Read Banggai TEALIAN 14 Bible Online

TEALIAN 14 - Banggai bible

TEALIAN 14

¹Sangkap kotomundo, doiyamo Amrafel doi Babilonia, Ariokh doi Elasar, Kedorlaomer luwedoi Elam tukon Tideal luwedoi Goyim,

²polobosi lawane lima kotomundo bailon, doiyamo: Bera luwedoi Sodom, Birsya luwedoi Gomora, Syinab luwedoi Adma, Semeber luwedoi Zeboim, tukon tomundo luwedoi Bela mosinombuikon koidan Zoar.

³Lima dotomundodoo pomeenggon tukon yanila pototongikene kosuludadu doi Sidim Pepelakono, dia budodoo sinombuikon Tobun Mate.

⁴Songulolua kotaun konakalumbit Tomundo Kedorlaomer nakuasaiyano yanila, bai doi taun kosongulono tolu, yanila nggimal lawane yana.

⁵Doi taun songulo sangkap lalomo, Kedorlaomer tukon motomboniiyo yana lubat tukon napoo suludadu tukon lungguiyomo ko Refaim miano doi Asyterot-Karnaim, Zuzim miano doi Ham, Emim miano doi Syawe-Kiryataim,

⁶tukon Hori miano doi Edom bunggulo, maka lelenggene yanila popupuson ko El-Paran doi padang lalomo bibilo.

⁷Lapa doiya molelenggenedoo bangabalinggon koidan tukon abali doi En-Mispat diabudodoo sinombuikon Kades. Yanila lungguiyo sasaibino kolipu Amalek tukon Amori miano modungol doi Hazezon-Tamar.

⁸Doibundu kotomundo-tomundo moluwedoi Sodom, Gomora, Adma, Zeboim tukon Bela yanila atule konasuludadu doi Sidim Pepelakono maka polobosi

⁹lawane kotomundo-tomundo moluwedoi Elam, Goyim, Babilonia, tukon Elasar; jadi lima kotomundo lawane sangkap kotomundo.

¹⁰Dopeakoo moono tukon bubung aspal, tukon doi tempo kotomundo moluwedoi Sodom tukon Gomora kakaate modambasene kobutongo doi polobosiyan, yanila tuwong doi bubung-bubungoo lalomo. Tolu kotomundo bailon lootonggono dampas doi bunggul-bunggul.

¹¹Sangkap kotomundo momanaang, lambase sasaibino komo daano doi Sodom tukon Gomora talaing kolobo kinaan, maka nataus.

¹²Lot Abram napinaanak modungol doi Sodom, tobikon doiya yana lakon musuh kanggiyo tukon sasaibino konabuat.

¹³Bai meeng komian momoola tosodii pelenggene sasaibino dokadadianoo doi Abram, Ibrani mianodoo. Abram dungol loolani kokayung-kayung karamat tampat kaledaan Mamre koona, meeng ko Amori miano. Mamre tukon utus-utuso, doiyamo Eskol tukon Aner daanoon tula-tulano mopomeenggon Abram.

¹⁴Salataa Abram lengele baikon konapinaanak takanggi doi musuh, yana pototongikene sasaibino komian doi nasandung lalomo doiyamo mopandoi polobosi, konakadaang tolu kosakato songulo alu komian, maka lelenggene sangkap dotomundodoo polong doi kota Dan.

¹⁵Idoo Abram ebe-ebese konamian bubula kotambuno, maka lobosiyo komusuh doi tempo popook tukon lungguiyomo yanila. Yana lelenggene yanila polong doi Hoba taalikon doi lembet doi kota Damsyik.

¹⁶Abram daano moola abalinggene kolangge-langge molapamo linambas, koidan Lot tukon sasaibino konabuat, tukon boine tukon natawanan bailonggon.

¹⁷Lapa Tomundo Kedorlaomer tukon tomundo-tomundo napomeenggonan kalah, Abram abali. Maka tomundo Sodom lolobotiyo yana doi Syawe Pepelakono mosinombuikon koidan Tomundo Pepelakono.

¹⁸ Melkisedek, Tomundo Salem motaaniyo koidan koimam Mian Bisa Moinakatandak Tuuno, makanggi roti tukon anggur tuuk Abram,

¹⁹maka balakaatio Abram, konabantilano, “Boliisi ko Mian Bisa Moinakatandak Tuuno, molapamo pasitakayo kotimbu tukon buta, nabalakaatio Abram!

²⁰Tanggaalo ko Mian Bisa Moinakatandak Tuuno, molapamo beekene doikoo komanaangan doi mumusu.” Salataa lapa doiya Abram beekene doi Melkisedek meeng koobos doi sasaibino kolangge molinambas molapamo yana babayo mule.

²¹Maka tomundo Sodom bantil doi Abram, “Alayomo dolanggedoo molinambas, bai yase moabalinggene sasaibino dakumian daango.”

²²Bai Abram timbiliyo, “Yaku batotopi doi TEMENENO salaano, Mian Bisa Moinakatandak Tuuno, Papasitaka timbu tukon buta,

²³baikon yaku aki naikon momangala oioila luwedoi koomu, kai meeng kobanang loloso kai meeng kopatolo kosandal aloso aki. Tukon buno doiya ikoo naikon aki namoola bantile, ‘Yakumo komo kubaiyo Abram teali kaasa.’

²⁴Aki kuiyase mangala oioila tuuk doi yaku susuunggu. Yaku tolongo mantalima oila komo lapamo daku mian-mian napinake. Bai sobiiyomo kotula-tulanggu kupomeenggonan, doiyamo Aner, Eskol tukon Mamre, naalayo konapoo obos.”