Read Banggai TEALIAN 40 Bible Online

TEALIAN 40 - Banggai bible

TEALIAN 40

¹Bubula kotempo doibundu lua kopeleleani tomundo Mesir, doiyamo mouluse komo ininum tukon mouluse korotino, kubaiyo kokasalahan doi tomundo.

²Maka tomundo nggimoliiyo dona peleleanidoo luaila,

³maka yanila inusokon doi talunggu lalomo doi kapala padagai kamali nabonua, doi tampat Yusuf natinaan.

⁴Malumbit koidan yanila doi talunggudoo, tukon kapala padagai kamali beena limang Yusuf sulano naleleaniyo yanila.

⁵Daano kopopokee mouluse komo ininum tukon mouluse lotidoo susuwele olumon. Koalatino yanila naolumonoo aki napokakana.

⁶Salataa Yusuf lubat doi yanila modoakon dowa-dowa, yanila tokita poloon tuuno.

⁷Maka yana masadai, “Bulaando Utus-utus buno kai poloon oloyo nia?”

⁸Yanila timbiliyo, “Kolubongi kami olumon, tukon akiyo komo toiyo koalatino.” Yusuf bantile, “Tolongo Mian Bisa komo moolakene komian motalakanggene koolumon alatino. Soba salitayo domu olumonoo.”

⁹Mouluse komo ininumoo bantile, “Doi olumonoo lalomo yaku kitayo daano koanggur batango doi salaanggu.

¹⁰Kayungo tolu kolangaano. Sodokai langa-langaanodoo natambuun daano koloono, mosobit kobunga-bungano tuboi, maka kosaono teali meoo.

¹¹Doiya kotempono yaku daano motaaniyo tomundo nagalaas inuman, jadi yaku alayo angguroo saono tukon yaku piise doi tomundo nagalaasoo lalomo, maka yaku babayo doi yana.”

¹²Yusuf bantile, “Naiyamo koalatino: Tolu kolangaanodoo koalatino tolu kooloyo.

¹³Doi tolu nia kooloyo lalomo tomundo naikon sodiiyomo ikoo, yana naikon ompuniyo ikoo tukon abalinggene ikoo doi mulimang lolukoo. Ikoo naikon mangantokon nagalaas monginuman doi tomundo buno lolukoo.

¹⁴Bai neneeke kai doi yaku kalu komu ndondoong monondoko. Tulung pelenggene daku porsoalan doi tomundo, sulano yaku kusinodii nai talunggu nia.

¹⁵Sabab, kona bisaan looluk yaku linako luwedoi Ibrani miano natano tukon dimbaa kai, doi Mesir nia, akiyon kumokubai lobo molokis polong sio kuinusokon doi talunggu lalomo.”

¹⁶Lapa mouluse rotidoo toiyo baikon dopongulusoo inuman naolumon monondok koalatino, maka yana kai bantile doi Yusuf, “Yaku olumon koidan, yaku osuune tolu kobois koroti doi olunggu bunggono.

¹⁷Doi boisoo lalomo doi bungkuk tuuno talaat moisalomo kokaliangano kokue-kue tuuk doi tomundo, bai tomisi-tomisi lubat mokaane dokue-kuedoo.”

¹⁸Yusuf timbiliyo, “Naiyamo koalatino doolumonoo: Tolu doboisoo koalatino tolu kooloyo.

¹⁹Tolu kooloyo nia lalomo tomundo naikon mosumbolii mian mopatele koolumu maka isene kobajano doi meeng kosudong, tukon tomisi-tomisi naikon kaane kosailomu.”

²⁰Tolu kooloyo doi bundu daanon tomundo naperingatiano kona oloyo sinuungan, tukon yana mokubai lamean babasal tuuk doi sasaibino kona pagauwe. Yana maparentakene sulano mouluse komo ininum tukon mouluse koroti natinobuatonggon doi talunggu tukon babayo doi sasaibino kopagawai kamali salaano.

²¹Mouluse komo ininum inabalinggon doi nalimang lolukoo.

²²Bai mouluse koroti inukum mate. Sasaibinodoo teali pokokonoi tukon oila Yusuf nabinantil.

²³Bai mo uluse komo ininumoo akimo naneneeke koidan doi Yusuf. Yana toliminggenemo tuuno doi yana.