Read Banggai TEALIAN 42 Bible Online

TEALIAN 42 - Banggai bible

TEALIAN 42

¹Salataa Yakub lengele baikon daano kogandum doi Mesir, yana bantile doi napau-pau, “Bulaando kai komuyu motolongo basana-sanaang?

² Lapamo yaku lengele baikon daano kogandum doi Mesir; potauso dombalaa tukon pomongoli gandum sulano naaki nda mate laal.”

³Maka Yusuf utus-utuso langgongo songuloiladoo taus bangoli gandum doi Mesir.

⁴Bai Yakub aki napataikene Benyamin, Yusuf utuso pioto, taus polaing yanila, sabab yana matakut inai-inai nateali kosilakaan tukon napaudoo.

⁵Sabab malaalan doi tano Kanaan, Yakub napau-pau polaing badaang komian bailon lubat mongoli gandum doi Mesir.

⁶Komo mabalukon gandum doi posaapon kodunia doiyamo Yusuf, salaku gubernur doi Mesir. Tobikon doiya Yusuf utus-utuso langgongo lubat tukon sosuba doi salaano.

⁷Salataa Yusuf kitayo koutus-utuso langgongo, yana tingoniiyo yanila, bai yana kakaadukon aki natingoniiyo. Tukon kasar yana masadai doi yanila, “Komuyu indee komiano?” “Kami Kanaan miano. Kami lubat tuuk bangoli kinaan,” yanila timbiliyo.

⁸Mau kai Yusuf natingoniiyo koutus-utuso langgongo, yanila aki natingoniiyo yana.

⁹ Maka yana neneeke kona olumon kaliangano doi yanila. Tukon yana bantile, “Komuyu nia mata-mata; komuyu lubat solidikiyo inaando kona kalamahan komai lipu.”

¹⁰“Aki. Ikoo daku Tuan,” yanila timbiliyo. “Ikami, Tuan naata-ata lubat tolongo tuuk bangoli kinaan.

¹¹Kami nia montolutus, ikoo daku Tuan. Kami nia mian monondok, bolikon mata-mata.”

¹²Yusuf bantile doi yanila, “Kakala! Komuyu lubat doi sumai tuuk solidikiyo inaando kona kalamahan natano nia.”

¹³Yanila timbiliyo, “Kami nia songulolua montolutus, ikoo daku Tuan, kami pau doi meeng kotama doi lipu Kanaan. Koutusonggami meeng matemo tukon kopioto diabudodoo daano doi tamanggami.”

¹⁴“Takainomo bisa buno kubantilan,” Yusuf timbiliyo, “komuyu nia mata-mata.

¹⁵Yaku yase ujio komuyu: Yaku batotopi tukon tomundo sambuno baikon komuyu aki naikon potinggale natano nia kalu koutusomuyu piotodoo aki nalubat doisumai.

¹⁶Meeng komian doi komuyu sio namule moleleiyo yana, kobailon naikon tinaan polong mubantilan tokita. Kalu aki, tukon tomundo sambuno, komuyu nia musuh namata-mata!”

¹⁷Doibundu yanila inusokon doi talunggu lalomo tolu kooloyo kona kalumbit.

¹⁸Doi oloyo kotaluno Yusuf bantile doi yanila, “Yaku mian momatakut tukon taat doi Mian Bisa. Komuyu naikon kusalamatene tukon meeng kosarat.

¹⁹Tuuk mookitakene baikon komuyu nia jujur, meeng komian doi komuyu naikon tinaan doi talunggu lalomo; kobailon moola mule tukon babayo kogandum komuyu mooliyo tuuk mukaluargaa modaano mandarita laal.

²⁰Lapa doiya komuyu sio pobabayo koutusomuyu pioto doi yaku. Doiyamo kona bukti mubantilanoo bisa, tukon komuyu naikon aki kuhukume mate.” Yanila satuju tukon gubernuroo nakaputusan.

²¹Maka yanila bantil meeng komian doi bailon, “Nah, kita diabudodoo inukum tolongo nda kasalahan doi utusonggita pioto lolukoo; yana makabi tulung bai kita aki nda paduliyo, mau kita kitayo baikon yana mandaritamo tuuno. Doiyamo kosababpo kita diabudodoo toupiyo nasakisaawan nia.”

²² Ruben bantile, “Bolikon kai looluk lapamo yaku bantile doi komuyu sulano dopaudoo inai nabinulaandokon. Bai komuyu aki poiyase ndongoliiyo. Tukon diabudodoo kona matean sinobolikon doi kita.”

²³Yusuf mangalatikene yanila nasilingan, bai yanila aki natoiyo dolanggedoo, sabab yanila basilingan tukon Yusuf tukon meeng komian parantaraan juru baasa.

²⁴Yusuf tinggale yanila, maka kokiil. Salataa lapa moola bantil-bantil koidan, yana abali doi yanila, maka alayo Simeon, tukon monggiboboikene yana doi sasaibino koutuso salaano.

²⁵Yusuf maparentakene sulano karung-karung utus-utuso langgongo mobabayo natinotui tukon gandum, tukon yanila nadoy suwe-suwele inusokon doi karung-karungoo lalomo. Koidan sulano yanila binee kinaan tuuk namumuda doi loloon. Kona parentadoo linimang.

²⁶Lapa doiya utus-utuso langgongo Yusuf muwotiiyo yanila nakeledai tukon gandum molapamo yanila oliyo, maka yanila luwemo idoo.

²⁷Doi tampat yanila nabamoolokonan, meeng komian doi yanila bukayo kona gandum karungo sulano nabeena kaan kona keledai. Yana pososuunggenemo kona doy doi gandumoo bunggono.

²⁸“Daku doy inabalinggon,” kona bantilano doi utus-utusodoo. “Kitayo, daano doi karung lalomo!” Yanila noano teali matakut, tukon yanila namatakutan yanila posadaimo, “Oila ko Mian Bisa nailakukon doi kita?”

²⁹Tempo polong doi Kanaan, yanila salitaikene doi yanila tamano sasaibino kolobo molapamo yanila toupiyo. Yanila bantile,

³⁰“Gubernur Mesir basilingan tukon kasar doi kami tukon laite kami mata-mataiyo kona lipu.

³¹Kami timbiliyo, ‘Kami mian monondok, bolikon mata-mata, kami mian mojujur.

³²Kami sasaibino songulolua montolutus, pau luwe meeng kotama, tukon komeeng matemo, tolongo pioto daano podungoli tukon tamano doi Kanaan.’

³³Gubernuroo bantile, ‘Yaku yase ujiyo komuyu sulano potoiyo oila kai komuyu mian mojujur: Meeng komian doi komuyu, sio nadungol kobailon moola namule babayo kogandum doi mukaluargaa modaano mandarita malaal.

³⁴Lapa komuyu abali babayomo utusomuyu pioto, yaku naikon toiyo baikon komuyu bolikon mata-mata, bai mian mojujur. Maka koutusomu yaku motaanedoo naikon yaku abalinggene doi koo tukon komuyu moola dungol doi lipu nia tukon bebas badagang.’ ”

³⁵Doibundu, doi tempo yanila kaluale kona karung-karung antoko, yanila pososuunggene kona dombet suwe-suwele motinotui doy; maka yanila matakuto tuuno, koidan yanila tamano.

³⁶Maka tamanoila bantile, “Komuyu kubaiyo yaku lapus sasaibino daku pau. Yusuf akiyono; Simeon akiyono koidan; tukon diabudodoo komuyu naikon alayo Benyamin koidan. Todudulo daku pandaritaan!”

³⁷Maka Ruben bantile doi tamano, “Salakanggene Benyamin doi yaku, Tama; totiiliyo naikon yaku babayo abali, kalu aki, Tama moola muakateo lua daku pau malaneno.”

³⁸Bai Yakub bantile, “Aki! Benyamin aki namoola komuyu tobiyo; utuso langgongo matemo tukon nia baino yana modaano dungol. Inai-inai yana namalaat silaka doi naampakonanoo. Yaku nia motuamo, tukon kosusaan komuyu naikon molubatene doi yakudoo koakibato yaku mate.”