Read Banggai TEALIAN 35 Bible Online

TEALIAN 35 - Banggai bible

TEALIAN 35

¹ Daano kooloyo meeng Mian Bisa bantile doi Yakub, “Yakumo ko Mian Bisa mookitakene kobutongo doi koo salataa ikoo obulen luwedoi utusomu langgongo Esau. Tauso mosobit doi Betel. Dungolo idoo tukon mokokondong meeng komezbah tuuk Yaku.”

²Maka Yakub bantile doi kaluarga tukon doi sasaibino komian modaano polaing-laing yana, “Kita naikon luwe nimba tukon taus doi Betel. Idoo yaku naikon kekendenge komezbah tuuk doi Mian Bisa molapamo tulungiyo yaku doi tempo yaku susa tukon lapamo lindungiyo yaku yaandomo daku tausan. Jadi sakukenemo molulubaton nadewa-dewa timbalango modaano komuyu; polakukene koupacara bakumosian butong tukon popakeyomo kopakean mobilisii.”

⁴Maka yanila salakanggene doi Yakub sasaibino molulubaton nadewa timbalango modaano doi yanila tukon koidan yanila napai sumbang-sumbang. Sasaibino dololonggudoo Yakub tamene doi kayung babasal adeno lolani kokota Sikhem.

⁵Doi tempodoo Yakub tukon narombongan kaluarga luwe, Mian Bisa kubayo matakut komian-mian doi potikunggon dokota-kotadoo, tobikon yanila aki nalelenggene Yakub tukon narombongan.

⁶Maka yanila polongo doi lipu Kanaan doi kota Betel lolukoo kosambuno Lus.

⁷Idoo Yakub kekendenge kona mezbah tukon sombuikene dotampatoo “El-Betel”, sabab Mian Bisa lapamo okitakene kobutongo doi yana idoo salataa yana obulen doi utuso langgongo.

⁸Imbali koidan Debora, moteenake Ribka, mate maka kinibul doi kayung babasal adeno tambikon lalom doi kotadoo. Doiyamo kosababpo kayungo sinombuikon “Kayung Kokiil”.

⁹Lapa Yakub abali doi Mesopotamia, Mian Bisa okitakene kobutongo koidan doi yana tukon balakaatiyo.

¹⁰ Mian Bisa bantile doi yana, “Ikoo akimo naikon musinombuikon Yakub, bai Israel.” Bunomo doiya Mian Bisa sombuikene yana Israel.

¹¹ Maka Mian Bisa bantile koidan, “Yakumo ko Mian Bisa Mobalakuasa. Siokai ikoo mosuung pau tumbu mobadaang! Ikoo naikon obulusene kobangsa-bangsa tukon teali Tama tomundo-tomundo nambumbu.

¹²Lipu molapamo Yaku beekene doi Abraham tukon Ishak, naikon Kubeekene doi koo tukon mukatulunan.”

¹³Lapa doiya Mian Bisa tinggalemo Yakub.

¹⁴ Doi tampat Mian Bisa napobososian tukon Yakub, yana kekendenge meeng kobatu tondoon. Maka batudoo sinosubakon doi Mian Bisa tukon kinundongii anggur tukon zaitun lisisono doi bunggono.

¹⁵Tampatoo sinombuikon “Betel”.

¹⁶Lapa doiya Yakub tukon narombongan tinggalemo ko Betel. Salataa yanila daano mododoon soisik luwedoi Efrata, laatemo kona tempo Rahel namosuungan. Bai kona pau maaling natosuung.

¹⁷Salataa namosuungan masakit tuuno, kosandol bantile doi yana, “Kabasale konoamu, Rahel, komu pau mamalane koidan.”

¹⁸Bai Rahel lolanimo kona ajal; tukon salataa yana kabi nasupakene kona ansaang labino, yana sombuikene dopaudoo Ben-Oni bai tamano sombuikene Benyamin.

¹⁹Lapa Rahel mate, yana kinibul doi loloon bibilo motujuiyo ko Efrata, diabudodoo kosambuno Betlehem.

²⁰Yakub kekendenge meeng kobatu tondoon idoo, tukon polong oloyo nia kai Rahel nakinibulan daano mopinaloosani luwedoi batudoo.

²¹Lapa doiya Yakub banggadudukene kona ampakonan maka kekendenge kona sandung doi meeng kotampat linoloi komenara Edel.

²² Yanila daano doi tampatoo Ruben moolo tukon Bilha, tamano naboloki piala. Langgedoo Yakub lengele, tukon yana teali nggimal tuuno. Yakub songulo lua kona pau malaneno.

²³Lea napau-pau doiyamo Ruben (Yakub napau langgongo), Simeon, Lewi, Yehuda, Isakhar tukon Zebulon.

²⁴Rahel napau-pau doiyamo Yusuf tukon Benyamin.

²⁵Bilha napau-pau, Rahel naata doiyamo Dan tukon Naftali.

²⁶Zilpa napau-pau, Lea naata doiyamo Gad tukon Asyer. Dopau-paudooila sinuung doi Mesopotamia.

²⁷ Maka Yakub polongo doi tamano Ishak doi natampat dungolan doi Mamre lolani ko Hebron. (Loluk kona kakai Abraham dungol imbali.)

²⁸Doi namotuaan tuuno, doiyamo sakat alukolono kotaun, Ishak mate maka napau Esau tukon Yakub kibulemo.