Read Banggai TEALIAN 22 Bible Online

TEALIAN 22 - Banggai bible

TEALIAN 22

¹ Bubula kotempo doi bundu ko Mian Bisa ujiyo Abraham nasetiaan. Ko Mian Bisa uange, “Abraham!” Maka Abraham timbiliyo, “Oh, Temeneno.”

² Ko Mian Bisa bantile, “Tauso doi lipu Moria tukon Ishak, mupau momeeng, ikoo moseseange tuuno. Idoo, doi meeng kobunggul naikon Yaku motudoikonggon, sosubakenemo komupau buno sosubakon mosinua doiya-Ku.”

³Modoakon kooloyono dowa-dowa soono, Abraham mabata-batai kayung tuuk sosuba mosinua tukon boboikene kayungdoo doi nakeledai bunggono. Yana taus tukon Ishak tukon naata lua komian doi tampat Mian Bisa mobantiikene doi yana.

⁴Oloyo kotoluno Abraham kitayomo dolipudoo doi mododoonan.

⁵Maka yana bantile doi naata moluadoo, “Komuyu podungolo dimbaa tukon nakeledai nia. Yaku tukon kupau naikon taus imbali sulano sosubaiyo ko TEMENENO, naapa kami abali doi komuyu.”

⁶Abraham abese kayungdoo tuuk sosuba mosinuadoo doi Ishak bengeno, bai yana susuungo babayo kopiso tukon aung balano tuuk posua kayung. Salataa yanila ampakon polaing-laing,

⁷Ishak bantile, “Tama!” Abraham timbiliyo, “Daano kooila, ikoo dakupau?” Ishak masadai, “Kita makanggimo aung tukon kayung, bai inaando kodomba napau tuuk sosubakon mosinuadoo?”

⁸Abraham timbiliyo, “Mian Bisa susuungo naikon komo sadiayo kodomba napaudoo.” Maka ampakono banggadudul luaila.

⁹ Salataa yanila polong doi tampat Mian Bisa mobontiikene doi Abraham, yana kekendenge komeeng kobalabaan tukon posusunikene kayungdoo mosinua doi mezbahdoo bunggono. Maka yana boboiyo konapau tukon okooloyo doi balabaanoo doi kayung posua bunggono.

¹⁰Lapa doiya yana alayo kona piso naikon moakateyo konapau.

¹¹Bai ko TEMENENO namalaekat nggeleamon doi yana luwedoi timbu, “Abraham, Abraham!” Abraham timbiliyo, “Oh Temeneno!”

¹²“Inai ikoo mokollosiyo dopaudoo kai ikoo bula-bulaandekene yana,” TEMENENO bantil lolo doi malaekatoo. “Dia budodoo Yaku toiyomo baikon ikoo odotiiyo tukon taat doi Yaku, sabab ikoo aki mutolayo tuuk mosalakanggene komupau momeengoo doiya-Ku.”

¹³Maka Abraham mbaleng doi loolanian tukon kitayo komeeng kodomba langgilo mosambit kotanduko doi mosolot lalomo. Abraham alayo dodombadoo maka sosubakene doi TEMENENO kososuba mosinua posoboli napau.

¹⁴Abraham sombuikene dotampatoo, “TEMENENO sadiayo komo pinalaluu.” Tukon polong dia budodookai komian bantile, “TEMENENO sadiayo komo pinalaluu doi Nabunggul bunggono.”

¹⁵Idan koidan luwedoi timbu ko TEMENENO namalaekat nggeleamon doi Abraham,

¹⁶ “TEMENENO bantile: Yaku batotopi tukon Kosambunggu susuunggu, sabab ikoo lapamo lakukanggene nalangge nia tukon aki mutolayo tuuk mosalakanggene komupau momeengoo doiya-Ku.

¹⁷ Yaku naikon balakaatiyo ikoo lobi-lobian tukon Kubaiyo komu katulunan pokakana kobituwon pauno doi timbu kona kadaang pokakana kobone doi tobun bibilo. Komu pau tumbu naikon lungguiyo konapoo musuh-musuh.

¹⁸ Sasaibino kobangsa doi dunia naikon kabiyo doi Yaku sulano Kubalakaatiyo yanila buno lakon molapamo Yaku balakaatiyo komu katulunan — sabab ikoo lapamo taatiyo Daku parenta.”

¹⁹Salataa lapa doiya Abraham abalimo doi naatadoo molua, maka yanila polaing-laing taus doi Bersyeba, tukon Abraham manataapo imbali.

²⁰Abraham daano koutuso mobabasal kosambuno Nahor. Lapa dokadadianoo doi Moria bunggulo, Abraham lengele baikon Milka, Nahor naboloki daanoon koalu konapau malaneno, doiyamo:

²¹Us, kolanggongo; Bus, piyoto; Kemuel, modoi bundu teali Aram tamano;

²²Kesed, Hazo, Pildas, Yidlaf, tukon Betuel,

²³Nahor Abram utuso napoalaan Milka mosuung alu konapau modoi bundu teali Ribka tamano.

²⁴Nahor daano kona boloki piala kosambuno Reuma tukon naboloki pialadoo yana suunge Tebah, Gaham, Tahas tukon Maakha.