Read Banggai TEALIAN 50 Bible Online

TEALIAN 50 - Banggai bible

TEALIAN 50

¹Yusuf balubanggon doi tamano maka kokiil tukon umayo koduduso.

²Maka Yusuf parentayo kotukang mokubaiyo kobajan natahan malumbit sulano nalamba-lambaiyo Yakub bajano.

³Limangoo kotempono sangkap poloono kooloyo, doiyamo tempo mobiasa pinalaluu tuuk molamba-lambaiyo kobajan. Mesir miano poloonggene Yakub, pitukolono kooloyo kona kalumbit.

⁴Salataa lapa kotempo poloonan, Yusuf bantile doi tomundo napagawe-pagawe, “Pelenggene nateteba nia doi tomundo,

⁵ ‘Doi tempo kotamanggu nalolanian kona matean, yana sumboliiyo yaku paladandi doi yana, baikon yaku naikon kibule yana doi bakibulan lalomo molapamo yana sadiayo doi tano Kanaan. Sabab doiya, pataikene yaku motaus sulano yaku kibule kotamanggu. Lapa doiya yaku abali.’ ”

⁶Maka tomundo bantile, “Tauso kibule kotamamu buno molapamo ikoo dondiikene doi yana.”

⁷Maka Yusuf taus sulano nakibule kotamano. Sasaibino tomundo napagawai, laka-lakai doi kamali tukon sasaibino komo balakuasa doi Mesir, taus polaing-laing tukon Yusuf.

⁸Kona kaluarga utus-utuso, tukon namotolutusan bailon taus koidan. Tolongo pau-pau mopau-pauno tukon yanila naiyayon piniala yanila tinggale doi Gosyen lipuno.

⁹Kolompok mololo kereta tukon mololo adalan malaing, tobikon balisanoo bulusan tuuno.

¹⁰Salataa yanila polong doi tampat mian nabangumbasonan gandum doi Goren-Haatad, doi Yordan Paisunobatango doi taalikon tolopot, yanila mandaung tukon susa tukon alalo mobulungan. Yusuf mokubai upacara susaan, pitu kooloyo kona kalumbit.

¹¹Salataa modungoliyo ko Kanaan kitayo dosusaanoo doi Goren-Haatadoo, yanila bantilemo, “Bukamaen kona susaan Mesiroo miano naupacara susaan!” Doiyamo kosababpo dotampatoo sinombuikon Abel-Mizraim.

¹²Bunomo doiya Yakub napau-pau lakukanggene oila Yakub natinetebakon doi yanila.

¹³ Yanila kanggiyo kobajano doi Kanaan tukon kibule doi leeng Makhpela lalomo, doi taalikon tolopot Mamre asi molapamo Abraham oliyo luwedoi Efron Het mianodoo, sulano natealikene bakibulan.

¹⁴Salataa Yusuf kibule kotamano, yana abali doi Mesir polaing-laing tukon utus-utuso tukon sasaibino komian molainge yana tuuk nakinibulan kotamanodoo.

¹⁵Lapa yanila tamano mate, Yusuf utus-utuso langgongo bantile, “Bulaando kalu andeno Yusuf mangabos noa tukon yase balase konda kulokisan lolukoo?”

¹⁶Tobikon doiya yanila kapatuwe nateteba nia doi Yusuf, “Akiyoon kotamanggita namate,

¹⁷yana sumboliiyo kami bontiikene doi koonokon buno naiya, ‘Ompuniyo kosala utus-utusomu nailakukon looluk doi koo.’ Jadi, salahku Mian Bisa napeleleani kotamanggita nasinosubai, kami kabiyo, ompuniyomo kosala molapamo kami lakukanggene.” Yusuf kokiil salataa natalimayo dotetebadoo.

¹⁸Maka doutus-utusodoo susuungo lubat tukon sosuba doi salaano polaing bantile, “Kaminia muata.”

¹⁹Bai Yusuf bantile doi yanila, “Inai momatakut; sabab yaku aki namoola motindokio salaku Mian Bisa.

²⁰Komuyu lapamo pomeenggon tuuk kubaiyo kolokis doi yaku, bai Mian Bisa boliiyo dokulokisanoo teali namonondokan, sulano tukon komo teali lolukoo badaang komian motubo diabudodoo moola sinalamaton.

²¹Inai molili. Yaku naikon osukupiyo kopoo pinalaluu tukon komuyu napau-pau.” Bunomo doiya kona kinondokano yanila noano tukon bantilan-bantilan momonondok, tobikon yanila poloon.

²²Yusuf tataap dungol doi Mesir tukon namotolutusan; yana tubo polong kona umur sakat songulo kotaun.

²³Yana daano mosampat kitayo Efraim napau tumbu. Yana sampat koidan mopiala Makhir napau-pau, doiyamo Manasye natumbu, salaku napau susuungo.

²⁴Kona bantilano doi utus-utuso, “Daku matean loolanimo, bai Mian Bisa tantu naikon pialayo komuyu tukon andane komuyu tobuat luwe nai lipunia, doi lipu molapamo dinondiikon tukon totopi doi Abraham, Ishak tukon Yakub.”

²⁵ Maka Yusuf sumboliiyo sasaibino kona montolutusan mobatotopi, konabantilano, “Popaladandimo doi yaku, baikon kalu naikon Mian Bisa andanemo komuyu doi lipudoo komuyu naikon babayo kobajanku.”

²⁶Doibundu Yusuf mate doi Mesir kona umur sakat songulo kotaun. Yanila lamba-lambaiyo kobajano tukon abesemo doi peti matean lalomo.