Read Banggai TEALIAN 21 Bible Online

TEALIAN 21 - Banggai bible

TEALIAN 21

¹Ko TEMENENO balakaatiyo Sara, buno komo lapamo dondiikene.

² Doi tempo molapamo Mian Bisa tantukanggene, salataa Abraham motuamo, Sara tianano maka suunge komeeng kopau malaneno.

³Abraham sombuikene dopaudoo Ishak;

⁴ tukon salataa Ishak naumur alu kooloyo, Abraham sunate yana, loingikene tukon Mian Bisa naparentah.

⁵Abraham konaumur sakato kotaun maka Ishak sinuung.

⁶Sara bantile, “Ko Mian Bisa lapamo kubaiyo yaku kokumbit sabab sanaang. Memeeng komian molengele nalangge nia naikon kokumbit polaing yaku.”

⁷Doibundu yana suungikene, “Indee budodoiyadoo komo moola bontiikene doi kulakai baikon yaku naikon susuwo kopau? Mau kulapamo mosuung koidan maukai dakulakai namotuamo tuuno.”

⁸Dopaudoo tosuungi babasal tukon doi oloyo yana tambuuno moinatade doi nasinusuan, Abraham mokubai lamean mobabasal.

⁹Daano kooloyo meeng, Ismael Abraham napau tukon Hagar boine Mesiroo, daano mopopiada tukon Ishak, Sara napau.

¹⁰ Sara kitayo dolanggedoo maka bantil doi Abraham, “Siikayo doata boinedoo polaing konapau. Aki namoola dopauboinedoo napau mantalima obos luwedoi mubuat moinaikon kupau Ishak mohaakiyo.”

¹¹Abraham aki nasanaanggene tuuno tukon dousulloo, sabab Ismael daanoon napau koidan.

¹² Bai ko Mian Bisa bantile doi Abraham, “Inaimo ikoo mobalasaak tentang muata Hagar tukon napaudoo. Loingiyomo Sara namongiasan, sabab lolo doi Ishak ikoo naikon malaat katulunan Yaku modondiikenedoo.

¹³Bunomo koidan doi Hagar napau naikon Kubeena badaang kopau tumbu sulano napoo teali meeng kobangsa. Sabab yana mupau koidan.”

¹⁴Modoakon kooloyono dowa-dowa soono, Abraham beena doi Hagar kinaan tukon meeng kopulukan kulit koantoko paisu tuuk namumuda doi loloon. Yana abese dopaudoo doi Hagar bengeno, tukon sumboliiyo boinedoo taus. Maka tauso Hagar tukon lausala doi Bersyeba padango lalomo.

¹⁵Salataa kabus kona paisu mandu, Hagar abese konapau doi mosolot lalomo,

¹⁶maka osulang uga-ugaate sakat kometer luwedoi tampatoo. Konoano lalom nabantilano, “Yaku aki kutahane mokitayo daku pau namate.” Maka yana kokiil.

¹⁷Ko Mian Bisa lengele Ismael alalo, tukon luwedoi timbu ko Mian Bisa namalaekat basilingoniiyo Hagar, bantile, “Oila komu sinusakon, Hagar? Inai momatakut. Ko Mian Bisa lengelemo komupau alalo.

¹⁸Tauso doi mupaudoo, bingkate tukon tanaanggene yana. Yaku naikon tealikene konakatulunan meeng kobangsa mobabasal.”

¹⁹Maka ko Mian Bisa kubaiyo Hagar kitayo tukon tontong, tobikon tokita doi yana komeeng kobubung. Maka yana tauso mototuiyo dopulukan kulitoo tukon paisu, doibundu yana beena konapau momonginum.

²⁰Ko Mian Bisa lolainge Ismael. Dopaudoo tosuungimo kona kabasal; yana dungol tataap doi Paran padango lalomo, tukon teali toloasu mopandoi.

²¹Kotinano osowaanggene yana tukon meeng ko Mesir miano boineno.

²² Tempodoo doiya Tomundo Abimelekh tukon Pikhol, nasuludadu kapalano, lubat doi Abraham tukon bantile, “Ko Mian Bisa tulunge ikoo doi sasaibino kolobo lalomo ikoo mokubaiyo.

²³Tobikon doiya, batotopimo dimbaa doi Mian Bisa salaano, baikon ikoo aki naikon mumokubai lokis doiyaku, maukai komo tuuk doi kupau-pau, kai kukatulunan. Bunomo yaku lapamo pomondokon noa doikoo, kubaiyomo buno doiya doi yaku tukon doi lipu ikoo modungoliyo nia.”

²⁴Abraham bantile, “Yaku batotopi.”

²⁵Bai doi bundu Abraham pelenggene kona minanasakon doi Abimelekh sabab dobubungoo lapamo dotomundodoo naata-ata lambase.

²⁶Abimelekh bantile, “Yaku aki kutoiyo indee komo lapamo lakukanggene. Aki naidan ikoo bontiikene doiyaku, tukon naiyamo kotumbeno luunggon daku longolano dolanggedoo kaliangano.”

²⁷Maka Abraham beekene kona domba meeng kotambuno tukon sapi doi Abimelekh, tukon luaila domianoo mokubaimo perjanjian.

²⁸Abraham mangalaasene pitu kodomba napau luwedoi nadomba tambuuno,

²⁹tukon Abimelekh mansadai doi yana, “Bulaando ikoo mokubaiyo dolanggedoo?”

³⁰Abraham timbiliyo, “Talimayomo nadomba nia napau mopitu buno pokakana paloosan Tuan naakuiyano baikon yakumo komo lapamo kaliyo nabubungia.”

³¹Bunomo doiya dotampatoo sinombuikon Bersyeba, sabab idoomo domianoo luaila nabatotopian.

³²Salataa lapa yanila kubaiyo koperjanjian doi Bersyeba, Abimelekh tukon Pikhol abali doi Filistin miano natano.

³³Maka Abraham masakakon meeng kokayung tamariska doi Bersyeba tukon doiyamo kona tambuunan dotampatoo kinubai tuuk sosubaan doi TEMENENO, Mian Bisa moposidutukon.

³⁴Lapa doiya Abraham dungol adukon malumbit doi Filistin miano natano.