Read Banggai TEALIAN 46 Bible Online

TEALIAN 46 - Banggai bible

TEALIAN 46

¹Yakub sadiayo sasaibino kona lobo maka luwe. Polong doi Bersyeba yana sosubakene kososubakon doi Mian Bisa tamano Ishak nangginaal.

²Meeng kobakitakonan lalomo doi tempo popook, Mian Bisa bantile doi yana, “Yakub, Yakub!” “Oode, Temeneno,” kona potimbili.

³“Yaku Mian Bisa, Mian Bisa tamamu nangginaal,” kona bantilano. “Inai matakut tuuk motaus doi Mesir. Yaku naikon teali kene komu katulunan bangsa mobabasal imbali.

⁴Yaku naikon lolainge ikoo doi Mesir, tukon babayo komu katulunan abali nai lipu nia. Yusuf naikon daano doi bibilomu kalu laatemo komu matean.”

⁵Maka Yakub luwedoi Bersyeba. Kona pau-pau alakite yanila tamano tukon yanila napau-boloki doi keretadoo lalomo tomundo Mesir nakinopotuikon.

⁶ Yanila kai babayo kona iyayon piniala tukon sasaibino kona buat molapamo yanila laate doi Kanaan, maka ampakon doi Mesir. Yakub babayo sasaibino kona katulunan, doiyamo

⁷sasaibino kona pau tumbu mala-malane tukon moluko.

⁸Yakub naanggota-anggota kaluarga momalaing doi Mesir doiyamo:

⁹Ruben, pau langgongo; napau-pau: Henokh, Palu, Hezron tukon Karmi.

¹⁰Simeon; kona pau-pau: Yemuel, Yamin, Ohad, Yakhin, Zohar tukon Saul, pau luwedoi naboloki meeng koboine Kanaan.

¹¹Lewi; napau-pau: Gerson, Kehat tukon Merari.

¹²Yehuda; napau-pau: Syela, Peres tukon Zerah, sabeakai Yehuda napau bailon doiyamo Er tukon Onan mate doi Kanaan. Peres napau-pau: Hezron tukon Hamul.

¹³Isakhar; napau-pau: Tola, Pua, Ayub tukon Simron.

¹⁴Zebulon; napau-pau: Sered, Elon tukon Yahleel.

¹⁵Yanila sasaibino doiyamo Lea napau-pau sinuung tuuk Yakub doi Mesopotamia, kobailonggon koidan napau moluko kosambuno Dina. Jadi sasaibino Yakub nakatulunan luwedoi naboloki Lea kona kadaang tolu kolono tolu komian.

¹⁶Gad; napau-pau: Zifyon, Hagi, Syuni, Esbon, Eri, Arodi, tukon Areli.

¹⁷Asyer; napau-pau: Yimna, Yiswa, Yiswi, tukon Beria maka Serah, yanila utuso moluko. Beria napau-pau doiyamo Heber tukon Malkiel.

¹⁸Domo songulo nomoo komian daanoon Yakub nakatulunan luwedoi Zilpa, doiyamo ata boine Laban mobeekene doi Lea napau moluko.

¹⁹Rahel Yakub naboloki daano lua kona pau, doiyamo Yusuf tukon Benyamin.

²⁰ Doi Mesir Yusuf malaat pau lua, doiyamo Manasye tukon Efraim naboloki Asnat mosuunge, Potifera napau, moteali imam doi Heliopolis.

²¹Benyamin; kona pau-pau: Bela, Bekher, Asybel, Gera, Naaman, Ehi, Ros, Mupim, Hupim tukon Ared.

²²Songulo sangkap domianoo daanon Yakub nakatulunan luwedoi naboloki Rahel.

²³Koidan Dan; napau Husim.

²⁴Naftali; napau-pau: Yahzeel, Guni, Yezer tukon Syilem.

²⁵Pituila domianoo daanon Yakub nakatulunan doi Bilha, ata moluko Laban mobeekene doi napau Rahel.

²⁶Yakub nakatulunan motaus doi Mesir sasaibino kona kadaang nom kolono nom komian, aki natongusokon kona moni-monianan.

²⁷ Yusuf napau-pau mosinuung doi Mesir daano lua komian, tobikon Yakub nakaluargaa mopolong doi Mesir sasaibino kona kadaang pitu kolono komian.

²⁸Yakub sumboliiyo Yehuda moampakon matailuk sulano nauange Yusuf sulano napososuung kotamano doi Gosyen. Salataa yanila polong doi Gosyen,

²⁹Yusuf lakit doi nakereta tuuk mopososuung tukon tamano idoo. Doi tempo yanila pososuung, Yusuf lebeke ko tamano malumbit tukon kokiil.

³⁰Yakub bantile doi Yusuf, “Diabudodoo yaku yasemo mate, sabab lapamo kukitayo ikoo tukon toiyo baikon ikoo daano motubo.”

³¹Maka Yusuf bantile doi utus-utuso tukon namotolutusan bailon, “Yaku sio kutaus tukon popitoikene doi tomundo baikon koutus-utusonggu tukon sasaibino daku montolutusan modungol doi Kanaan lubato.

³²Yaku naikon bontiikene baikon komuyu pototooli domba tukon saapi, tukon babayomo koiyayon tukon sasaibino komu lobo.

³³Kalu tomundo uange komuyu tukon masadaikene kopo limang,

³⁴bontiikene doi yana baikon komuyu nia pototooli iyayon daano doi popoipoisikan, buno pokakana tumbumu. Tukon buno doiya yana naikon sumboliiyo komuyu dungol doi Gosyen lipuno.” Yusuf bantile langgedoo sabab ko Mesir miano lasayo hina mobalagaul tukon pototooli-pototooli iyayon.