Read Banggai TEALIAN 34 Bible Online

TEALIAN 34 - Banggai bible

TEALIAN 34

¹Daano kooloyo meeng, Dina Yakub tukon Lea napau moluko duutiyo bubula koboine Kanaan.

²Salataa Sikhem, Hemor napau Hewi miano moteali tomundo doi lipudoo kitayo Dina, yana obulenggene boinedoo, maka yana palakosayo.

³Bai yana kilayo tuuno doi Dina, tobikon tuwong kona yasano yana tukon kakaate sulano boinedoo nayase yana koidan.

⁴Sikhem bantile doi tamano, “Yaku kabiyo Tama nakakaate molaate boinedoo buat yaku. Yaku yase pokila.”

⁵Yakub lengele baikon kona pau lapamo pinorkosa, bai sabab kona pau-pau daano modagaiyo koiyayon doi padang, yanila aki namoola mangala tindakan oioila kalu yanila akiyon namule.

⁶Hemor, Sikhem tamano, lubat doi Yakub mobalunding tukon yana.

⁷Kana kotempono Yakub napau-paudoo namulean doi padang. Lengele dolanggedoo, yanila busak kobukuno tukon nggimal tuuno. Sabab tukon perkosayo Yakub napaudoo, Sikhem lapamo sosiboliiyo sasaibino ko Israel miano.

⁸Hemor kabiyo doi Yakub, “Daku pau Sikhem yasemo doi Utus napau; yaku kabiyo sulano Utus pataikene daku pau nakilayo yana.

⁹Maimo nda mokubai pomeenggonan baikon Utus nabangsa tukon mai bangsa pokila.

¹⁰Maka Utus-utus moola dungol pototongi kami nai tano nia; yaando Utus nainiyas. Utus-utus moolamo badagang tukon motooli buat.”

¹¹Doibundu Sikhem bantile doi Dina tamano tukon utus-utuso langgongo, “Daanokene daku kakabinia, maka yaku naikon beekene oila komo kumuyu yase.

¹²Bantilemo oila kopalaseengo komuyu poinias, tukon tantukanggenemo komosoni osowaanan. Yaku naikon beekene oila komuyu nakinabi, siokai komuyu pataikene yaku kilayo boinedoo.”

¹³Sabab Sikhem perkosayomo yanila utuso pioto Dina, Yakub napau-pau bakala-kala doi Sikhem tukon Hemor tamano.

¹⁴Yanila bantile doi mianoo molua, “Ikami mammaa pataikene koutusonggami pioto moosowaan tukon mian moaki nabasunat.

¹⁵Ikami tolongo moola satujuiyo domu kakabidoo tukon meeng kosalat, doiyamo: Komuyu sio poteali buno kami, koalatino sasaibino komala-malane doi komuyu taikon sio nasinunat.

¹⁶Lapa doiya kami naikon satujuiyo komu usul kaliangano osowaanan sampulan. Ikami naikon tataapo doi koo tukon teali meeng kobangsa tukon ikoo.

¹⁷Bai kalu komuyu aki naiyase mantalima komai sarat-sarat, tukon aki naiyase sinunat, kami naikon abali alayo boinedoo tukon taus.”

¹⁸Hemor tukon Sikhem anggene dosarat-saratoo pantas,

¹⁹tukon Sikhem mosobit masadia modaanokene dosaratoo sabab yana yase Dina. Doi antara sasaibino kona montolutusan Sikhem komo taangga tuuno.

²⁰Doibundu Hemor tukon Sikhem taus doi tampat pososuungan doi kotadoo tataapono, tukon basilingan doi kotadoo tumbunoila, buno naiya,

²¹“Israel mianodoo ndasobato. Jadi sodiikenemo yanila nadungol nai tano nia polaing kita tukon bebas taus doiyayaa yanila naiyasano. Tano nia sukup bebelan buat yaniladoo. Kita moolamo osowaan tukon yanila naboi-boine, tukon yanila moolamo osowaan tukon nda boi-boine.

²²Bai mian badaangoo tolongo yase dungol polaing kita tukon teali meeng kobangsa tukon kita tukon meeng kosalat doiyamo: Sasaibino komala-malane doi antara kita sio nasinunat buno yanila.

²³Naapa sasaibino yanila naiyayon tambuno tukon sasaibino yanila nabuat teali kita kotumbuno. Jadi maimo nda satujuiyo yanila nakakabi sulano yanila dungol polaing tukon kita.”

²⁴Sasaibino dokotadoo tumbuno mopototongidoo satujuiyo Hemor tukon Sikhem nausul, maka sasaibino komian mala-malane motabokon doi kotadoo sinunat.

²⁵Tolu kooloyo molapa, salataa domala-malanedoo daano mosokiti sabab nasinunatan, lua Yakub napau doiyamo Dina utuso langgongo kosambuno Simeon tukon Lewi, yanila alayo kona sabel, maka aki nabiyok-biyok usok doi kotadoo lalomo. Doibundu yanila akateyo sasaibino komala-malane idoo,

²⁶tongusokon kai Hemor tukon Sikhem. Maka yanila alayo Dina doi Sikhem nabonua tukon taus.

²⁷Lapamo mangakate, Yakub napau-pau kobailon lambekemo dokotadoo salaku posoboli nggimalan sabab yanila utuso pioto lapamo pinorkosa.

²⁸Yanila alayo kombembe, domba, saapi, keledai tambuno, tukon sasaibino modaano doi kotadoo lalomo tukon doi padang.

²⁹Yanila alayo sasaibino kobarang modaano koanggano, sasaibino koboine tukon pau-pau motinaan tukon lambase sasaibino kobonua antoko doi kotadoo.

³⁰Yakub bantile doi Simeon tukon Lewi, “Komuyu kabaiyo susa yaku. Diabudodoo Kanaan miano tukon Felis miano tukon sasaibino komo dungoliyo natano nia naikon mesikitene yaku. Konda mian-mian aki namadaang; kalu modungoliyodoo sasaibino pomeenggon lawane tukon lobosiyo yaku, sasaibino konda solipuan naikon linopu.”

³¹Bai yanila timbiliyo, “Kami aki namoola sodiikene koutusonggami pioto nakinabai buno palacur.”