Read Banggai TEALIAN 4 Bible Online

TEALIAN 4 - Banggai bible

TEALIAN 4

¹Doibundu Adam ponikai tukon Hawa, naboloki, maka tianan boinedoo. Yana suunge komeeng kopau malane tukon bantile, “Tukon TEMENENO natulung yaku malaato meeng kopau malane.” Maka yana sombuikene donapaudoo Kain.

²Maka Hawa mosuung koidan meeng kopau malane, kosambuno Habel. Habel teali pototooli domba, bai Kain teali polimang asi.

³Bubula kotempo doibundu Kain mangala soobos kona asi hasilodoo maka sosubakene doi TEMENENO.

⁴ Maka Habel mangala nadomba pauno langgongo luwedoi meeng kona domba koidan, maka yana kelete, maka yana sosubakene kosoobos momonondok tuuno doi TEMENENO. Ko TEMENENO sanaang doi Habel tukon nasosubakon,

⁵bai aki natalimayo Kain tukon nasosubakon. Kain teali nggimal tuuno, tukon koduduso lokiso.

⁶Maka ko TEMENENO bantile doi Kain, “Bulaando ikoo monggimal? Bulaando molokisoo kodudusomu?

⁷Kalu komu kokubai monondok, tantu ikoo boit; bai kalu ikoo kubaiyo komo lokis, maka kolalim totiili sulano nausok doi noamu lalomo. Kolalim naikon kuasaiyomo kobutomu, bai ikoo sio mulungguiyo.”

⁸ Maka Kain bantile doi Habel, utuso pioto, “Mai ndataus doi asi.” Salataa yanila polong idoo, Kain lobosio tukon akateo Habel utusodoo pioto.

⁹TEMENENO masadai doi Kain, “Inaando Habel, utusomu pioto?” Kain timbiliyo, “Aki kutoiyo. Kai sio kudagaiyo koutusonggu pioto?”

¹⁰ Maka ko TEMENENO bantile, “Bulaando ikoo mokubaiyo kolangge mominatakuton? Utusomu pioto sauno luwedoi buta lubato doiya-Ku buno lalo monggeleamon kabiyo kobalasano.

¹¹Ikoo katualoon mapolong akimo namoola limange kobuta. Butadoo lapamo sesepe koutusomu pioto sauno, kabaikon bukayomo kobabano sulano natalimayo utusomu pioto saunodoo salataa ikoo akateo yana.

¹²Kalu ikoo masakakon lobo doi buta, butadoo aki naikon natubokene kooioila; ikoo naikon teali lausala moakiyo konalipu dungolan doi dunia.”

¹³Maka Kain bantile doi TEMENENO, “Doukumanoo todudulo babalat, akimo kutendenge tanggunge.

¹⁴Ikoo siikayo yaku luwedoi buta nia, mododoon doi Mudanoan. Yaku naikon teali lausala moakiyo daku lipu dungolan doi dunia tukon yaku naikon inakate doi indee komiano komo pososuungganaku.”

¹⁵Bai ko TEMENENO bantile, “Aki. Kalu ikoo inakate, maka kopabalaso, pitu komian tongusokon domoakatekonoo naikon koidan inakate.” Doibundu TEMENENO obosiyo paloosan doi Kain sulano inde-indee komo pososuunggene yana inai naakateyo.

¹⁶Maka Kain tauso doi TEMENENO salaano tukon dungol doi lipu kosambuno “Lausalaan” taalikon tolopot doi Eden.

¹⁷Kain tukon naboloki malaat pau malaneno, kosambuno Henokh. Lapa doimbaa Kain mokokondong meeng kokota tukon yana sombuikene dokotadoo loloikene konapaudoo sambuno.

¹⁸Irad kotamano Henokh. Mehuyael kotamano Irad. Metusael kotamano Mehuyael, tukon Lamekh kotamano Metusael.

¹⁹Lamekh lua kona boloki, Ada tukon Zila.

²⁰Ada suunge Yabal, tukon Yabal nakatulunan doiyamo bangsa mopialayo koiyayon tukon dungol doi sandung lalomo.

²¹Koutuso pioto kosambuno Yubal, tukon Yubal nakatulunan doiyamo tukang musiik kasapi tukon suling.

²²Zila suunge Tubal-Kain, tukon konakatulunan kubaiyo sasaibino kopakakas kaliangano doi tambaga tukon besi. Tubal-Kain utuso boine kosambuno Naama.

²³Lamekh bantile doi naboloki molua, “Ada tukon Zila, ndongoliiyo! Meeng kotabo yaku akateo sabab lapamo bobokiiyaku.

²⁴Kalu pitu komian inakate tuuk posobolino Kain, maka pitu kolono pitu komian naikon inakate kalu yaku inakate.”

²⁵Adam tukon naboloki malaat koidan meeng kopau malaneno. Hawa bantile, “Ko Mian Bisa lapamo beenggu pau malaneno posoboli Habel, molapamo Kain akateo.” Tobikon doiya Hawa sombuikene paudoo Set.

²⁶Set daano konapau malaneno mobinee sambu Enos. Doi lolukoo doiyamo kona tambuunan komian bantile ko TEMENENO sambuno kalu sosuba.