Read Banggai TEALIAN 17 Bible Online

TEALIAN 17 - Banggai bible

TEALIAN 17

¹Salataa Abram naumur sio kolonomo sio kotaun, ko TEMENENO okitakene kobutongo doi yana tukon bantile, “Yakumo ko Mian Bisa Mo Babasal konakuasa. Taatiyomo Yaku tukon lakukanggene sidutu Daku mongiasan.

²Yaku naikon mokubai perjanjian tukon ikoo tukon beenggon katulunan mobadaang.”

³Maka Abram tootukumo koduduso polong doi buta, doi bundu ko Mian Bisa bantile,

⁴ “Naiyamo koperjanjian Yaku mokubaiyo tukon ikoo: Yaku paladandi baikon ikoo naikon teali tama mbumbu badaang kobangsa. Tobikon doiya kosambumu bolikonokai Abram, bai Abraham.

⁶Yaku naikon beenggon pau tumbu mobadaang, tukon doi yaniladoo naikon daano komo teali tomundo-tomundo. Komu katulunan naikon badaang tuuno, sampe yanila naikon teali bangsa-bangsa.

⁷ Yaku naikon daanokene Daku perjanjian doikoo tukon doi mukatulunan koidan naturunan, tukon doiya perjanjianoo sidutu-posidutukon. Yaku naikon teali mu Mian Bisa tukon mukatulunan na Mian Bisa.

⁸ Yaku naikon beena doikoo tukon doi mukatulunan nabuta nia, modiabudodoo ikoo dungoliyo buno mian lubat-lubaton. Posaapon kobuta Kanaan naikon teali mupau tumbu koona tuuk sidutu posidutukon tukon Yaku naikon teali napoo Mian Bisa.”

⁹Ko Mian Bisa bantile koidan doi Abraham, “Ikoo kai sio musetia nai perjanjian nia, mau ikoo maulakon mukatulunan naturunan koidan.

¹⁰ Ikoo tukon sasaibino komu katulunan momala-malane sio nasinunat.

¹¹Tambuun luwe diabudodoo ikoo sio mumonggisunatene memeeng kopau mala-malane moalu kooloyo konaumur, tongusokon sasaibino koata mosinuung doi mubonua kai ikoo mooliyo. Dosunatoo naikon teali paloosan luwe perjanjian antara Yaku tukon komuyu.

¹³Memeeng komian sio nasinunat, tukon doiya naikon teali paloosan duniawi motudoikene baikon Daku perjanjian tukon ikoodoo posidutukon.

¹⁴Memeeng komalane moaki nasinunat akimo koidan naina-Ku kumian sabab yana akimo nabataani doi perjanjianoo.”

¹⁵Doibundu ko Mian Bisa bantile doi Abraham, “Ikoo inaimo koidan mouange komu boloki Sarai; tambuuno diabudodoo kosambuno Sara.

¹⁶Yaku naikon balakaatiyo yana tukon yana naikon mosuung meeng kopau malaneno naikon Yaku mobeekonggon. Oode, Yaku naikon balakaatiyo Sara, tukon yana naikon teali tina bambumbuan bangsa-bangsa. Doi yaniladoo nakatulunan naikon daano kotomundo-tomundo.”

¹⁷Maka Abraham tootuku tukon koduduso polong doi buta, bai yana kokumbit salataa napikikene, “Bulaa kona tealian meeng komala-malane mosakato kotaun konaumur momalaat pau? Bulaa kona tealian Sara momosuung pau doi tempo kona umur sio kolonomo kotaun?”

¹⁸Maka yana bantilo doi Mian Bisa, “Kona monondokan Ismael kai komo teali kupangalus.”

¹⁹Bai ko Mian Bisa bantile, “Aki, Sara muboloki naikon mosuung pau malaneno tukon ikoo naikon sombuikene Ishak. Yaku naikon setia doi Kuperjanjian tukon dopaudoo tukon nakatulunan tuuk sidutu posidutukon. Doperjanjianoo posidutukon.

²⁰Bai Yaku daanokene koidan komu kakabi tuuk Ismael. Tobikon doiya yana naikon Kubalakaatiyo tukon Yaku beena katulunan mobadaang. Yana naikon teali bambumbuan songulo lua kobenseno kapalano, tukon nakatulunan naikon Yaku tealikene meeng kobangsa mobabasal.

²¹Bai Daku perjanjian naikon Kukoonggoliyo tukon Ishak, mupaudoo Sara naikon mosuunge, taun doi salaando uga-ugaate doi tempo mobuno naiya.”

²²Salataa lapa bantile buno doiya, Mian Bisa tinggalemo Abraham.

²³Doi oloyodoo kai, Abraham taatiyo ko Mian Bisa tukon monggisunatene konapau Ismael, tukon sasaibino komala-malane doi nabonua lalomo, tongusokon konaata-ata mosinuung doi nabonua lalomo maukai moinoli.

²⁴Abraham kona umur sio kolonomo sio kotaun salataa yana sinunat,

²⁵tukon napau Ismael, kona umur songulomo tolu kotaun.

²⁶Yanila sinunat doi oloyo mopokakana,

²⁷posinggat-singgat tukon sasaibino Abraham naata-ata.