Read Banggai TEALIAN 37 Bible Online

TEALIAN 37 - Banggai bible

TEALIAN 37

¹Yakub tataap doi lipu Kanaan, tamano natampat dungolan,

²tukon naiyamo kotundumo Yakub nakaluargaa: Doi tempo Yusuf, Yakub napau kona umur songulo pitu kotaun, yana uluse kona mbembe domba tambuno polaing-laing tukon utus-utuso langgongo, doiyamo Bilha tukon Zilpa napau-pau, lua kotamano naboloki piala. Yana pelenggene doi tamano kokokubai-kokubai molokis utus-utuso langgongo nailakukon.

³Yakub seange tuuno Yusuf doi sasaibino kona pau bailon, sabab Yusuf sinuung salataa tamano motuamo. Daano kooloyo meeng yana kubaiyo tuuk doi Yusuf meeng koduba momonondok tuuno.

⁴Lapa Yusuf utus-utuso langgongo kitayo baikon yanila tamano lobian seange Yusuf, tobikon aki koidan naiyase basilingan mono-monondok tukon yana.

⁵Daano kopopokee Yusuf olumon, tukon salataa yana basilinganggene kona olumonoo doi utus-utuso langgongo, yanila tosuungimo kona misikitan doi yana.

⁶Naiyamo Yusuf nabinantil doi yanila, “Soba lengele!

⁷Yaku olumon kita sasaibino daano doi asi moboboi gandum, maka daku gandum puuto kokondong tuuno. Kopoo gandum puuto boilingiyo daku gandum puuto maka sosubaiyo dokoonggudoo.”

⁸“Ikoo anggene naikon ikoo teali tomundo tukon balakuasa doi kami?” Utus-utuso langgongo anukene. Maka pololokon yanila misikitene doi yana sabab naolumon-olumon tukon sabab oila kona binantil.

⁹Doibundu Yusuf olumon koidan, tukon yana bantile doi utus-utuso langgongo, “Yaku olumon koidan, yaku kitayo kooloyo, bituwon tukon songulo meeng kobituwon pauno mososuba doi yaku.”

¹⁰Olumonoo yana salitaikene koidan doi tamano, tukon tamano anukene yana, bantile, “Olumon oila doiya? Ikoo pikikene yaku, tinamu tukon utus-utusomu naikon lubat tukon sosuba doi koo?”

¹¹ Yusuf utus-utuso langgongo mosikitiyo noa doi yana, bai tamano tataap pikikene doolumonoo.

¹²Daano kooloyo meeng Yusuf utus-utuso langgongo taus doi Sikhem tuuk dagaiyo yanila tamano naiyayon tambuno,

¹³Yakub bantile doi Yusuf, “Tauso doi Sikhem, doi utus-utusomu langgongo natampat badagaiyan naiyayon tambuno konggita.” Yusuf timbiliyo, “Monondok Tama.”

¹⁴Tamano bantile, “Kitayo bulaando kona ndondoong doutus-utusomu tukon naiyayon tambuno, maka abali popitoikene doi yaku.” Maka Yusuf sinodiimo taus tinggale ko Hebron Peako. Aki namalumbit doi bundu Yusuf polongo doi Sikhem.

¹⁵Daano yana moampakon dombalaa doisumai doi padang, yana pososuung tukon meeng komian mala-malane momasadai yana, “Oila komu inumbulii?”

¹⁶“Utus-utusonggu langgongo. Yanila daanon modagaiyo koiyayon tambuno,” Yusuf timbiliyo, “Kai Tama toiyomo yaando yanila nadaanoan?”

¹⁷Mianoo bantile, “Yanila lapamo luwe taus naimbaa. Yaku lengele yanila bantile baikon yanila sio nataus dombalaa Dotan.” Maka Yusuf luwemo tunduwo koutus-utuso langgongo tukon pososuunggene yanila doi Dotan.

¹⁸Doi namododoonan yanila lapamo kitayo Yusuf, tukon akiyon yana napolong doi yanila, yanila pomeenggono sulano naakateyo yana.

¹⁹Yanila bantile meeng komian doi bailon, “Kitayo, tukang olumonoo lubato.

²⁰Ayo kita akateyo yana tukon sakukene kobajano doi bubung momotuul lalomo. Naapa kita bantile baikon yana iyayon mobarani sokuwomo. Kita kitayo naikon bulaando kona tealian naolumon-olumonoo.”

²¹Ruben lengele doi yanila nateteloo, maka yana kakaate sulano nasalamatene Yusuf. “Inai poakateyo yana,” nabantilano.

²²“Kita sakukenemo doi bubung lalomo nai padang nia lalomo, bai inai naumbase kabai pokolio yana.” Lobodoo yana bantile sabab kona maksud salamatene Yusuf tukon sumboliiyo yana mule doi bonua.

²³Salataa Yusuf polong doi utus-utuso langgongo, tukon lokis yanila bukayo Yusuf najubah momonondokoo tuuno.

²⁴Maka yanila lakoyo yana tukon sakukene doi bubungoo lalomo momotuul.

²⁵Salataa yanila daanoon mokaan, sosinggot yanila kitayo komeeng kopadagang tambuno Ismael miano modaano doi naampakonan lalomo luwedoi Gilead taus doi Mesir. Yanila naunta kona muatan lambah-lambah tukon kisimis.

²⁶Maka Yehuda bantile doi utus-utuso, “Oila kotakoso kita moakateyo koutusonggita pioto tukon laasiakanggene mangakateanoo?

²⁷Mai nda balukene yana doi Ismael mianodoo. Mau naaki nda kosokitiyo yana. Mau nabulaando yana kai daano utusonggita pioto.” Utus-utuso loingiyo,

²⁸ tukon salataa moi-moiya kopadagang Midian moalon, Yusuf utus-utuso langgongo tobuatene doi bubung lalomodoo maka binalukon doi Ismael mianodoo tukon koolino lua kolono kokoping perak. Doibundu padagang-padagangoo babayo yana doi Mesir.

²⁹Salataa Ruben abali doi bubungoo tukon aki napososuunggene Yusuf idoo, yana bendinge kona pakeyan sabab poloon.

³⁰Yana abali doi utus-utuso tukon bantile, “Paudoo akiyono kai idoo! Oila daku linakukon?”

³¹Maka yanila mokolot mbembe meeng tukon semeke Yusuf najubah doi mbembedoo sauno.

³²Doibundu jubadoo yanila bintekene nabinabakon doi tamanoila tukon teteba, “Duba nia kami pososuunggene. Kai naiya Tama napau koona?”

³³Yakub tingoniiyo jubadoo, maka bantile, “Bisa, naiya kupau najubah! Tantu yana iyayon mobarani sokuwomo. Aduh, daku pau Yusuf matemo iyayonoo bending-bendingemo!”

³⁴Yakub bendinge kona pakeyan sabab poloon tukon pakeyo kopakeyan susaan. Samba-samba kooloyo yana kokiiliyo donapau.

³⁵Sasaibino kona pau-pau, mau mala-malane mau boi-boine lubat mohibure yana, bai yana aki naiyase hinibur. Yana bantile, “Polong yaku mate naikon banggadudul kokiiliyo daku pau.” Bunomo doiya yana banggadudul mopoloonggene sabab Yusuf yana napau.

³⁶Daano buno doiya doi Mesir, Midian miano badaang lapamo balukene Yusuf doi Potifar, meeng kopadagai tomundo mojabate kapala pototooli kamali.