Read Banggai TEALIAN 28 Bible Online

TEALIAN 28 - Banggai bible

TEALIAN 28

¹Doibundu Ishak uange Yakub, maka balakaatiyo yana maka bantile, “Inaimo moosowaan tukon Kanaan boineno.

²Tauso doi Mesopotamia, doi Betuel nakaluargaa, mutauwa, tukon pokilamo komu pinatama Laban napau.

³Boliisi ko Mian Bisa Mo Babasal konakuasa nabalakaatiyo komu osowaanan tukon beekene doikoo kopau tumbu mobadaang, tobikon ikoo teali tumbunoila doi badaang kobangsa!

⁴ Boliisi ko TEMENENO nabalakaatiyo ikoo tukon mukatulunan bunomo lakon Abraham molapamo binalakaati, tukon boliisi ikoo nadaano komu buta dinungoli dimbaa, molapamo Mian Bisa beekene doi Abraham!”

⁵Bunomo doiya Ishak sodiiyo Yakub taus doi Mesopotamia, doi Laban, Betuel napau Aram mianodoo. Laban Ribka utuso langgongo Yakub tukon Esau tinano.

⁶Esau lengele baikon Ishak lapamo balakaatiyo Yakub tukon sodiiyo yana taus doi Mesopotamia sulano namounggolii boloki idoo. Koidan baikon doi tempo Ishak balakaatiyo Yakub, yana pantane Yakub osowaan tukon boine Kanaan.

⁷Sangalaasan doiya Esau toiyo baikon Yakub taatiyo tamano tinano nabantilan tukon lapamo ampakon doi Mesopotamia.

⁸Esau mangalatikenemo baikon Ishak, tamano, aki naiyase komoluko Kanaan,

⁹tobikon doiya Esau taus doi Ismael, Abraham napau, maka osowaan tukon Ismael napau kosambuno Mahalat, Nebayot utuso pioto.

¹⁰Yakub tinggale ko Bersyeba tukon ampakon doi Haran.

¹¹Salataa sosoop kooloyo yana polong doi meeng kotampat, maka moolomo idoo. Yana nggonggolonggon yase momoolo; kooluno batangunanggene komeeng kobatu.

¹² Doibundu yana olumon baikon yana kitayo komeeng kotukal mokokondong doi buta tukon kobunduno laate kotimbu tukon malaekat-malaekat obulus liba doi tukaloo.

¹³ Tukon doi bibilo TEMENENO kokondong tukon bantile, “Yakumo ko TEMENENO Abraham nangginaal tukon Ishak. Yaku naikon beekene doi koo tukon doi mukatulunan nabutania tampat ikoo nggonggolonggon.

¹⁴ Komu katulunan naikon kona kadaang buno ambata doi dunia. Yanila naikon kebelake yanila nawilayah doi sasaibino kona sinasalaan, tukon lolo ikoo tukon mukatulunan, Yaku naikon balakaatiyo sasaibino kobangsa doi dunia.

¹⁵Neneeke, Yaku naikon tulungiyo tukon lindungiyo ikoo, inaandomo komu tausan, tukon Yaku naikon babayo ikoo abali nai lipu nia. Yaku aki naikon otinggale ikoo polong lapa Kulakukene oila sasaibino Yaku mojanjikan doi koo.”

¹⁶Maka Yakub bangun luwedoi namooloan tukon bantile, “TEMENENO daano dimbaa, doi tampatia, bai sodo diabudodoo yaku motoiyo!”

¹⁷Yana teali matakut maka bantile, “Bukamaen daku matakutanano natampatia! Tantumo naiya Mian Bisa nabonua, surgaa tataapono.”

¹⁸Modoakon kooloyo dowa-dowa soono, Yakub bangun maka mangala batu nakinubai tangunan tukon kekendenge teali batu moinonook. Yana kundongiiyo zaitun lisisono doi batudoo bunggono sulano nainalaas tongo tuuk Mian Bisa.

¹⁹Tampatoo yana sombuikene Betel. (Loluk kosambuno Lus.)

²⁰Maka Yakub batotopi, “Kalu TEMENENO tulungiyo tukon lindungiyo yaku doi kuampakonan nia tukon beena yaku kinaan tukon pakeyan

²¹kalu yaku abali doi tamanggu nabonua tukon salamat, TEMENENO naikon teali ku Mian Bisa.

²²Tukon yaku naikon beekene doi TEMENENO songulo koobos luwedoi sasaibino kolobo TEMENENO mobeekene doi yaku. Batu moinonook yaku mokekendenge nia naikon teali tampat nggaalano ko TEMENENO.”