Read Banggai TEALIAN 48 Bible Online

TEALIAN 48 - Banggai bible

TEALIAN 48

¹Bubula kotempo doi bundu binabilitakon doi Yusuf baikon kotamano masakit tuuno. Jadi yana taus tukon napau lua, doiyamo Manasye tukon Efraim duutiyo Yakub.

²Salataa Yakub lengele baikon Yusuf molubat, yana pototongikene sasaibino kona tenaga, maka osulang doi natampat moolowan.

³ Yakub bantile doi Yusuf, “Mian Bisa Mo Babasal konakuasa lapamo okitakene kobutongo doi yaku doi Lus, doi tano Kanaan, tukon lapamo balakaatiyo yaku.”

⁴Yana bantile doi yaku, “Yaku naikon beekene doi koo badaang kopau tumbu, sulano komu katulunan teali badaang kobangsa; Yaku naikon beekene natano nia doi mukatulunan salaku yanila kotumbuno tuuk sidutu-posidutukon.”

⁵Yakub banggadudukene, “Yusuf, mupau molua Efraim tukon Manasye mosinuung doi Mesir nia moakiyon kulubat dimbaa, yaku anggape kupau, pokakana buno Ruben tukon Simeon.

⁶Kalu ikoo malaat pau koidan, yanila aki naikon kuanggape salaku kupau bai tataap mupau; pusaka tuuk yanila naikon yanila talimayo doi Efraim tukon Manasye.

⁷ Yaku lakukene langgedoo tuuk Rahel tinamu. Doi kuampakonan lalomo abali doi Mesopotamia, tinamu mate doi tano Kanaan, aki namododoon ko Efrata, tukon yaku poloon tuuno. Yaku kibule yana indaa doi loloon bibilo doi Efrata.” (Diabudodoo Efrata tiningonii salaku Betlehem.)

⁸Salataa Yakub kitayo Yusuf napau-paudoo, yana masadai, “Indee napau-pau naiya?”

⁹Yusuf timbiliyo, “Naiyamo daku pau-pau Mian Bisa mobeekene yaku dimbaa, doi Mesir.” Yakub bantile, “Koolanikene yanila doi yaku sulano kubalakaatiyo.”

¹⁰Yakub akimo namoola mokita tukon tontong sabab motuamo tukon matano kabulo. Yusuf koolanikene kona pau-paudoo doi Yakub, tukon yana lebeke maka umayo yanila.

¹¹Maka Yakub bantile doi Yusuf, “Aki kusangkayo tuuno naikon mopososuung koidan tukon ikoo, bai dia budodoo Mian Bisa baikon pataikenemo yaku mokitayo komu pau-pau koidan.”

¹²Doibundu Yusuf alayo yanila doi Yakub banano bunggono, maka yana susuungo sosuba doi tamano salaano.

¹³Salataa doiya Yusuf abese kona pau lua lolani Yakub, Efraim kopioto doi bobono tukon Manasye molanggongo doi bakalingano. Bai Yakub posembanggene kobotokono tukon binggakene kolimano bakalingano doi Efraim oluno bunggono, bai kolimano bobo doi Manasye oluno bunggono.

¹⁵Lapa doiya Yusuf binalakaatimo, yana bantile, “Mian Bisa, Yanamo ko Temeneno, Abraham tukon Ishak namanggaan, Yanamo komo babayo yaku polong diabudodoo;

¹⁶Yanamo komalaekat molapamo sodiiyo yaku doi sasaibino kosilakaan. Boliisi Mian Bisa doo nabalakaatiyo napau-pau nia. Boliisi banggadudul tubo kosambunggu tukon Abraham tukon Ishak sambuno sabab napau-pau nia! Boliisi yanila namosuung pau tumbu, tukon nabadaang kona turunan nai dunia nia.”

¹⁷Yusuf aki nasanaang salataa kitayo kotamano mobinggakene kolimano bakalinga doi Efraim oluno bunggono; maka yana taaniyo kotamano limano tuuk mobiele luwedoi Efraim oluno bunggono doi Manasye oluno bunggono.

¹⁸Yana bantile doi tamano, “Inai mobuno koiya, Tama. Naiyamo kopau langgongo; binggakene Tama limano bakalinga doi oluno bunggono.”

¹⁹Bai kotamano tolake, yana bantile, “Yaku toiyo, kupau, yaku toiyo. Manasye naikon babasal kona kuasa tukon nakatulunan kai naikon teali bangsa mobabasal. Bai utuso pioto naikon lobian babasal kona kuasa doi yana, tukon utuso pioto nakatulunan naikon teali bangsa-bangsa mobabasal.”

²⁰ Maka yana balakaatiyo koidan dopau-paudoo doi oloyodoo, yana bantile, “Israel miano naikon bantile kosambumu kalu yanila balakaatiyo komian. Yanila naikon bantile, ‘Boliisi Mian Bisa nakabaiyo ikoo buno Efraim tukon Manasye.’ ” Tukon buno doiya Yakub lolukene Efraim luwedoi Manasye.

²¹Maka Yakub bantile doi Yusuf, “Buno ikoo kitayo, daku matean loolanimo, bai Mian Bisa naikon tulungiyo komuyu tukon babayo komuyu abali doi pombumbu natano.

²²Doikoomo, tukon bolikon doi utus-utusomu, yaku beekene ko Sikhem, lipu momolumbangoo molapamo yaku alayo luwedoi Amori miano tukon sabel tukon kupanah.”