Read Banggai TEALIAN 38 Bible Online

TEALIAN 38 - Banggai bible

TEALIAN 38

¹Uga-ugaate doi tempodoo Yehuda natinggalano koutus-utuso tukon dungol polaing Hira, meeng komalane moluwe doi kota Adulam.

²Idoo Yehuda potoikono tukon meeng koboine Kanaan, Sua napau, maka yanila pokila.

³Yanila napau tumbeno mamalane, tamano beena sambu Er.

⁴Napau koluano, malane koidan, sinombuikon Onan.

⁵Napau kotoluno malane koidan, tukon sinombuikon Syela. Doi tempo Syela nasinuungan Yehuda daano doi Kezib.

⁶Yehuda osowaanggene Er, napau langgongo tukon Tamar.

⁷Er nakalakuan lokis tuuno, tobikon TEMENENO nggimoliiyo yana tukon akateyo.

⁸Maka Yehuda bantile doi Onan Er utuso pioto, “Taus doi utusomu langgongo baluno, tukon pokooloi doi yana. Lakukenemo komu kuajiban doi yana, sabab ikoo nalakai utuso pioto; tukon buno doiya utusomu langgongo moola malaat katulunan.”

⁹Bai Onan toiyo baikon naikon kona pau-pau aki nateali koona. Jadi, samba luunggon yana ponikai tukon utuso langgongo balunodoo, sodiikene kona mani tokundang doi tonggulung sulano utuso langgongo aki namalaat katulunan.

¹⁰Nakokubaidoo tealikene ko TEMENENO nggimal, tukon TEMENENO akateyo yana koidan.

¹¹Doibundu Yehuda bantile doi Tamar namoniananoo, “Abalimo doi muorangtua nabonua tukon dungolo idoo salaku balu polong kupau Syela tealimo babasal.” Yana bantile buno doiya sabab matakut inai-inai Syela TEMENENO naakateyo kai, buno utuso langgongo luaila. Maka mulemo Tamar doi naolantua nabonua.

¹²Bubula kotempo doi bundu Yehuda naboloki mate. Lapa kabus kotempo napoloongganano, Yehuda uange kotulano Hira, doi Adulamoo, taus doi Timna, tampat nadomba-domba naginuntingan kobullono.

¹³Tamar malaat bilita baikon Yehuda namonianan naikon lubat doi Timna sulano naguntinge kona domba-domba bullono.

¹⁴Maka yana soboliyo balu napakeyan tukon pakeyan bailon. Koduduso yana tonggupiyo tukon kokudung, maka yana osulang doi kota Enaim tataapono, motalaat doi loloon mololoiyo ko Timna. Tamar toiyo tuuno baikon Syela, Yehuda napau pioto, babasalo, bai yana kiyoon kai nainosowaanggon tukon malanedoo.

¹⁵Salataa Yehuda kitayo Tamar, yana sangkayo boinedoo meeng komian mobalolowa, sabab koduduso tosunggupi.

¹⁶Maka Yehuda koolaniyo doi loloon bibilodoo tukon bantile, “Bulaa komu kinabi?” Yana aki natoiyo baikon boinedoo namonianan susuungo. Tamar timbiliyo, “Terserah doi Tuan.”

¹⁷Yehuda bantile koidan, “Yaku naikon beekene doi koo meeng kombembe mongula.” Tamar timbiliyo, “Moola asal daano kodaminan, polong Tuan kapatuwo dombembedoo.”

¹⁸“Oila kodaminano?” Yehuda sadaiyo. Tamar timbiliyo, “Beena doi yaku Tuan nasaap tukon aloso tukon koidan tongkat modaano doi Tuanoo.” Yehuda beekene dolobo-lobodoo doi yana, maka yanila ponikai, tukon Tamar teali tianan.

¹⁹Tamar mule doi nabonua tukon bukayo kotoik posunggupi duduso, maka konoikene kona pakeyan balu koidan.

²⁰Bubula kotempo doi bundu Yehuda bintekene Hira, sulano naantekene dombembedoo tukon kabiyo dolobo-lobodoo nainabalinggon molapamo bineekon salaku daminan, bai Hira aki napososuunggene boinedoo.

²¹Hira masa-masadaikene doi Enaim miano, “Naando domianoo mobiasa balolowa mototiili doi loloon bibilodoo?” “Akiyo komian mobalolowa dimbaa,” yanila timbiliyo.

²²Maka Hira abalimo doi Yehuda tukon bantile, “Yaku aki kupososuunggene boinedoo. Menurut mian badaang imbali akiyo komian mobalolowa idoo.”

²³Yehuda bantile, “Sodiikenemo lobo-lobodoo tuuk yana, asal kai kita aki ndamalaat maa. Yaku lapamo kakaate sulano kubeale, bai ikoo aki mupososuunggene yana.”

²⁴Uga-ugaate tolu kobituwon doi bundu Yahuda malaat bilita baikon Tamar namonianan lapamo balengganggon salaku mian balolowa tukon tianano. Maka Yehuda maparentakene, “Alayomo yana tukon suayo polong mate!”

²⁵Daano Tamar mobinaba tobuat, yana makapatu teteba doi namonianan tamano, bantile, “Yaku lapamo tinianan luwedoi lobo-lobo nia tumbuno. Palesayomo indee kotumbuno nasaapia tukon aloso tukon natongkatia.”

²⁶Yehuda tingoniiyo dolobo-lobodoo tukon bantile, “Boinedoo akiyo kona sala. Yaku aki kulakukene daku kuadiban tuuk doi yana; sio kai yaku osowaanggene yana tukon daku pau Syela.” Yehuda akimo naponikai tukon Tamar.

²⁷Salataa laate kotempono Tamar namosuungan, tokita yana naikon mosuung pau pinga.

²⁸Daano yana mosuung, dopau pingadoo meeng tobuatene kolimano, maka dosandoloo taaniyo tukon boboiyo banang memela, nabantilano, “Napaunia sinuung lolukon.”

²⁹Bai dopaudoo kibute kolimano koidan, tukon dopaudoo momeeng koidan komo sosuung lolukon. Doibundu sandol bantile, “Jadi bunomo doiya komu cara badesaak tobuat!” Maka pau mosinuung tumbenodoo sinombuikon Peres.

³⁰Lapa doiya maka nasodo sinuung koutuso pioto kolimano daano kobanang momemela. Yana binee sambu Zerah.