Read Banggai TEALIAN 45 Bible Online

TEALIAN 45 - Banggai bible

TEALIAN 45

¹ Yusuf akimo nateali taane koidan konoano doi napagawe-pagawe salaano. Tobikon doiya yana sumboliiyo yanila tinggale doruanganoo sulano yana moola nyatakanggene doi utus-utuso indee yana kona bisaan.

²Lapa sasaibino kona pagauwe tinggale doruanganoo, Yusuf kokiil kobukuan, tobikon Mesir miano doi ruanganoo tonggulungo ndongoliiyo, tukon dobilitadoo polongo doi tomundo nakamali.

³Yusuf bantile doi utus-utuso, “Yaku nia Yusuf. Kai tama daano motubo?” Utus-utuso kitayo doiya matakuto tuuno tobikon aki namoola timbiliyo.

⁴Maka Yusuf bantile doi yanila, “Maimo dimbaa.” Yanila bakolanikon, lukon yana bantile koidan, “Yaku Yusuf, molapamo komuyu balukene doi Mesir.

⁵Inai momatakut kabai manasekene kobutomuyu sabab komuyu molapamo balukene yaku. Kona bisaan Mian Bisa susuungo komo babayo yaku dimbaa lolukiyo komuyu tuuk salamatene komian badaang.

⁶Diabudodoo sodo taun koluano doi tempo malaalan, tukon lima kotaun koidan kona kalumbit komian aki naikon nabapacol tukon bapupui.

⁷Mian Bisa lapamo babayo yaku lolukiyo komuyu sulano salamatene komuyu tukon kokubai mominasaindinggon nia, tukon tuuk dagaiyo komu kasalamatan tukon nabanggadudulan komu katulunan.

⁸Jadi kona tutuuwan bolikon komuyu komo kubaiyo yaku daano dimbaa, bai Mian Bisa. Yana lapamo tealikene yaku tomundo Mesir napagawai motatandak. Yaku binee kuasa doi sasaibino kona bonua lalomo tukon posaapon ko Mesir.

⁹ Dia budodoo, mosobit komuyu abali doi tama tukon bontiikene doi yana baikon Yusuf, napau, bantile buno naiya, ‘Mian Bisa lapamo tealikene yaku mokuasaiyo ko Mesir posaapon; lubato namosobit.

¹⁰Tama moola dungol doi Gosyen lipuno, lolani tukon yaku — tama, tukon napau tumbu, domba, mbembe, saapi tukon sasaibino tama nalobo.

¹¹Kalu tama daano doi Gosyen, yaku moola pialayo tama. Tempo malaalan daano motatuluus lima kotaun koidan tukon naikon yaku usahakene sulano i tama nakaluarga tukon naiyayon piniala aki nakakurangan oioila.’ ”

¹²Yusuf bantile koidan, “Diabudodoo komuyu kitayo susuumu, koidan ikoo Benyamin, baikon yaku tutuu Yusuf.

¹³Bontiikene doi tamanggita babasal tuuno daku kuasa dimbaa, doi Mesir, tukon salitaikene doi yana sasaibino komo lapamo komuyu kitayo. Maka mosoisobit babayo yana doisumai.”

¹⁴Lapa doiya yana lebeke Benyamin, utuso pioto, maka kokiil; mau Benyamin bai kokiil tukon lebeke Yusuf koidan.

¹⁵Doibundu, tukon daano mokokiil, Yusuf lebeke sasaibino koutuso tukon umayo yanila. Lapa doiya yanila tambuuno basa-basalita tukon yana.

¹⁶Salataa doi tomundo nakamali tololongol kobilita baikon Yusuf utus-utuso molubat, tomundo tukon napagawe-pagawe tulut sanaang.

¹⁷Maka tomundo bantile doi Yusuf, “Sumboliiyo doutus-utusomudoo naolokitiyo yanila nakeledai tukon gandum tukon mule doi Kanaan

¹⁸sulano nalobotiyo tama tukon yanila nakaluarga maka biol doisumai. Yaku naikon beena doi yanila buta momonondok tuuno doi Mesir, tukon yanila naikon moola tubo tukon sukup luwe butadoo hasilo.

¹⁹Sumboliiyo yanila kai namakanggi dimbaa bubula kokereta tuuk boloki tukon yanila napau-pau modaano mopoipoisik, tukon sulano yanila nalobotiyo yanila tamano.

²⁰Yanila aki napalaluu pikikene kobarang-barang motapakisaa yanila tinggale, sabab komo monondok tuuno posaapon ko Mesir naikon teali yanila koona.”

²¹Yakub napau-pau lakukene tomundo naparentahdoo. Yusuf beena yanila bubula kokereta, pokokonoi tukon tomundo naparentah, tukon kai ndemel tuuk doi ampakonan.

²²Bineekon kai doi yanila suwe-suwele meeng kopaar kopakean boolu, bai doi Benyamin binee tolu kosakato kodoy perak tukon lima kopaal kopakean boolu.

²³Yana kopotuiyo kotamano songulo kokeledai moinolokiti tukon barang-barang momonondok luwedoi Mesir, tukon sungulo koidan kokeledai inolokiti tukon gandum, roti tukon kinaan bailoon tuuk mokinaan doi naampakonan doi Mesir.

²⁴Doibundu yana antekenemo koutus-utuso tukon bantile doi yanila, “Inai popodangaani doi loloon.”

²⁵Yanila tinggale ko Mesir tukon mule dombalaa Kanaan doi Yakub, yanila tamano.

²⁶“Yusuf daano motubo!” yanila bantile doi yana. “Yana balakuasa doi posaapon ko Mesir!” Molongol bilitadoo, Yakub heran, tukon yana aki namanggaan doi yanila.

²⁷Bai sala lapa yanila salitayo sasaibino Yusuf nabinontiikon doi yanila, tukon salataa yana kitayo kokereta Yusuf mokapatuwe tuuk moalakite tukon babayo doi Mesir, yana sadar doi nabanonookan.

²⁸“Daku pau Yusuf daano motubo!” nabantilano. “Tolongo doiya daku pinalaluu! Yaku sio kutaus tukon mokitayo yana akiyon kumate.”