Read Banggai TEALIAN 16 Bible Online

TEALIAN 16 - Banggai bible

TEALIAN 16

¹Sarai, Abram naboloki, akiyonkai namalaat pau. Bai yana daano kona ata meeng komian moluwedoi Mesir, meeng koboine kosambuno Hagar.

²Sarai bantile doi Abram, “Ko TEMENENO aki namoolakene kumosuung pau. Tobikon doiya kona monondokan ikoo mupokooloi tukon daku ata nia. Baanggokai yana moola mosuung pau tuuk doiyaku.” Abram loingiyo Sarai nakakabi.

³Bunomo doiya Sarai beekene Hagar doi Abram sulano nateali boloki piala. Tempodoo Abram songulo kotaun doi Kanaan.

⁴Abram pokooloi tukon Hagar, maka boinedoo tianan. Bai salataa Hagar toiyo baikon motianano, yana teali babanggaal tukon akimo nakitayo monondok Sarai.

⁵Maka Sarai bantile doi Abram, “Yaku lapamo beekene Hagar kuata doikoo, tukon doi nataoiyano yana motianan, yana akimo nakitayo monondok yaku. Doiya musala. Boliisi ko TEMENENO naputusiyo napalakala nia antara ikoo tukon yaku.”

⁶Abram timbiliyo, “Monondoko, yana muata tukon ikoo balakuasa doi yana; atulemo komumongiasan doi yana.” Maka Sarai atule Hagar tukon todudul babalat, tobikon yana dampasene kobutongo.

⁷Ko TEMENENO namalaekat lubotiiyo Hagar loolani kopaisu matano doi padang lalomo doi loloon mobadombalaakon Sur padango lalomo.

⁸Domalaekatoo bantile, “Hagar Sarai naata, ikoo luwedoi yaa tukon muiyasano doiyaa?” Hagar timbiliyo, “Yaku dampas luwedoi Sarai kunyonya.”

⁹Domalaekatoo bantile, “Abalimo doi yana tukon leleaniyo yana.”

¹⁰Maka domalaekatoo bantile koidan, “Yaku naikon beekene doikoo badaang kopau tumbu, polong akiyo komeeng komian momoola aite yanila.

¹¹Akimo namalumbit ikoo naikon mosuungo pau malaneno; sombuikene yana Ismael, sabab ko TEMENENO lapamo lengele komu kinokiikon.

¹²Bai domupaudoo naikon tubo buno keledai mbosolo; yana naikon lawane memeeng komian, tukon memeeng komian naikon lawane yana. Yana naikon tubo tangalaas luwedoi sasaibino kona montolutusan.”

¹³Hagar sadaiyo konoano lalomo, “Kai bisa yaku mokitayo ko Mian Bisa mopalaatikanggene yaku?” Maka sombuikene TEMENENO, molapamo bantil-bantil doi yana, “Mian Bisa Mo Palaatikanggene.”

¹⁴Doiyamo kosababpo komian sombuikene kobubung doi napokalalatanan ko Kades tukon Baredtoo, “Yana Mo Tubo Nabubung Mo Palaatikanggene Yaku”.

¹⁵ Maka Hagar mosuungo meeng kopau malaneno, tukon Abram dotamanodoo, sombuikene donapaudoo Ismael.

¹⁶Doi tempodoo Abram kona umur alu kolono nom kotaun.