Read Banggai TEALIAN 43 Bible Online

TEALIAN 43 - Banggai bible

TEALIAN 43

¹Malalaan doi Kanaan pololokon hebat, tukon lapa Yakub nakaluargaa akabuse sasaibino kogandum mobinaba luwedoi Mesir, bantilo Yakub doi napau-pau, “Tauso koidan imbali tukon mongoli gandum tuuk kita.”

³Maka Yehuda bantile doi yana, “Gubernur Mesir lapamo beena poingotii mokalaas baikon kami aki namoola mangadap yana kalu kami aki mai babayo koutusonggami piotodoo.

⁴Kalu Tama pataikene koutusonggami piotodoo namalaing, kami yase taus imbali momongoli kinaan.

⁵Bai kalu Tama aki napataikene Benyamin malaing, akimo mai yase taus, sabab gubernuroo lapamo bantile baikon kami aki namoola mangadap kalu utusonggami pioto aki namalaing.”

⁶Yakub bantile, “Bulaando komuyu kubaiyo susa yaku mobatiikene doi mianoo baikon komuyu daano koutusomuyu pioto?”

⁷Yanila timbiliyo, “Mianoo banggadudul momeeng momasadaikene doi kami tukon nda kaluarga bantile, ‘Daano motubo tamamuyu? Oila kai komuyu daano koutusomuyu pioto malane bailon?’ Kami talapakisaa timbiliyo sasaibino kona pasadai. Bulaando kami moola dugayo baikon naikon sumboliiyo kami mobabayo koutusonggamidoo?”

⁸Maka Yehuda bantile doi tamano, “Pataikenemo paudoo namalaing, tukon yaku komo balatanggung jawab doi yana. Kami naikon luwemo tukon mosobit sulano akiyo komeeng komian doi kita mate laal.

⁹Yakumo motanggunge, tukon Tama moola tuntute yana doi yaku. Kalu yana aki kubabayo abali tukon salamat, yaku tanggunge koukumano pomatekon.

¹⁰Kalu andeno kita aki nda mototiili buno doiya kolumbito, tantu kami diabudodoo lapamo mule taus lua luunggon.”

¹¹Maka tamanoila bantile, “Kalu takainomo sio nabuno doiya, babayomo kohasil momonondok tuuno doi lipu nia doi pokarung-karung lalomo salaku palaseeng tuuk gubernuroo: Kismis, dokot, rampah-rampah, beau saono tukon kanali saono.

¹²Babayomo kai kodoy lua luunggon kolipato sabab doi mopinososuunggon doi mukarung lalomodoo sio poabalinggene. Baanggo kai doiya meeng kakaliluan.

¹³Babayomo utusomu piotodoo, tukon abali mosobit.

¹⁴Boliisi Mian Bisa Mo Babasal konakuasa kubaiyo gubernuroo seange doi komuyu, tobikon yana yase abalinggene Benyamin tukon Simeon doikoo. Kaliangano yaku nia, kalu yaku takainomo sio nalapuso daku pau-pau akiyo kumokubaiyan.”

¹⁵Doibundu Yusuf utus-utuso babayo kopalaseng-palasengoo tukon doy lua luunggon paku, maka ampakono doi Mesir polaing Benyamin. Salataa polong imbali, yanila mangadap Yusuf.

¹⁶Salataa Yusuf kitayo Benyamin tukon utus-utuso langgongo, bantilo yana doi napeleleani mokapalaiyo kona bonua lalomo, “Babayomo namian-mianoo doi kubonua. Yanila naikon kaan polaing yaku doi nasuunan nia kooloyo, tobikon doiya mokolot meeng koiyayon piniala maka sadiayomo doiya.”

¹⁷Peleleanidoo lakukanggene doparentahdoo tukon babayo Yusuf utus-utuso doi gubernur nabonua lalomo.

¹⁸Salataa yanila binaba doi Yusuf nabonua lalomo, yanila matakut tukon pikikene, “Kita binaba dimbaa, sabab doy kita pososuunggene doi nda karung lalomo doi tempo ndalubatan doisumai looluk. Yanila naikon sosinggot lakoyo kita, maka alayo konda keledai tukon tealikene kita yanila naata.”

¹⁹Tobikon doiya, lolani Yusuf nabonua tataapono, yanila bantile doi mokapalaiyo kobonua lalomo,

²⁰“Maaf, Tuan, kami idano molubat doisumai tuuk bangoli kinaan.

²¹Doi mai ampakonan mule, salataa kami naikon bamoolokono, kami bukayo komai karung. Banggokai sasaibino kodoy pebeal komai gandum daano doi gandumoo bunggono. Kami aki mai toiyo indee komiano komo usekene dodoydoo. Diabudodoo kami babayo abali doi Tuan. Sangalaasan doiya kami daano makanggi doy koidan tuuk pongoli kinaan koidan.”

²³Peleleanidoo bantile, “Inai matakut. Inai molili. Mian Bisa, doiyamo tamamu na Mian Bisa ngginaal, Yanamo komo usekene dodoydoo doi mukarung lalomo. Yaku lapamo talimayo komu pebeal tuuk gandumoo.” Doibundu binabamo Simeon doi yanila,

²⁴maka yanila inantokono doi bonua lalomo. Yana beena yanila paisu sulano nakumosiyo koaino, tukon koidan kinaan tuuk yanila nakeledai.

²⁵Lapa doiya yanila sadiayomo kopalaseng tuuk mobineekon doi Yusuf kalu yana lubat doi tempo nasuunan kooloyo, sabab yanila lapamo binontiikon baikon yanila naikon kaan polaing-laing tukon yana.

²⁶Salataa Yusuf polong doi bonua, yanila beekene dopalaseng-palasengoo doi Yusuf tukon sosuba doi yana.

²⁷Yusuf masadaikene kaliangano yanila nandondoong, maka bantile, “Komuyu lapamo salitaikene doi yaku kaliangano tamamuyudoo momotuamo. Bulaandomo kai kona ndondoong? Kai mono-monondok?”

²⁸Yanila timbiliyo, “Tuan naata, tamanggami, monondok kona ndondoong.” Maka yanila sosuba doi yana.

²⁹Salataa Yusuf kitayo Benyamin, utuso piotodoo, yana bantile, “Jadi naiyamo koutusomuyu piotodoo, molapamo komuyu bantile-bantile doi yaku? Boliisi ko Mian Bisa nabalakaatiyo ikoo, kupau.”

³⁰Yusuf noano toduap sabab peleenggene tukon seange koutuso pioto. Yana kabi naaki nalaate atasio kobutongo, tobikon doiya yana tauso luwe idoo tukon sosinggot maka usok doi nakombiang tukon kokiil.

³¹Lapa doiya yana luupiyo koduduso, maka tobuat koidan tukon taane konoano, yana sumboliiyo mosinidak kokinaan.

³²Yusuf kaan doi meeng komeda mosusuungo, tukon utus-utuso doi meda bailon. Mesir miano moano idoo kaan doi meda bailon koidan, sabab yanila lasayo hina kalu pokaanggon tukon Ibrani miano.

³³Yusuf utus-utuso nameja kaanan inabos posasalaan tukon Yusuf nameja kaanan mololoi urutan susuwele naumur, tambuun doi langgongo polong doi pioto. Salataa yanila kitayo cara nainabosanoo, yanila pombaleng tukon heran.

³⁴Yanila binee kaan doi Yusuf nameja, tukon Benyamin lineleani lima luunggon lobian kona kadaang doi utus-utuso langgongo. Maka yanila kaan tukon monginum polaing-laing tukon Yusuf polong biai.