Read Banggai TEALIAN 23 Bible Online

TEALIAN 23 - Banggai bible

TEALIAN 23

¹Sambuno lapa Sara kona umur laatemo 127 kotaun,

²yana mate doi Hebron doi lipu Kanaan. Abraham poloon tukon kokiiliyo kona boloki namateanoo.

³Salataa doiya Abraham tinggalemo kona boloki bajano tukon taus doi Het miano mobadaang, modungoliyo dolipudoo. Yana bantile,

⁴ “Yaku nia mian lubat modungol doi Utus-utus nia nalipu; pataikenemo kumongoli buta sulano kumoola kibule daku boloki.”

⁵Yanila timbiliyo,

⁶“Kami odotiiyo i Tuan salaku katua mobukuan doi antara kami, jadi kibulemo Tuan naboloki doi bakubulan lalomo momonondok tuuno mokoonggami. Kami sasaibino lasayo sanaang mosadiakene kobakibulan motuuk doi Tuan naboloki.”

⁷Doibundu Abraham somba doi salaanoila,

⁸tukon bantile, “Kalu Utus-utus sanaang yaku mokibule daku boloki dimbaa, tulungiyaku kabiyo doi Efron, Zohar napau malaneno,

⁹sulano yana nabolukikene doiyaku Leeng Makhpela motangabos doi naasi bibilo. Monondoko kalu yana balukene butadoo dimbaa, tukon Utus-utuso sakisiiyo. Koolino naikon yaku beale sasaibino, sulano butadoo nateali yaku kotumbuno.”

¹⁰Doi tempodoo Efron susuungo daano moosulang tukon Het mianodoo doi tampat pososuungan doi kotadoo tataapono. Maka tukon sasaibino komian modaano idoo sakisiiyo, yana timbiliyo,

¹¹“Daku bangsa susuungo teali sakisii baikon doasidoo tukon doleengo yaku beekene sulano Tuan namoola kibule Tuan naboloki.”

¹²Maka Abraham somba doi Het mianodoo salaano,

¹³tukon sasaibino komian lengele, yana bantile doi Efron, “Soba pondongoliiyo yaku. Yaku yase oliyo posaapon doasidoo. Talimayomo kodoyno, sulano kukibule daku boloki idoo.”

¹⁴Efron timbiliyo,

¹⁵“Songobos kobuta koolino tolongo sangkap kosakato kodoy perak — oila koalatino doiya doi lua kita? Kibulemo Tuan naboloki idoo.”

¹⁶Abraham loingiyomo tukon doolinodoo. Yana mangaitene doy perak kona kadaang bunomo Efron nabantilano, doiyamo sangkap kosakato kodoy perak, pokokonoi koangga doy perak padagang mopakeo. Maka yana beale doi Efron, tukon sasaibino ko Het mianodoo sakisiiyo.

¹⁷Bunomo doiya Efron naasi motangabos doi Makhpela taambikon tolopot doi Mamre, tealimo Abraham kotumbuno. Doi butadoo komo daano asi tukon leengo maka sasaibino kokayung-kayungo tongusokon kokayung-kayung moano doi sipat-sipato.

¹⁸Sasaibino ko Het miano motololo doi pososuungganano lalomo doi kotadoo tataapono akuiyomo butadoo tealimo Abraham kotumbuno.

¹⁹Lapa doiya Abraham kibulemo kona boloki Sara doi leeng Makhpela lalomo doi tano Kanaan,

²⁰Bunomo doiya asi tukon leengo mobudodoo Het miano kotumbuno, tealimo Abraham kotumbuno tuuk buta bakibulan.