Read Banggai TEALIAN 39 Bible Online

TEALIAN 39 - Banggai bible

TEALIAN 39

¹Yusuf lapamo Ismael miano babayo doi Mesir, tukon binalukon doi Potifar, meeng kosuludadu kapalano pototooli kamali.

² TEMENENO tulungiyo Yusuf tobikon yana sidutu daano kohasilo doi sasaibino kona limang. Yana dungol doi natuan nabonua, Mesiroo miano.

³Kona tuan kitayo baikon TEMENENO tulungiyo Yusuf tukon sabab doiya Yusuf kona hasil monondok doi sasaibino kona linimang.

⁴Potifar sanaang doi Yusuf tukon oduduke teali peleleani doi nabonua lalomo; maka Yusuf binee limang mouluse kona bonua lalomo tukon sasaibino komo ano doi yana.

⁵Tambuun doiya kotempono demi Yusuf, TEMENENO balakaatiyo ko Mesir miano nabonua lalomo tukon oila sasaibino komo daano doi yana mau modoi bonua mau modoi asi.

⁶Sasaibino kolobo moano doi Potifar kinuasaikono doi Yusuf. Tukon buno doiya Potifar akimo natoiyo toiyo ulusan nabonua kaliangano, tolongo nalangge kinaan. Yusuf tambongan tukon monondok.

⁷Tolongo bubula kotempo, Potifar naboloki tambuuno momootiyo doi Yusuf, maka yana uange malanedoo mopokooloi.

⁸Yusuf aki naiyase tukon bantile, “Maaf, Nyonya, tuan Potifar lapamo kuasaikene doi yaku sasaibino komo daano doi ya na. Yana akimo napalaluu pikikene oioila kai nai bonua nia.

⁹Dimbaa daku kuasa pokakana kona kabasal tukon nakuasa. Akiyo komeeng moaki nakuasaikene doi yaku, alaasene Nyonya. Bulaando kona tealian yaku lakukene kokokubai molokisoo tukon baladosa doi Mian Bisa?”

¹⁰Mau kai Potifar naboloki naoluliyo Yusuf samba kooloyo, malanedoo tataap aki naiyase pokoloi.

¹¹Daano kooloyo meeng salataa Yusuf usok doi bonua lalomo tuuk lakukanggene kona limang, akiyo komeeng komian moano idoo.

¹²Potifar naboloki biite Yusuf doi najubah tukon bantile, “Maimo nda pokoloi,” Yusuf balitason tukon tosodii, maka yana obulen tobuat, bai kona jubah totinggal doi boinedoo limano.

¹³Salataa Potifar naboloki kitayo baikon Yusuf obuleno tukon najubah totinggal,

¹⁴yana uange kona peleleani tukon bantile, “Soba kitayo! Ibrani miano kulakai nabinabadoo nai bonua nia, totulaiyo kita. Yana usok doi kukombiang lalomo tukon yase perkosayo yaku, bai yaku wookon kakabukuan.

¹⁵Tempo lengele daku wookonan, yana obulen tobuat tukon totinggal konajuba.”

¹⁶Maka Potifar naboloki abese jubadoo polong nalakai mule.

¹⁷Salataa nalakai abali, yana mosobit salitaikene salitadoo doi nalakai, kona bantilano, “Ibranidoo miano ikoo babayo doisumai, usok doi kukombiang lalomo tuuk totulaiyo yaku.

¹⁸Bai salataa yaku wookon, yana obulen tobuat tukon totinggal konajuba.”

¹⁹Potifar teali nggimal tuuno.

²⁰Tukon yana monggiparentakene sulano Yusuf namosobit linako tukon inusokon doi talunggu lalomo, tampat tomundo natahanan-tahanan nakinulungan.

²¹ Bai TEMENENO tulungiyo Yusuf tukon banggadudul seseange, tobikon kapala talunggudoo yase yana.

²²Yana kuasaikene kotahanan-tahanan bailonggon doi Yusuf, tukon Yusuf komo binee tanggung jawab sasaibino kolimang moilakukon doi talunggudoo lalomo.

²³Talunggudoo kapalano akimo kai naawasio sasaibino mokinuasaikon doi Yusuf, sabab TEMENENO tulungiyo yana tobikon yana nabalahasil doi sasaibino kona limang.