Read Banggai TEALIAN 44 Bible Online

TEALIAN 44 - Banggai bible

TEALIAN 44

¹Anon kai Yusuf momaparentakene doi mokapalaiyo kona bonua lalomo, “Usokiyomo mianoo badaang nakarung tukon gandum, kona kadaang momoola yanila babayo, tukon usokiyo doy susuwele doi nakarung lalomo, doi gandumoo bunggono.

²Usekenemo koidan daku beker perakoo doi yanila utuso pioto nakarung lalomo, polaing-laing tukon doy pebeal nagandum.” Peleleanidoo lakukanggene doparentahdoo.

³Modoakon kooloyono, dowa-dowa soono, Yusuf poalaaso tukon utus-utuso, maka yanila ampakon tukon yanila nakeledai.

⁴Yanila akiyon namododoon luwedoi kotadoo, Yusuf bantile doi mokapalaiyo kona bonua lalomo, “Mosobit lelenggene domian badaangoo. Kalu lapamo laate, bontiikene doi yanila, ‘Bulaando komuyu mobalase komonondokan tukon kulokis?

⁵Bulaando komuyu mondikuke daku tuan nabeker perak? Bekeroo pinake tuuk monginuman tukon salaku alat patanggal. Komuyu lapamo lakukanggene komo kulokis tuuno!’ ”

⁶Salataa peleleanidoo polong doi Yusuf utus-utuso, yana bantile oila Yusuf napinarentahkon.

⁷Yanila timbiliyo doi yana, “Oila Tuan naminakisud? Kami batotopi baikon kami aki mokabai buno doiya!

⁸Tuan susuungo toiyo baikon doy kami pososuunggene doimai karung-karung lalomo doi gandumoo bunggono, lapamo kami abalinggene doi Tuan. Jadi, aki nateali kami mondikuk perak kabai mosoni luwedoi gubernur nabonua!

⁹Tuan, kalu kai dobendadoo talaat doi meeng komian doi kami, sodiyomo yana nainukum mate, tukon kami teali Tuan naata.”

¹⁰Peleleanidoo bantile, “Monondoko; bai tolongo yana doi indee dobekeroo nailaatan, yanamo naikon komo teali kuata; kobailon moola nataus.”

¹¹Maka tukon mosobit yanila suwe-suwele obulusene tukon bukayo kona karung.

¹²Yusuf napeleleanidoo palesayo karung-karungoo tukon toliti, tambuun doi Ruben nakarung polong doi Benyamin nakarung, tukon bekeroo pinososuunggon doi Benyamin nakarung lalomo.

¹³Utus-utuso langgongo poloon tuuno tobikon yanila bendi-bendinge yanila napakean. Yanila alakite koidan konapai gandum doi nakeledai tukon abali doi kota.

¹⁴Salataa Yehuda tukon utus-utuso polong doi Yusuf nabonua, yana daanoon idoo, tukon yanila sosuba doi salaano.

¹⁵Maka Yusuf bantile, “Oilamo kopo linakukonoo? Aki potoiyo mian mobuno yaku nia moola toiyo kopo kokubai mokulokis tukon mongotoiyan moaki natokita?”

¹⁶“Oila komo moola kami bantile, ku Tuan?” Yehuda timbiliyo. “Bulaando kami moola, bantayo tukon mobisakene kobutonggami? Mian Bisa lapamo okitakene komai kasalahan. Diabudodoo kami sasaibino Tuan naata, bolikon tolongo yana doi indee kona linaatan dobekeroo.”

¹⁷Yusuf bantile, “Aki! Yaku aki kuyase mokubai buno doiya! Tolongo yana doi indee kona linaatan dobekeroo naikon teali kuata. Kobailon moola mule tukon bebas doi tamano.”

¹⁸Yehuda ambakon koolaniyo Yusuf tukon bantile, “Maaf, ku Tuan, pataikenemo ata basilingan koidan tukon doku Tuan. Inai monggimal doi muata; daku Tuan bunomo tomundo Mesir susuungo.

¹⁹Daku Tuan lapamo masadai doi kami nia, ‘Oilakai komuyu daano kotamamuyu kabai utus bailonggon?’

²⁰Kami timbiliyo, ‘Tamanggami motuamo tukon utusonggami pioto sinuung salataa kotamanggami motuamo tuuno. Utusonggami langgongo meeng kotina doi utusonggami piotodoo matemo, jadi diabudodoo tolongo yana susuungo modaano tubo doi yanila luaila, tukon tama seange tuuno yana.’

²¹Daku Tuan sumboliiyo kami babayo yana doisumai, sulano daku Tuan moola kitayo,

²²maka kami timbiliyo paudoo baikon aki namoola poalaas doi tamano, kalu yana poalaas luwedoi tamano, tama naikon mate.

²³Doibundu daku Tuan bantile, ‘Komuyu aki namoola mangadap doi yaku kalu aki mubabayo utusomu piotodoo.’

²⁴Salataa kami abali doi tamanggami, kami pelenggene doi yana daku Tuan nabantilanoo.

²⁵Doibundu tamanggami sumboliiyo kami lubat koidan doisumai sulano mongoli kinaan.

²⁶Kami timbiliyo, ‘Kami aki namoola taus imbali, sabab kami aki namoola mangadap gubernur kalu utusonggami pioto aki namalaing. Kami tolongo moola taus imbali kalu yana taus koidan.’

²⁷Doibundu tamanggami bantile, ‘Komuyu toiyo baikon Rahel, kuboloki, tolongo lua kona pau.

²⁸Kotumbeno lapamo otinggale yaku. Yana tantumo lapamo iyayon mobarani sokuwo, sabab polong diabudodoo yaku akimo kukitayo koidan.

²⁹Kalu komuyu alayo napau pioto nia doi yaku, tukon teali kooila doi yana, kopoloonan komuyu molubatene doi yakudoo naikon motealikene daku matean, sabab yaku nia motuamo.’ ”

³⁰“Tobikon doiya daku Tuan,” Yehuda bantile doi Yusuf, “Kalu ata abali doi tamanggami akiyo koutusonggami piotodoo, tantu tamanggami naikon matemo. Kona ansaang taitude doi paudoo, tukon yana motuamo tobikon kopoloonan kami molubatene doi yanadoo naikon tealikene kona matean.

³²Koidan kai, ata lapamo paladandi doi ata tamano baikon ata nia teali posoboli paudoo. Ata bantile doi yana, baikon kalu ata aki nababayo paudoo abali doi yana, atamo naikon komo tanggunge kohukumano pomatekon.

³³Jadi, ata kabiyo, daku Tuan, napataikene ata dungol dimbaa teali ata doi ku Tuan soboliyo utusonggami pioto nia; sobiiyomo yana namule polaing-laing tukon utus-utuso langgongo.

³⁴Bulaando ata moola abali doi tamanggami kalu dopaudoo aki namalaing? Ata aki namoola taane mokitayo komatean naikon molaate kotamanggamidoo.”