Read Banggai TEALIAN 19 Bible Online

TEALIAN 19 - Banggai bible

TEALIAN 19

¹Salataa lapa sampu doi Abraham, domalaekatoo luaila taus doi Sodom tukon polong imbali dopopookoo. Lot daano moosulang doi kotadoo tataapono, tukon salataa kitayo yanila, yana kokondong tuuk mololobotiyo yanila. Maka yana somba doi yanila salaano,

²tukon bantile, “Tuan-tuan, posambu doi kubonua. Tuan-tuan moola kumesiyo koaimuyu tukon pomoolomo doi kubonua. Modoa kalu komuyu yase, Tuan-tuan moola bangun dowa-dowa soono tukon banggadudukene kopoo ampakonan.” Bai yanila timbiliyo, “Kinatauwan, batadikenemo mbai moolo dimbaa, nai lapangan kota nia.”

³Lot kabiyo tukon tutuu, maka doi bundu yanila usok polaing yana doi nabonua lalomo. Lot sadiayo kokinaan momonondok tukon mokukus roti mobadaang, maka yanila kaano.

⁴Bai akiyon dotamu-tamudoo nataus moolo, ko Sodom miano mobadaang lobosiyo dobonuadoo. Sasaibino komala-malane doi kotadoo, mau momotuamo mau motatabokon daano idoo.

⁵ Yanila wookoniyo Lot, tukon masadaikene, “Inaando domian-mianoo molubat moolo doi mubonua? Salakanggene yanila, sulano mai moola posombuli tukon yanila!”

⁶Lot tobuat doi nabonua, tukon lapa tutupe kotataapon,

⁷yana bantile doi Sodomoo miano mobadaang, “Utus-utus, yaku kabiyo tukon tutuu, inai pokubaiyo kolangge mokulokisoo!

⁸Soba lengele, yaku daano kolua daku pau boine. Yaku salakanggene yanila doi komuyu tukon komuyu moola pokubaiyo oila tukon yanila. Bai inai pobulaandekene daku tamu-tamu nia; sabab yaku siyo kulindungiyo yanila.”

⁹Bai do Sodomoo miano mobadaang bantile doi Lot, “Taus! Ikoo mian lubat yase moatule kami? Ayo, taus! Kalu aki, ikoo naikon kami lobosikon lobian babalat doi mianoo moluailadoo.” Maka yanila dudunggene Lot tukon lobosiyo kabi namanase kotataapon.

¹⁰Bai dotamudoo luaila ulule kolimanoila tukon kedele Lot usok doi nabonua lalomo, maka tataapikene kotataapon.

¹¹ Yanila kubaiyo piit komatano sasaibino komian modaano doi bonuadoo tonggulungo, maka domian-mianoo akimo pososuunggene dotataaponoo koidan.

¹²Luaila dotamudoo bantile doi Lot, “Kalu ikoo daano komu pau malaneno, pau molukono, monianan kai montolutusan bailon modungol nai kota nia, tobiyo yanila tobuat luwe nai kota nia,

¹³sabab nakota nia naikon kami manasemo. Ko TEMENENO lapamo ndongoliiyo komian modungoliyo nakota nia nabantil-bantilan mobabalat, tukon kami binotokon sulano mai manase kokota Sodom.”

¹⁴Maka tauso Lot moduutiyo konapau lua nabibiyan, tukon bantile, “Mosobit tobuat luwe nai tampatia, sabab ko TEMENENO naikon manasemo.” Bai yanila anggene Lot tongo bapiada.

¹⁵Dowa-dowa soono, domalaekatoo luaila desaakemo Lot sulano namosobit taus. “Mosobit,” yanila bantile. “Tauso tukon muboloki tukon mupau boine moluaila luwe dimbaa, sulano naaki pomate kalu nakota nia minanaso.”

¹⁶ Lot balasaak. Bai ko TEMENENO seseange yana; tobikon doiya donatamu moluailadoo andane Lot tukon naboloki maka napau lua tobuat doi kota.

¹⁷Lapa doiya domalaekatoo meeng bantile, “Obulen, salamatene komu nyawa! Inai mombaleng doi tonggulungo tukon inai motade doi peak. Obulen doi bungkuko, sulano naaki pomate!”

¹⁸Bai Lot timbiliyo, “Aduh, Tuan inai mosumbolii kami moobulen doi bungkuko.

¹⁹Takainomo, Tuan lapamo tulungiyaku tuuno tukon salamatene daku nyawa. Bai dobungkukodoo dodoon tuuno; inai-inaikene dosilakaanoo nalaataku maka akiyon napolong indaa yaku matemo.

²⁰Kitayo, doi salaanggitadoo daano kokota mopoipoisik moaki natodudul odoon. Pataikene kuobulen dombalaa sulano kusalamat.”

²¹Domalaekatoo timbiliyo, “Monondok, dokotadoo poipoisik aki naikon kumanase.

²²Mosobit, obuleno! Sabab yaku akiyon namoola mokubai oioila kalu ikoo akiyon mupolong indaa.” Sabab Lot bantile dokotadoo poipoisik, maka dokotadoo sinombuikon Zoar.

²³Kooloyomatano sodo nasumbot Lot polongo doi Zoar.

²⁴ Sosinggot ko TEMENENO obulusene koudan belerang moano koaungo doi Sodom tukon Gomora.

²⁵Lua dokotadoo minanaso, koidan posaapon kopeak tukon sasaibino kolobo motubo maka sasaibino komo dungol idoo.

²⁶ Bai Lot naboloki mbalenge kotonggulungo, maka yana teali sudong timuson.

²⁷Modoakon kooloyono, dowa-dowa, Abraham soisoibit taus doi tampat nakokondongan doi TEMENENO salaano doi kolubabidoo kooloyono.

²⁸Yana mbaleng taambikon doi Sodom tukon Gomora tukon posaapon kopeak, tukon kitayo kotibolung mokobung luwedoi butadoo, buno tibolung moluwedoi poolu mobabasal.

²⁹Bunomo doiya, salataa ko Mian Bisa manase dokota-kotadoo doi peak doi yaando doi Lot nadungolan, ko Mian Bisa neneeke doi Abraham tukon tulungiyo Lot obulenggene kobutongo.

³⁰Sabab Lot matakut modungol tataap doi Zoar, maka yana taus doi bungkuko polaing-laing tukon napau moluko lua, maka dungol doi meeng koleeng lalomo.

³¹Pau molukono langgongo bantile doi utuso piyoto, “Kotamanggita motuamo, tukon doi sasaibino natano nia akiyono komala-malane momoola mondosoakene kita, sulano nda malaat pau.

³²Mai nda kubaiyo kotamanggita namalangu, maka nda moolo tukon yana sulano nda malaat pau.”

³³Dopopookoo yanila beena kotamano anggur, maka konapau langgongo moolo tukon tamano; bai tamano malangumo tuuno tobikon akimo natoiyo oila komo teali.

³⁴Modoakon kooloyono, dopaudoo langgongo bantile doi utuso piyoto, “Kolubongidoo yaku lapamo pokooloi tukon tamanggita! Naapa popook kita kubaiyo koidan yana namalangu. Maka mupokooloi tukon yana. Naapa kita suwe-suwele malaat pau.”

³⁵Bunomo doiya doi popokoo yanila kubaiyo Lot malangu, tukon napau koluano pokooloi yana. Tukon Lot todudulo kona malanguan koidan tobikon aki natoiyo oila komo teali.

³⁶Maka Lot napau luaila tianano sabab tamanoila susuungo.

³⁷Pau langgongo mosuung pau malaneno sinombuikon Moab. Yana teali Moab miano tumbunoila nia budodoo.

³⁸Pau koluano mosuung pau malaneno koidan mosinombuikon Ben-Ami. Yana teali bangsa Amon tumbunoila nia budodoo.