Read Banggai TEALIAN 41 Bible Online

TEALIAN 41 - Banggai bible

TEALIAN 41

¹Salataa toliis lua kotaun, tomundo Mesir olumon, baikon yana daano mokokondong doi Nil Paisunobatango, bibilo.

²Sosinggot pitu kosaapi momalanak tukon motontilang kokulito tobuat doi paisudoo maka tambuun makaan bulung doi paisu batangodoo bibilo.

³Doibundu pitu kosapi bailon molubat koidan; iyayon-iyayonoo molisuk tukon baino kulito komo bungusiyo kobukuno. Sapi-sapi momolisukidoo kokondong doi sapi-sapi momalanakoo lisuko, doi paisu batangodoo bibilo.

⁴Doibundu saapi-saapi momolisuk kaane kosaapi-saapi momalanak. Lapa doiya tomundo bangun doi namooloan.

⁵Doibundu yana moolo tukon olumon koidan. Naolumon lalomo yana kitayo pitu kobatuno kogandum moano koantoko tukon meo-meoo tubo doi langaano meeng.

⁶Doibundu tubo koidan pitu kogandum batuno bailon, momoli-molisuk tukon mokukut sabab mbombuul lipu.

⁷Maka dogandumoo batuno momayot lemese domo pitudoo kobatuno moano koantoko. Lapa doiya tomundo bangun tukon toiyo baikon yana lapamo olumon.

⁸ Dowa-dowasoono tomundo aki nasanaang, tobikon doiya yana sumboliiyo nainuang sasaibino komian motoiyo kopotoi tukon mian moano kona ilmu doi Mesir. Maka yana salitaikene kona olumon doi yanila, bai akiyo komeeng momoola talakanggene koalatino.

⁹Doibundu mouluse komo ininum bantile doi tomundo, “Oloyo nia yaku sio kuakuiyo daku kasalahan.

¹⁰Loluk Tomundo nggimoliiyo komo uluse koroti tukon yaku, maka kami inusokon doi talunggu lalomo, doi kapala pototooli kamali nabonua.

¹¹Daano kopopokee kami lua kami olumon, tukon komai olumon aki napokakana koalatino.

¹²Meeng komian pamuda Ibrani daano imbali tukon kami. Yana peleleani kapala pototooli kamalidoo. Ikami salitayo komai olumon doi yana, maka yana talakanggene koalatino olumonoo.

¹³Tokita sasaibino bisa buno nabantilano, doiyamo: Tomundo abalinggene yaku doi kubalimangan tumbeno, bai domo ulusedoo koroti inukum mate.”

¹⁴Maka tomundo monggiuanggene Yusuf, tukon mosobit yana tinobuaton doi talunggu. Salataa lapa Yusuf bagunting tukon basoboli pakean, yana mangadapo doi tomundo.

¹⁵Tomundo bantile doi yana, “Yaku lapamo olumon, tukon akiyo komeeng komian momoola talakanggene koalatino. Daano komo popitoikene doi yaku baikon ikoo moola mutalakanggene koolumon.”

¹⁶Yusuf timbiliyo, “Bolikon yaku, bai Mian Bisa naikon komo beena katalangan mobisa.”

¹⁷Maka tomundo bantile, “Yaku olumon baikon yaku daano mokokondong doi Nil Paisunobatango bibilo.

¹⁸Maka tobuato doi paisudoo batango pitu kosaapi momala-malanak tukon kokulito motontilang, maka tambuuno momakaan bulung doi paisudoo bibilo.

¹⁹Doibundu tobuat koidan pitu kosaapi bailon, momoli-molisuk tukon baino kulit komo bunguse kobuku. Akiyoon naidan yaku mokita saapi mobunodoiya kona kulokisan posaapon doi Mesir.

²⁰Sapi-sapi momolisukidoo kaane kabus dosapidoo pitu momalanak.

²¹Bai lapa doiya sapi-sapi momolisukoo tataap molisuk. Maka yaku bangun doi kumooloan.

²²Doibundu yaku moolo tukon olumon koidan, baikon yaku kitayo pitu kogandum batuno moano koantoko tukon meo-meoo, tubo doi meeng kolangaano.

²³Maka tubo koidan pitu kogandum batuno momayot-mayot tukon mokukut sabab mbombuul lipu.

²⁴Gandum batuno momayotoo lemese domo anodoo koantoko. Lapamo yaku salitaikene lua daku olumonoo doi motoiyo kopotoi, bai akiyo komeeng komian momoola talakanggene koalatino.”

²⁵Maka Yusuf bantile doi tomundo, “Lua doolumonoo pokakana koalatino; Mian Bisa lapamo bontiikene doi ku Tuan oila naikon kona linakukon.

²⁶Pitu kosaapi momalako doiyamo pitu kotaun, tukon pitu kogandum batuno moano koantoko doiyamo pitu kotaun kai; luadoo pokakana koalatino.

²⁷Pitu kosaapi molisuk, motokita doi bundu, tukon pitu kogandum batuno momayot tukon mokukut sabab mbombuul lipu doiyamo tempo malaalan pitu kotaun kona kalumbit.

²⁸Bunomo lakon yaku lapamo bantile doi ku Tuan, Mian Bisa lapamo okitakene doi ku Tuan oila naikon kona linakukon.

²⁹Mototiili naikon lubat pitu kotaun tempo namakmuran sasaibino kolipu Mesir.

³⁰Lapa doiya naikon lubat pitu kotaun malaalan, tukon tempo namakmuranoo naikon tinoliminggon tuuno, sabab tempo malaalanoo naikon hebat tuuno tobikon lipu nia teali motuul.

³¹

³²Ku Tuan naolumon teali lua luunggon doiya koalatino baikon langgedoo lapamo Mian Bisa tataapkanggene tukon baikon Mian Bisa naikon kubaiyo tukon mosobit.

³³Tobikon doiya kona monondokan ku Tuan piliyo meeng komian mopandoi tukon mamangan kona pikilan tukon beena kuasa sulano naatule natano nia.

³⁴Ku Tuan sio koidan mongoduduk pagauwe-pagauwe bailon tukon beena yanila kuasa sulano namangala meeng koobos doi lima koobos sasaibino kobapupuiyan gandum pitu kotaun doi tempo namakmuranoo, maka atambune doi kota-kota tukon dagaiyo.

³⁵

³⁶Gandumoo naikon teali palasadiaan kinaan pitu kotaun tempo malaalan naikon molubat doi Mesir. Tukon buno doiya rayat aki namate laal.”

³⁷Tomundo tukon napagawai satujuiyo Yusuf nateteloo.

³⁸Maka tomundo bantile doi yanila, “Aki nateali kita malaat mian bailon molobian pokakana Yusuf, sabab yana Mian Bisa naroh komo pimpine.”

³⁹Maka tomundo bantile doi Yusuf, “Mian Bisa lapamo bontiikene doi koo sasaibino nia, jadi tokitamo baikon ikoo lobian pandoi tukon mamangan komu pikilan moluwe doi indee komiano koidan.

⁴⁰ Ikoo naikon yaku oduduke teali gubernur, tukon sasaibino daku rayat naikon tulutiyo komu parenta. Tolongo yaku komo lobian balakuasa doi koo.”

⁴¹ Lapa doiya tomundo liate kona sousolut doi limano saono mobinotik saap batomundoan, maka usokikene doi Yusuf limano saono tukon bantile, “Tukon naiya yaku oduduke ikoo teali gubernur doi posaapon ko Mesir.” Doibundu yana konoikene doi Yusuf meeng juba lenan momuyuk tukon inusokikon doi bulungo meeng koinoon mosoni.

⁴²

⁴³Maka bineekon doi Yusuf kokereta batomundoan koluano tuuk nalakitan, tukon padagai tomundo natongodotiiyas ampakon doi keretadoo salaano tukon nggeleamon, “Awas! Beena loloon! Beena loloon!” Bunomo lakon doiya Yusuf teali gubernur posaapon ko Mesir.

⁴⁴Tomundo bantile doi yana, “Yakumo ko Tomundo — tukon yaku pelenggene baikon kalu akiyo komu palamisi akiyo komeeng komian doi posaapon nai Mesir nia momoola lakukene oioila.”

⁴⁵Maka tomundo beena meeng kosambu Mesir doi Yusuf, doiyamo Zafnat-Paaneah. Binee koidan meeng koboloki kosambuno Asnat, Potifera napau motaaniyo koimam doi kota Heliopolis. Yusuf kona umur tolu kolono kotaun salataa yana atambuune mobalimang tuuk tomundo Mesir. Maka Yusuf luwedoi kamali batomundoan tukon taus boilingiyo sasaibino dolipudoo.

⁴⁶

⁴⁷Pitu kotaun lalamo molobian makmuloo kobuta nahasil bapupuiyan lobi-lobian.

⁴⁸Gandumoo Yusuf pototongikene maka yana abese doi kota-kota. Doi memeeng kokota lalomo yana mangabos gandum asi-asidoo hasilo doi kotadoo.

⁴⁹Gandum mopinototongikonoo badaang tuuno tobikon Yusuf tade mobaukul, sabab kona kadaang bunomo bone doi tobun bibilo.

⁵⁰Akiyoon kotempo malaalanoo nalubat, Asnat Yusuf naboloki mosuung lua kopau malaneno.

⁵¹Yusuf bantile, “Mian Bisa lapamo kubaiyo yaku toliminggene doi sasaibino daku sakisaawan tukon doi tamanggu nakaluargaa.” Tobikon doiya yana sombuikene kona pau tumbeno “Manasye”.

⁵²Yana bantile koidan, “Mian Bisa lapamo beena doi yaku pau-pau tempo kusakisaawan lalomo,” maka yana sombuikene kona pau koluano “Efraim”.

⁵³Pitu kotaun tempo namakmuran molapamo tinoupi lipu Mesiroo laatemo kona pupusan.

⁵⁴ Maka lubat pitu kotaun tempo malaalan bisa buno molapamo Yusuf bantile. Doi posaapon kodunia teali komalaalan, bai posaapon ko Mesir daano kopalasadiaan kinaan.

⁵⁵ Salataa rayat doi Mesir tambuuno mandarita laal, yanila makabi kinaan doi tomundo. Maka tomundo sumboliiyo yanila taus doi Yusuf tukon loingiyo sasaibino oila naikon Yusuf napinarentahkon doi yanila.

⁵⁶Salataa malaalanoo teali pololokon kulokis tukon kanakono sasaibino kolipu, Yusuf bukayomo sasaibino kogudang tukon mabalukon gandum doi Mesir miano.

⁵⁷Luwe posaapon kodunia mian badaang lubat doi Mesir tuuk mongoli gandum doi Yusuf, sabab malaalanoo bisakai mominatakuton doi yayaa.