Read Banggai TEALIAN 12 Bible Online

TEALIAN 12 - Banggai bible

TEALIAN 12

¹ TEMENENO bantile doi Abram, “Tinggalemo komu lipu, mumotolutusan tukon tamamu nabonua, maka tauso doi lipu Yaku naikon motudoikonggon.

²Yaku naikon beenggon katulunan mobadaang tukon yanila naikon teali bangsa mobabasal. Yaku naikon balakaatikon tukon kubaiyo kosambumu tololongol, tobikon ikoo naikon teali balakaat.

³ Yaku naikon balakaatiyo komian-mian mobalakaatikon tukon kutuke komian-mian mokutuke ikoo. Tukon sabab ikoo Yaku naikon balakaatiyo sasaibino kobangsa doi dunia.”

⁴Abram naumur pitukolono lima kotaun doi tempo naotinggalano ko Haran pokokonoi tukon TEMENENO naparentah doi yana. Abram taus doi lipu Kanaan polaing-laing konaboloki Sarai, tukon napinaanak Lot, tukon sasaibino kona buat polaing-laing konaata-ata yanila molaate doi Haran. Salataa yanila polong doi Kanaan,

⁶Abram dadange dolipudoo polong yana lubat doi kayung karamat doi More, doiyamo tampat kaledaan doi Sikhem. (Doi tempodoo ko Kanaan miano daano modungoliyo dolipudoo.)

⁷ Ko TEMENENO okitakene kobutongo doi Abram tukon bantile doi yana, “Naiyamo dolipudoo naikon Yaku mobeekene doi mukatulunan.” Maka Abram mokokondong meeng komezbah idoo tuuk TEMENENO molapamo okitakene kobutongo doi yana.

⁸Lapa doiya yana banggadudukene konaambakonan doi lalom, doi lipu bunggul-bunggulo taalikon doi tolopot kokota Betel, tukon mokubai sandung doi napokalalatanan ko Betel taalikon talise tukon Ai taalikon doi tolopot. Idoo koidan yana kekendenge komezbah tukon sosubaiyo ko TEMENENO.

⁹Doibundu yana banggadudukene koidan konaambakonan luwedoi meeng kotampat doi tampat bailonggon, kona pinakatuu taalikon doi lalom kolipu Kanaan.

¹⁰Bai doi Kanaan daanomo komalaalan motodudulo tuuno, tobikon Abram taus lobian odoon koidan doi lalom, doi lipu Mesir sulano nadungol imbali polong domalaalanoo akiyono.

¹¹Doi tempo naikon napintosiiyano kopokalalatanan tukon usok doi lipu Mesir, yana bantilo doi naboloki Sarai, “Ikoo tambongan, kuboloki.

¹²Kalu ko Mesir miano kitayo ikoo, yanila anggenemo baikon ikoo kuboloki maka yaku tantu inakate tukon ikoo binatadikon tubo.

¹³ Jadi konamonondokan ikoo tongo bantile tolong baikon ikoo utusonggu boine sulano kusinodii tubo tukon kinita monondok sabab ikoo.”

¹⁴Tukon bisamo, salataa lapa Abram pintosiiyo kopokalala-tanan tukon polong doi lipu Mesir, ko Mesir miano kitayo baikon Sarai tambongan tuuno.

¹⁵Bubula komian pagauwe kamali kitayo yana tukon popitoikene doi tomundo boinedoo motambongan tuuno; tobikon doiya yana binaba doi tomundo nakamali.

¹⁶Tolongo Sarai, tomundo kitayo monondok Abram tukon beena doi yana ata-ata, domba-domba daango tukon mbembe, sapi, keledai tukon unta.

¹⁷Bai sabab tomundo alayo Sarai, ko TEMENENO lubatene kosesel-sesel tomundo matakutene tukon mian badaang doi kamalidoo lalomo.

¹⁸Maka tomundo uange Abram tukon masadai doi yana, “Oila komo lapamo ikoo lakukene doiyaku nia? Bulaando ikoo moaki mubontiikanaku baikon yana muboloki?

¹⁹Bulaando ikoo mobantile baikon yana utusomu pioto tukon sodiikene kualayo yana teali kuboloki? Naiya yana, muboloki; alayomo tukon tauso!”

²⁰Tomundo maparentahkene doi bubula konapagauwe tukon yanila tobuatenggene Abram doi lipudoo polaing-laing tukon naboloki tukon sasaibino komo daano doi yana.