Read Banggai TEALIAN 24 Bible Online

TEALIAN 24 - Banggai bible

TEALIAN 24

¹Abraham motuamo tuuno, tukon ko TEMENENO balakaatiyo yana doi sasaibino kolangge.

²Daano kooloyo meeng Abraham bantile doi naata momotuamo tuuno, mouluse sasaibino konabuat, “Binggakene kolimamu doi kumaa.

³Batotopimo doi TEMENENO, Mian Bisa mokuasaiyo kotimbu tukon buta, baikon ikoo aki naikon mumounggoliikene boloki Ishak kupaudoo luwedoi antara mian badaang nai tano Kanaan nia.

⁴Ikoo sio muabali doi kulipu sinuungan sulano mumounggoliikene Ishak boloki doi antara kumontolutusan.”

⁵Maka doatadoo mansadai doi yana, “Bulaando kalu boinedoo aki naiyase otinggale kona bonua tukon aki naiyase laingaku doi lipu nia? Kai sio kubabayo Tuan napaudoo doi Tuan natano dungolan?”

⁶Bai Abraham timbiliyo, “Awas! Inaikai mobabayo daku paudoo dombalaa!

⁷Ko TEMENENO, Mian Bisa mokuasaiyo kotimbu, lapamo babayo yaku luwedoi tamanggu nabonua tukon luwedoi kumontolutusan natano, tukon yana lapamo batotopi doi yaku baikon yana naikon mobeekene natano nia doi kukatulunan. Yana koidan naikon bintekene konamalaekat tuuk motulungiyo ikoo, sulano mumoola pososuunggene komeeng koboloki luwe indaa tuuk kupau.

⁸Bai kalu boinedoo aki naiyase malaing tukon ikoo, maka ikoo tongosobii luwe nai totopi nia. Maukai nabulaandomo koidan, inai mobabayo daku paudoo dombalaa.”

⁹Doibundu doatadoo binggakene kolimano doi natuan Abraham namaa, tukon batotopi naikon mokubaiyo oila Abraham nakinabidoo.

¹⁰Doatadoo mangala songulo kounta tukon moisalomo kolangge kali-kaliangano modaano koanggano natuan koona tukon tauso doi kota Nahor nalipu dungolan moanoon motubo kona tangabosan doi Mesopotamia taambikon doi lembet.

¹¹Salataa yana polong idoo, yana atadeyo kona unta-untadoo sulano nabalasanaang loolani komeeng kobubung doi kota tonggulungo. Oloyo kinobiano, tukon doiyamo kotempono koboiboine nalubatan doi bubung tuuk momatambuk paisu.

¹²Maka doatadoo sambeang, “TEMENENO, kutuan Abraham na Mian Bisa, tulungiyo, sulano daku limang nadaano kohasilo doi oloyo nia; tapaatiyomo komu dandi doi kutuan Abraham.

¹³Kitayo, yaku kokondong loolani nabubungia. Naapakai koboiboine moluwedoi kota naikon lubat momatambuk paisu.

¹⁴Yaku naikon bantile doi meeng komian doi yanila, ‘Tulung obulusene komu tombuan tukon beenggu monginum.’ Kalu yana timbiliyo, ‘Monginum, tukon koidan Tama naunta-unta naikon yaku beena monginum!’ Yanamo ko TEMENENO nalinilik tuuk muata Ishak. Kalu dolanggedoo teali, yaku naikon toiyo baikon ko TEMENENO lapamo tapaatiyo konadandi doi kutuan Abraham.”

¹⁵Doi tempo nadaanoan mosambeang, Ribka, meeng koboine motambongan tuuno tukon daano mopauboinekon, polong doi bubungoo makanggi tombuan doi bengeno. Yana Betuel napau, tukon Betuel tamano tinano doiyamo Nahor tukon Milka; Nahor doo Abraham utuso langgongo. Ribka ampakon doi bubungoo tukon tambukiyo kona tombuan, maka ampakon abali.

¹⁶

¹⁷Abraham naata obulen koolaniyo tukon bantile, “Tulung, Pau, beena yaku monginum paisu doi mutombuanoo.”

¹⁸Boinedoo timbiliyo, “Monginum Tuan,” maka tukon mosobit yana obulusene kona tombuan doi bengeno, tukon polaing taaniyo dotombuanoo beenamo doatadoo momonginum.

¹⁹Salataa lapa doatadoo monginum; boinedoo bantile, “Yaku naikon matambuk paisu tuuk koidan Tama naunta-unta, sulano sasaibino doiyayonoo moola monginum nabiyai.”

²⁰Doibundu tukon mosobit kopaisu doi tombuanoo lalomo yana kundongiikene doi untadoo natampat monginuman lalomo, maka yana obulen abali doi bubung sulano namangauk paisu koidan mobadaang tuuno polong sasaibino doiyayonoo biyai momonginum.

²¹Daanoon Abraham naata banggadudul mokiteese aki namabantil mau meeng kobantilan. Yana yase toiyo oilakai ko TEMENENO kubaiyo yana daano kohasilo doi yana nalaksanakangganano kona limang kai aki.

²²Salataa lapa sasaibino kona unta biyai momonginum, Abraham naata mangala perhiasan mosoni moano kooli, maka konoikene doi boinedoo soongano. Doi botokono inusokon komeeng kopaal kokulaluk mosoni.

²³Maka doatadoo bantile, “Soba bantile indee kotamamu. Kai daano kotampat moolowan doi nabonua tuuk yaku tukon daku mian-mian?”

²⁴“Kotamanggu Betuel, Nahor napau tukon Milka,” boinedoo timbiliyo.

²⁵“Doi mai bonua daano kotampat moolowan tuuk Tama tukon koidan badaang kolaing tukon iyayon nakinaan.”

²⁶Maka atadoo tootuku mososubaiyo ko TEMENENO.

²⁷Yana bantile, “Nggaale ko TEMENENO, Abraham kutuan na Mian Bisa. TEMENENO tokita tapaatiyo konadandi doi kutuan Abraham. Yana andane yaku banggadudul doi namotolutusan.”

²⁸Doibundu boinedoo obulen doi tinano nabonua tukon salitayo sasaibino komo tealidoo.

²⁹Ribka daano komeeng komian koutuso langgongo kosambuno Laban. Yana lengele koutuso piyoto nasalita oila kokaliangano doatadoo nabinantil. Yana kitayo koidan kopalahiasan doi soongano tukon kulaluk doi utuso piyoto botokono. Maka Laban obulen tobuat doi bonua tuuk pososuung Abraham naatadoo modaano mokokondong tukon naunta-unta doi napololanikonan kobubung.

³⁰

³¹Maka Laban bantile, “Tama mian TEMENENO mobalakaatiyo! Inai modungol dimbaa tonggulungia. Mai doimai bonua. Kami lapamo sadiayo kokombiang tuuk i Tama tukon koidan tampat Tama naunta-unta.”

³²Maka doatadoo malaingo tukon usok doi bonuadoo lalomo. Laban obulusene dountadoo nabinaba, tukon beena laing tukon kinaan doi iyayon-iyayonoo. Lapa doiya yana mababamo paisu tuuk pokumesi Abraham naata aino tukon namian-mian.

³³Salataa sinidokiikon kokinaan, doatadoo bantile, “Yaku akiyon naikon kukaan kalu akiyon kupelenggene koteteba yaku mokanggiyo.” Laban bantile, “Basilingano.”

³⁴Maka Abraham naata tambuuno mobasilingan, konabantilano, “Yaku nia Abraham naata.

³⁵Ko TEMENENO balakaatiyo tuuno daku tuanoo tukon tealikene yana kaasa tuuno. TEMENENO lapamo beena doi yana badaang kodomba, mbembe, saapi, unta, keledai tukon koidan perak, mosoni, maka ata mala-malane tukon moluko.

³⁶Doi naumur motuamo, Sara, daku tuan naboloki lapamo mosuung pau malaneno, tukon daku tuan lapamo pusakaikene sasaibino kona buat doi napaudoo.

³⁷Yana sumboliyaku berjanji tukon totopi sulano taatiyo kona parenta. Kona bantilano, ‘Inai molilikene daku pau boloki luwedoi antara boi-boine doi tano Kanaania,

³⁸bai luwedoi antara tamanggu namotolutusan. Jadi tauso dombalaa tukon mosobit.’

³⁹Maka yaku masadai doi yana, ‘Bulaando kalu boinedoo aki naiyase lainge yaku?’

⁴⁰Maka yana timbiliyo, ‘TEMENENO mosidutu kutaatio, naikon mobinitokon Namalaekat tuuk natomboniiyo sulano komu limang daano kohasilo. Ikoo naikon pososuunggene koboloki tuuk kupau luwedoi antara pulinggu susuunggu, doiyamo luwe tamanggu namotolutusan.

⁴¹Tolongo kalu yanila tolakemo ikoo, maka nasodo ikoo tongosobii doi mutotopi.’

⁴²Tukon salataa yaku polong budoo doi bubung, yaku sambeang doi noanggu lalomo, ‘TEMENENO, Abraham kutuan na Mian Bisa, sio kai TEMENENO nakubaiyo daku limang nabalahasil.

⁴³Yaku tataap kokondong lolani nai bubungia. Banggokai meeng koboine lubat matambuk paisu, yaku naikon kabiyo doi yana sulano nabinee monginum.

⁴⁴Kalu yana yase kubaiyo, tukon baasiyo koidan sulano nabeena monginum daku unta-unta, maka yanamo kai ko TEMENENO naililik moteali kutuan napau nabolokidoo.’

⁴⁵Akiyoon koidan kulapa mosambeang doi noanggu lalomo, lubato Ribka mababa tombuan doi bengeno bunggono maka mangala paisu doi bubung. Doibundu yaku bantile doi yana, ‘Tulunge yaku beena monginum.’

⁴⁶Tukon mosobit yana obulusene kona tombuanoo doi bengeno tukon bantile, ‘Monginumo, tukon Tama naunta-untadoo naikon yaku beena monginum.’ Maka yaku monginum tukon lapa doiya daku unta-untadoo koidan beena monginum.

⁴⁷Lapa doiya yaku masadai, ‘Indee kotamamu?’ Tukon yana timbiliyo, ‘Kotamanggu Betuel, Nahor tukon Milka napau.’ Maka yaku konoikene kopolohiasan mosoni doi songano tukon kulaluk meeng kopaal doi botokono.

⁴⁸Yaku tootuku tukon sosuba nggaale ko TEMENENO, kutuan Abraham na Mian Bisa. Yana lapamo lolainge yaku polong dimbaa; doi kutuan namotolutusan, tobikon yaku moola pososuung naboinenia tuuk doi napau.

⁴⁹Dia budodoo, kalu komuyu balasadia talimayo daku tuan tukon monondok tukon daano komuyu balatanggung jawab doi yana buno utus, namoola nyatakanggene doi yaku, bai kalu aki, bantilemo kai koidan, sulano kutoiyo sio oila daku kinabai.”

⁵⁰Laban tukon Betuel timbiliyo, “Sabab oila komo teali nia luwedoi TEMENENO, kami aki namoola mebee kaputusan.

⁵¹Naiya Ribka; sodiyomo yana lainge doi Tama tukon teali mu Tuan napau naboloki, bunomo TEMENENO susungo nabinantil.”

⁵²Salataa Abraham naatadoo lengele yanila nabantilan, yana tootuku sosuba doi TEMENENO.

⁵³Maka yana idute kona pakeyan, perhiasan perak tukon mosoni, tukon beekene sasaibinodoo doi Ribka. Koidan utuso langgongo tukon tinano binee palaseng momamaaling.

⁵⁴Lapa doiya Abraham naata tukon napolalaing kaan tukon inum, maka moolomo idoo. Salataa yanila bangun modoakon kooloyo, atadoo bantile, “Pataikenemo yaku kumule doi kutuan.”

⁵⁵Bai utuso langgongo tukon Ribka tinano bantile, “Sodiyomo Ribka nadungol doi kami uga-ugaate meeng kominggu kai songulo kooloyo koidan, tukon lapa doiya moolamo yana taus.”

⁵⁶Bai atadoo bantile, “Inai motaane yaku.TEMENENO kubaiyo daku ampakonan daano kohasilo; pataikenemo kumule doi kutuanoo.”

⁵⁷Yanila timbiliyo, “Mai nda uange Ribka tukon masadaikene kona pandapat.”

⁵⁸Maka yanila uange Ribka tukon masadai, “Ikoo yase lainge namiania?” Boinedoo timbiliyo, “Oode, yaku yase.”

⁵⁹Maka yanila pataikene Ribka tukon moteenake taus tukon Abraham naata tukon namian badaang. Maka yanila balakaatiyo Ribka tukon bantilan-bantilan nia, “Boliisi ikoo Ribka, muteali tinano doi libuso komian! Boliisi komu katulunan nalungguiyo komusuh nakota-kota!”

⁶⁰

⁶¹Doibundu Ribka batotobomo tukon boi-boine mongula moteali naata, maka lakit doi unta tukon taus lainge Abraham naatadoo.

⁶²Daanoon buno doiya Ishak lubato luwedoi padang lalomo, loloiyo kobubung mosinombuikon “Yana Mo Palahatikanggene Yaku” tukon dungol taambikon lalom ko Kanaan.

⁶³Doi meeng kokinobian yana tobuat doi nasandung mopapakon doi naasi, maka nakitayo kounta-unta molubat.

⁶⁴Salataa Ribka kitayo Ishak, yana obulus doi naunta,

⁶⁵tukon masadai doi Abraham naatadoo, “Indee komiano mala-malane doi asidoo molubat doi salaanggita?” “Yana kutuan,” atadoo timbiliyo. Maka Ribka alayo kona kokudung tukon tutupikene koduduso.

⁶⁶Doibundu atadoo salitaikene doi Ishak sasaibino komo lapamo yana lakukanggene.

⁶⁷Lapa doiya Ishak babayo Ribka usok doi tinano Sara nasandung lalomo, tukon yana babolokikene Ribka. Ishak seange Ribka; maka sanaango Ishak noano mosusa sabab kotinano momatemo.