Read Banggai TEALIAN 13 Bible Online

TEALIAN 13 - Banggai bible

TEALIAN 13

¹Abram tinggale ko Mesir tukon taus kosinalaano doi lembet, kona pinakituu doi taalikon lalom ko Kanaan tukon konaboloki polainggene sasaibino komo daano doi yana, tukon Lot koidan malaing.

²Abram kaasa tuuno; yana daano konadomba, mbembe, sapi, koidan perak tukon mosoni.

³Maka yana taus luwedoi meeng kotampat doi tampat bailon, kosinalaano doi Betel. Yana polong doi lipu napokalalatanan ko Betel tukon Ai doi tampat karamat doi loolukoo yana momokubai sandung

⁴tukon mokubai mezbah. Idoo yana sosubaiyo ko TEMENENO.

⁵Lot koidan daano kona kaluargaa tukon ata-ata maka domba, mbembe tukon sapi.

⁶Sabab butadoo idoo aki nabadaang kobulung padang tuuk napai dungoliyo luaila, sabab konapoo iyayon todudul badaang.

⁷Maka tealimo kopodangaanian antara Abram napadagai iyayon tukon Lot napadagai iyayon. (Doi tempodoo ko Kanaan miano tukon Feris miano daano modungoliyo butadoo.)

⁸Abram bantile doi Lot, “Kitania montolutus, aki namonondok kalu mumian tukon kumian sidutu podangaani.

⁹Tobikon doiya kona monondokan nda poalaas. Piliyomo nabutania taalikon inaando komu inias. Kalu ikoo taus taalikon naiya, yaku naikon taus taalikon doi bailon.”

¹⁰ Lot mbalenge potikunggon tukon kitayo baikon posaapon ko Yordan Pepelakono, polong doi kota Zoar badaang kopaisuno, bunomo TEMENENO Naasi kai buno Mesir butano. (Bunomo kondondoongo doi naakiyonan ko TEMENENO namanase kokota-kota Sodom tukon Gomora.)

¹¹Doibundu Lot piliyo sasaibino ko Yordan Pepelakono, maka taus taalikon doi tolopot. Bunomokai doiya domianoo molua napoalaasan.

¹²Abram tataap dungol doi lipu Kanaan, bai Lot mokubai sandung doi kota-kota doi peakoo polong loolani ko Sodom.

¹³Dokota Sodomoo tumbuno doiyamo mian-mian mokulokis tuuno tukon baladosa doi TEMENENO.

¹⁴Salataa Lot taus, ko TEMENENO bantile doi Abram, “Luwedoi mutampat kokondonganoo, mbalenge mono-monondok doi sasaibino komu mbinaleng;

¹⁵ Yaku naikon beekene doikoo tukon doi mukatulunan sasaibino kolipu domukinitadoo sulano nateali mupusaka sidutu posidutukon.

¹⁶Yaku naikon beena ikoo katulunan mobadaang tuuno, sampe akiyo mau meeng komian momoola aite yanila. Bunomo lakon komian aki namoola aite koambata doi buta, bunomo koidan komu katulunan aki naikon namoola inait.

¹⁷Diabudodoo dadange sasaibino nabutania, sabab Yaku naikon beekene doikoo.”

¹⁸Lapa doiya Abram biyele konasandung maka tataap dungol loolani kokayung-kayung karamat tampat kaledaan doi Mamre loolani ko Hebron, tukon idoo yana kekendenge ko balabaan tuuk TEMENENO.