gɛ́ɣɛlai lɔ́ í vúi ti w̃a.

¹¹Temúleɣai ná lááheingi wáá ngáá Ŋwal̃ángɔ. Ná njɛ́i ná wɔ́lɛmai áá ɣɛ́ sáwa, seiw̃aá yílangi gɛ́ɣɛlai i vóteni ngáá njɛ ŋwal̃á ŋwál̃a. Nungáá bih̃íngɔ tí hááni ná tí kpɔ́leni, bɔw̃álale ŋwal̃ángɔ i ɣɛi la.

¹²Kɛ malékai nááni kélei i ngi ndá búlui hɛ́nga. Ná í ná ɣɛ́ni, folóini ngaa ngalúngi ɛ́ɣɛ temúleɣaitii faa tá i ɣɛ́ni ngáá ti ye kɛinɔɔ́ ná ti holó táingi wɔ́lɛmai áá ɣɛ́ su ngáá sáwa sáwa, seiw̃aá yíla ngílangi ná i bindíí ngáá tálaa hólo.

¹³Kɛ ngí wɔ́lɛnga, ngí kóɣɛi lɔ́ áá góvo ngeleí yaá áá ndé woo wála h̃ú, áá ɣɛ́ ta, “Kpóó, kpóó, kpóó! Faa bámai í wɔ́ɔ́lɔ áá vá láma. Sí lɔ́ɔ ɣéle ɣɛ́ ngeleí sí wuu yélaitii ma, ná maléka sáángɔ vékaitii taá tí ndá búluitii fɛ.”