Read Banggai TEALIAN 11 Bible Online

TEALIAN 11 - Banggai bible

TEALIAN 11

¹Tumbeno, kobangsa-bangsa doi posaapon kodunia tolongo meeng konasilingan tukon yanila mapake bantilan-bantilan mopokakana.

²Doi tempo napoo bosikanano motaus taalikon doi tolopot, yanila polong doi meeng kopeak doi Babilonia, maka tataap dungol idoo.

³Yanila bantile meeng komian doi bailonggon, “Maimo nda mokubai batutela tukon ndasuayo polong matikas.” Bunomokai doiya yanila mangabos batutela tuuk bonua tukon teel tuuk pangalapoto.

⁴Yanila bantile, “Mai nda mokokondong kota tukon meeng komenara konakatandak polong doi timbu, sulano ndatongotoi tukon aki nda tasabukon doi posaapon kodunia.”

⁵Maka ko TEMENENO obulus tuuk mokitayo kota tukon menara bangkapi mokubaiyo tukon mokekendenge.

⁶Maka yana bantile, “Yanila nia meeng kobangsa tukon meeng konasilingan, tukon naiya sodo tambuun luwedoi yanila natetel. Aki namalumbit koidan yanila naikon moolamo kubaiyo oila konapoo mongiasan.

⁷Konamonondokan kita obulus tukon ponggobutikene konapoo silingan sulano yanila naaki napotoikon koidan meeng tukon bailon.”

⁸Bunomo doiya ko TEMENENO napoalaasanano yanila posaapon kodunia. Maka yanila tade mokubaiyo dokotadoo.

⁹Tobikon doiya dokotadoo sinombuikon Babel, sabab idoo ko TEMENENO nggabutemo sasaibino kobangsa nasilingan tukon luwe idoo ko TEMENENO poalaasene yanila doi posaapon kodunia.

¹⁰Naiyamo Sem nakatulunan. Lua kotaun salataa lapa koeaba mobabasal, sambuno Sem konaumur 100 kotaun, yana malaat meeng kopau malaneno, kosambuno Arpaksad.

¹¹Lapa doiya yana daano motubo 500 kotaun koidan, tukon malaat pau-pau bailon.

¹²Doi tempo Arpaksad naumur 35 kotaun yana malaat pau malaneno, kosambuno Selah.

¹³Lapa doiya Arpaksad daano motubo 403 kotaun koidan, tukon malaat pau-pau bailon.

¹⁴Doi tempo Selah naumur 30 kotaun, yana malaat pau malaneno, kosambuno Eber.

¹⁵Lapa doiya Selah daano motubo 403 kotaun koidan, tukon malaat pau-pau bailon.

¹⁶Doi tempo Eber naumur 34 kotaun, yana malaat pau malaneno, kosambuno Peleg.

¹⁷Lapa doiya Eber daano motubo 430 kotaun koidan, tukon malaat pau-pau bailon.

¹⁸Doi tempo Peleg naumur 30 kotaun, yana malaat pau malaneno, kosambuno Rehu.

¹⁹Lapa doiya Peleg daano motubo 209 kotaun koidan, tukon malaat pau-pau bailon.

²⁰Doi tempo Rehu naumur 32 kotaun, yana malaat pau malaneno, kosambuno Serug.

²¹Lapa doiya Rehu daano motubo 207 kotaun koidan, tukon malaat pau-pau bailon.

²²Doi tempo Serug naumur 30 kotaun, yana malaat pau malaneno, kosambuno Nahor.

²³Lapa doiya Serug daano motubo 200 kotaun koidan, tukon malaat pau-pau bailon.

²⁴Doi tempo Nahor naumur 29 kotaun, yana malaat pau malaneno, kosambuno Terah.

²⁵Lapa doiya Nahor daano motubo 119 kotaun koidan, tukon malaat pau-pau bailon.

²⁶Salataa Terah naumur 70 kotaun, yana malaat tolu konapau malaneno, doiyamo Abram, Nahor tukon Haran.

²⁷Naiyamo Terah nakatulunan: Abram, Nahor tukon Haran kotamano Terah. Haran daano konapau malaneno, kosambuno Lot.

²⁸Haran mate doi nalipu sinuungan, doiyamo Ur doi Babilonia, doi tempodoo tamano daano motubo.

²⁹Abram osowaan tukon Sarai, tukon Nahor poala tukon Milka Haran napau moluko. Haran daano konapau malaneno bailon kosambuno Yiska.

³⁰Sarai komba.

³¹Terah tinggale kokota Ur doi Babilonia polaing-laing tukon napau Abram, Lot natumbu, tukon Sarai namonianan, doiyamo Abram naboloki. Yana palaluuwo motaus doi lipu Kanaan. Bai kona polongan doi Haran, yanila tataapo imbali.

³²Tukon doi tampatoo koidan Terah mate kona umur 205 kotaun.