Read Banggai TEALIAN 3 Bible Online

TEALIAN 3 - Banggai bible

TEALIAN 3

¹ Binda daanoon iyayon motodudul pandoi doi sasaibino koiyayon TEMENENO Mian Bisa natinealikon. Dobindadoo masadai doi boinedoo, “Kabudoon ko Mian Bisa tutuu mopantane komiu mokaane sasaibino nakayungnia saono doi asi nia?”

²“Kami moola makaan doi memeeng kokayung nia saono doi asi nia lalomo,” boinedoo timbiliyo,

³“alaasene luwedoi kayung modaano doi asidoo tanga-tangano. Ko Mian Bisa pantane kami mokaane kai singgile kayungdoo saono; kalu kami kubaiyo, kami naikon mate.”

⁴Dobindadoo timbiliyo, “Doiya aki nabisa; komiu aki naikon pomate.

⁵Mian Bisa bantile buno doiya sabab Yana toiyo kalu komiu kaane kosaonodoo, kopoo pikilan naikon tabuka; komiu naikon teali buno Mian Bisa tukon toiyo oila komo monondok tukon oila komo kulokis.”

⁶Boinedoo kitayo baikon kayungdoo tambongan, tukon kosaono tokita maamis nakinaan. Tukon yana pikikene bukamaen kona monondokan kalu yana teali pandoi. Tobikon doiya yana mopupu kayungdoo saono, maka yana kaane, tukon koidan beena kona langkai, tukon kona langkai makaano.

⁷Kosobiton sambuno lapa yanila kaane kayungdoo saono, tobukamo konapai pikilan tukon yanila toiyomo baikon yanila talalau. Tobikon doiya yanila sunggupiyo kobutongoila tukon ara loono yanila mopoonomiikene.

⁸Kinobianoo yanila ndongoliiyo ko TEMENENO Mian Bisa moampakon doi asidoo lalomo, maka yanila luaila sapit doi kayung-kayung lalomo sulano ko TEMENENO naaki nakitayo.

⁹Bai ko TEMENENO Mian Bisa uange malanedoo, “Inandomo ikoo?”

¹⁰Malanedoo timbiliyo, “Yaku lengele Ikoo doi asi; yaku matakut tobikon kusapit sabab yaku talalau.”

¹¹“Indee komo bantile baikon ikoo talalau?” Mian Bisa sadaiyo. “Kai ikoo kaanemo kayungdoo saono Kupinatanggon mokaane?”

¹²Mala-malanedoo timbiliyo, “Boinedoo Ikoo mobeekene sulano nakotulayo yaku lapamo beena doiyaku kayungdoo saono maka yaku kaanemo.”

¹³ TEMENENO Mian Bisa sadaiyo boinedoo, “Bulaando ikoo mokubaiyo doiya?” Yana timbiliyo, “Binda komo akakanaku, tobikon kukaane saonodoo.”

¹⁴Lapa doiya ko TEMENENO Mian Bisa bantile doi bindadoo, “Ikoo naikon inukum sabab domukokubaidoo; doi sasaibino koiyayon tolongo ikoo komo sio mutanggunge nakatula nia: Tambuun budodoiya ikoo naikon landa tukon tiamu, tukon kaane koambata polong pomatekon.

¹⁵ Ikoo tukon boinedoo naikon pomosikiton, kona katulunan tukon mukatulunan naikon sidutu pomusu-musu. Kona katulunan naikon takuliyo koolumu, tukon ikoo naikon kakate yanila totunano.”

¹⁶Maka ko TEMENENO bantile doi boinedoo, “Yaku naikon suungiyo komu sakisaawan doi mutiananan tukon doi mumosuungan. Bai mau nabuno doiya, ikoo daano tataap pomomooton tukon mulangkai, mau ikoo naikon molongol doi yana.”

¹⁷ Maka ko TEMENENO bantile doi malanedoo, “Ikoo loingiyomo komu boloki nasilingan maka kaane kayungdoo saono molapamo Yaku patanggene ikoo mokaanne. Sabab domukokubaidoo, katulaono kobuta. Ikoo sio mubalimang kakabukuan pomatekon sulano nabuta nia naano kohasilo ndemel mosabe doikoo.

¹⁸Nabutania naikon kohasilo mosolot tukon sonit tuuk doikoo, tukon kayung moaki napiniala naikon teali pokinaan.

¹⁹Ikoo naikon balimang tukon sakisaa tukon bubul komu lumbos tuuk kubaiyo nabutania nadaano kohasilo polong ikoo abali doi buta, sabab luwedoi buta komu kinubaiyan. Ikoo tinealikon luwedoi buta, tukon ikoo koidan abali doi buta.”

²⁰Adam sombuikene konaboloki Hawa, sabab boinedoo teali tinano sasaibino kobangkapi.

²¹Maka ko TEMENENO Mian Bisa mokubai pakeyan luwedoi iyayon kulito tuuk Adam tukon naboloki, maka pekeikene doi yanila.

²² TEMENENO Mian Bisa bantile, “Dia budodoo bangkapi lapamo teali buno Kita tukon daano kona motoiyan kaliangano momonondok tukon mokulokis. Jadi sio napinantanggon yana makaan kayung saono momebee tuboan, sulano yana naaki natubo tuuk sidutu posidutukon.”

²³Maka ko TEMENENO Mian Bisa siikayo dobanggapidoo doi Asi Eden tukon sumboliiyo nalimange kobuta moteali naluweanoo.

²⁴Doibundu taalikon doi tolopot doi asidoo doi tataapon usokan salaano, ko TEMENENO Mian Bisa abese komeeng koiyayon surgaa modaano kokapilo, tukon meeng kosabel modaano koaungo mobapasokon doi sasamba kotampat, tuuk dagaiyo kololoon doi kayungo momebee tuboan. Tukon buno doiya akiyo komeeng komian momoola usok tukon koolaniyo kayungdoo.